ކުރިއަށް އޮތް ހަތަރު ދުވަހުވެސް މޫސުން ގޯސްވާނެކަމަށް ލާފާކުރެވޭ ކަމަށާއި ހުރިހާ ފަރާތްތަކަކުން ވެސް މޫސުމަށް ސަމާލުވުމަށް މޫސުމާއި ބެހޭ ޤައުމީ އިދާރާ (މެޓް އޮފީސް) އިން އިލްތިމާސްކޮށްފިއެވެ.
އައު އަހަރު ބަންދުގައި މޫސުން ގޯސްވާނެކަމަށް ލަފާކޮށް މޫސުމާއި ބެހޭ ޤައުމީ އިދާރާއިން ބުނީ ކުރިއަށް އޮތް ހަތަރު ދުވަހުވެސް ރާއްޖޭގެ ބޮޑު ސަރަހައްދަކަށް ވިއްސާރަ ކުރާނެ ކަމަށާއި، މެދުރާއްޖެތެރޭގެ އަތޮޅުތަކަށް ގުގުރުމާއެކު ބޯކޮށް ވާރޭ ވެހި ވައި ވެސް ގަދަވާނޭކަމަށް ލަފާކުރެވޭކަމަށެވެ.
މޫސުން ގޯސްވާނެ ކަމަށް ލަފާކޮށް މެޓުން އިއްޔެއިން ފެށިގެން އަންނަނީ އެލާޓްތައް ނެރެމުންނެވެ. މިއަދު ހެނދުނު 8:30 އިން ފެށިގެން މެންދުރު ފަހު 14:30އާ ހަމައަށް ޅ. އަތޮޅުން ފެށިގެން ތ އަތޮޅާއި ހަމައަށް މެޓުން ވަނީ ވައިޓް އެލާޓް ނެރެފައެވެ.
އެ އިދާރާއިން ބުނީ އެލާޓް ނެރެފައިވާ ސަރަހައްދުތަކަށް ގަޑިއަކު 40 މޭލުގެ ބާރުމިނުގައި ވައި ޖެހި ކަނޑުތައް ވަރަށް ގަދަވާނެ ކަމަށް ލަފާކުރެވޭކަމަށެވެ.
ސްރީލަންކާގެ އިރު ދެކުނުގަ އުފެދިފައިވާ ކޮޅިގަނޑާއި، އެކޮޅިގަނޑާ ގުޅިފައިވާ ލޯޕްރެޝާރ ޓްރަފުގެ ސަބަބުން އައު އަހަރުގެ ބަންދުގައި ރާއްޖެއަށް ވަރަށް ބޮޑަށް ވިއްސާރަކުރާނެކަމަށް ލަފާކޮށް މެޓުން ވަނީ ހުރިހާ ފަރާތްތަކުންވެސް މޫސުމަށް ސަމާލުވުމަށް އިލްތިމާސްކޮށްފައެވެ. މޫސުން ރީތިވާނެ ކަމަށް ލަފާކުރެވެނީ ހަފްތާ ބަންދަށްފަހު އަންނަ އާދިއްތަ ދުވަހު އެވެ.