‎މީޓަރުގެ ރީޑިން ނުނަގައި ސްޓެލްކޯއިން ބިލްކޮށްފައިވާ ކަމަށް ތުހުމަތުކޮށް "ދިޔަރެސް" ނޫހުގައި ޝާއިޢުކޮށްފައިވާ ޚަބަރު އެކުންފުނިން ދޮގުކޮށްފިއެވެ.
ސްޓެލްކޯއިން ނެރުން ނޫސްބަޔާނެއްގައި ބުނީ، "މީޓަރުގެ ރީޑިން ނުނަގައި ސްޓެލްކޯއިން ކަރަންޓު ބިލްތައް އާދަޔާ ޚިލާފަށް ބޮޑުކޮށްފި" މި ސުރުޚީގެ ދަށުން މިމަހުގެ އެއްވަނަ ދުވަހު ދިޔަރެސް ނޫހުން ޝާއިޢުކޮށްފައިވާ ޚަބަރަކީ އެއްވެސް އަސާސެއް ނެތް، ހަޤީގަތާ ޚިލާފު، ދޮގު މައުލޫމާތު ހިމަނައިގެން އެކުންފުންޏާމެދު ރައްޔިތުންގެ މެދުގައި ނުތަނަވަސްކަން އުފައްދައި، ސިޔާސީ މަންފާއެއް ހޯދުމަށް ލިޔެފައިވާ ޚަބަރެއް ކަމަށް ފާހަގަކުރެވޭ ކަމަށެވެ.
‎އެ ކުންފުނިން ކަރަންޓު ބިލު އަބަދުވެސް ތައްޔާރުކުރަނީ މީޓަރުގެ ރީޑިންގެ މައްޗަށްކަން ފާހަގަކޮށް ސްޓެލްކޯއިން ބުނީ މީޓަރުގެ ރީޑިން ހުންނާނީ ކަސްޓަމަރުން ކަރަންޓު ބޭނުންކުރާ މިންވަރަށް ކަމަށެވެ.
ސްޓެލްކޯގެ މޯބައިލް އެޕްލިކޭޝަން މެދުވެރިކޮށް ކަރަންޓު ބިލުގެ ޖުމުލަ އަދަދު ކަސްޓަމަރުންނަށް ހިސާބު ކުރެވޭނެ ކަމަށާއި މީގެ އިތުރުން، މި އެޕްލިކޭޝަން މެދުވެރިކޮށް ކަސްޓަމަރުންނަށް ކަރަންޓު ބޭނުންކުރައްވާ މިންވަރު (ރީޑިން) ފެންނަން ހުންނާނެ ކަމަށްވެސް ސްޓެލްކޯއިން ބުނެފައިވެއެވެ.
ސްޓެލްކޯޢިން ބުނާ ގޮތުގައި ކޮވިޑް-19 ގެ ޚާއްސަ ހާލަތުގައި މީޓަރުގެ ރީޑިން ނެގުމަށް އަމަލުކުރަމުން އައި ގޮތްވަނީ 2020 ވަނަ އަހަރުގެ ޖޫން މަހުން ފެށިގެން އާންމު އުޞޫލަށް އިޔާދަކޮށްފައެވެ. އެހެންކަމުން، ކޮވިޑް-19ގެ ހާއްސަ ހާލަތުގައި ކަރަންޓު ރީޑިން ނެގުމަށް އަމަލުކުރި އުސޫލަށް މިހާރުވެސް ރީޑިން ނަގާ ކަމަށް ދިޔަރެސް ނޫހުގެ އެ ޚަބަރުގައި ބަޔާންކޮށްފައި އޮތް އޮތުމަކީ ކަމުގެ ހަގީގަތަށް ވާސިލުވުމަށް އެއްވެސް މަސައްކަތެއް ނުކޮށް ރައްޔިތުންނަށް އޮޅުވާލުމަށް ގަސްދުގައި ކޮށްފައިވާ ކަމެއް ކަމަށް އެކުންފުނިން ދެކޭ ކަމަށް ބަޔާނުގައި ވެއެވެ.
ސޯޝަލްމީޑިއާގައި ބައެއް މީހުން، ސްޓެލްކޯއިން ފޮނުވި އޭޕްރީލް މަހުގެ ކަރަންޓު ބިލް އިންތިހާއަށް ބޮޑު ކަމަށް ބުނެ ވަނީ ނުރުހުންފާޅުކޮށްފައެވެ.
ނިމިދިޔަ އޭޕްރީލް މަހާއި މިހިނގާ މެއި މަހަކީ ރާއްޖެއަށް އެންމެ ހޫނު ގަދަވާނެ ދުވަސްތައްކަމަށް ކަމާ ބެހޭ އިދާރާތަކުން ލަފަކޮށްފައިވާތީ ކަރަންޓު އިގްތިސާދުކުރުމަށް މާލެ ސަރަހައްދުގައި ކަރަންޓުގެ ހިދުމަތް ފޯރުކޮށްދޭ މައި ކުންފުނި ސްޓެލްކޯއިން ވަނީ މިދިޔަ މަހު އެދިފައެވެ.
ސްޓެލްކޯއިން އޭރުވެސް ބުނަމުން އައީ ރާއްޖެއަށް އެންމެ ހޫނު ގަދަވާނެކަމަށް ލަފާކުރެވޭ މި ދުވަސްތައް ރޯދަމަހާއި ދިމާވުމުން ކަރަންޓު ބޭނުންކުރާ މިންވަރުވެސް އިތުރުވެފައިވާ ކަމަށެވެ. އެހެންކަމަށްވުމާއިއެކު ކަރަންޓް ބޭނުންކުރުމުގައި ސަމާލުވެ ކަރަންޓް އިގްތިސާދުކުރުމަށް ހާއްސަ ސަމާލުކަމެއް ދިނުމަށް ސްޓެލްކޯއިން ވަނީ ރައްޔިތުންނަށް އިލްތިމާސްކޮށްފައެވެ.
ކޮންމެ ހޫނު މޫސުމެއްގައިވެސް ސްޓެލްކޯގެ ކަަރަންޓު ބިލު ބޮޑުވާ މައްސަލަ އަންނަނީ ފެންމަތިވަމުންނެވެ.
މިކަމާ ގުޅިގެން "ވީނިއުސް"އިން ސުވާލުކުރުމުން ސްޓެލްކޯގެ އޮފިޝަލަކު ވިދާޅުވީ، ބިލްކޮށްފައި ވާނީ ބޭނުންކުރި ކަރަންޓަށް ކަމަށެެވެ. ކަރަންޓު ބޭނުންކުރުމުގައި ސަމާލުވާން ސްޓެލްކޯއިން އެދުނު ނަމަވެސް ބައެއް ގޭބިސީތަކުން އެގޮތަށް އަމަލުކޮށްފައިނުވާކަން އޭޕްރީލް މަހު ނެގި ރީޑިންތަކުން ހާމަވެގެންދާ ކަމަށެވެ.
ހޫނު ގަދަ ދުވަސްވަރު، އާންމު ރައްޔިތުން މިކަމަށް ވިސްނައި ކަރަންޓު އިގުތިސާދުކޮށްފިނަމަ 15 އިންސައްތައާއި 20 އިންސައްތައަށް ކަރަންޓު ބިލު ކުޑަކުރެވޭނެކަމަށް ކަމާއިބެހޭ އިދާރާތަކުން ލަފާކުރެއެވެ.
ސްޓެލްކޯއިން ބުނީ، ކަރަންޓު ބޭނުންކުރެވޭ މިންވަރު ސްޓެލްކޯގެ މޯބައިލް އެޕުންވެސް ބަލާލެވޭނެ ކަމަށާއި ޔޫސޭޖް ގްރާފަށް ކުއްލި ބަދަލެއް އައިސްފި ނަމަ ސްޓެލްކޯއިން ދެ ވަނަ ރީޑިންއެއް ނަގައި ފުރަތަމަ ނެގި ރީޑިން ރަނގަޅުތޯ ކަށަވަރުކުރާނެ ކަމަށެވެ.