ކާފިރުންގެ ތެރޭގައި މިހާރު ގިނައީ އެއްވެސް ދީނެއް ޤަބޫނުކުރާ މީހުންނެވެ. ކަލަކު ވޮޑިގެންވާކަންވެސް ޤަބޫލުނުކުރާ މީހުންނެވެ. ޤިޔާމަތްދުވަސް އަންނާނެކަމާއި އެމީހަކު ދުނިޔޭގައި ހުރިއިރު ކުރި ޢަމަލުތަކުގެ ޙިސާބު ބައްލަވާނެކަން ޤަބޫލުނުކުރާ މީހުންނެވެ.  
ދުނިޔެއަށް އުފަންވުމަށްފަހު ﷲ ތަޢާލާގެ އެއްކައުވަންތަކަން ޤަބޫލުނުކުރާ ކަމަށް ކިތަންމެ ގިނަ ބައަކު ބުނި ނަމަވެސް އެއެންމެންވެސް އެހަދަނީ ބޮޑު ދޮގެކެވެ. އެމީހުން ކުރިން ވަނީ ﷲ ތަޢާލާގެ ޙަޟްރަތުގައި މަލާއިކަތުންނާއި އާދަމްގެފާނު ހެކިކޮށް ﷲ ތަޢާލާގެ އެއްކައުވަންތަކަން ޤަބޫލުކޮށް އެކަމަށް ހެކިވެފައެވެ. އެކަމަށް ހެކިވެފައިނުވާ ހަމައެކަކުވެސް ދުނިޔެއަށް އުފަންނުވާހުއްޓެވެ!  
ތިރީގައިވާ ލިޔުމުން އެކަން އެނގިލައްވާނެއެވެ.  
سَلاَم ލެއްވި آدَم ގެފާނުންގެ ބުރިކަށިފުޅު މާތްރަސްކަލާނގެ يَدُ قُدْرَةُ ން ފުއްސަވައިލެއްވި ހިނދުގައި އެހިއްޕެވި ދެމުށްވަރު ހިއްޕަވައި ފިއެވެ. ފުރަތަމަ ފަހަރުހިއްޕެވިބައިވަރު ހިއްޕެވީ އެކަލޭގެފާނުންގެ ކަނާތް ފަރާތުންނެވެ. އަނެއްފަހަރު ހިއްޕެވި ބައިވަރު ހިއްޕެވީ އެކަލޭގެފާނުންގެ ވާތްފަރާތުންނެވެ. ދެންފަހެ آدَم ގެފާނުންގެ ކުރިމަތިފުޅުގައި މާތްރަސްކަލާނގެ قُدْرَة ތެރިކަމުން އެތަކެތި ފަތުރުއްވައިފިއެވެ. އެއިރު އެތަކެތި ވަނީ ذرّތަކެއްގެ މިސާލުގައެވެ. ދެން وحى ކުރެއްވިޔޭ. މިބައިމީހުންނީ ސުވަރުގެޔަށް ދާންތިބި މީހުންނެވެ. އަހުރެންނަކަށް ފަރުވާލެއްނެތެވެ. އެއުރެން ޢަމަލު ކުރާހުށީ ސުވަރުގޭގެ عمل ންނެވެ. މިބައި މީހުންނީ ނަރަކައަށް ދާންތިބި މީހުންނެވެ. އަހުރެންނަކަށް ފަރުވާލެއްނެތެވެ. އެއުރެން عمل ކުރާހުށީ ނަރަކައިގެ عمل ންނެވެ.  
ފަހެ سَلاَم  ލެއްވި آدَم ގެފާނު ދަންނަވައިފިޔޭ يَارَبَّ ނަރަކައިގެ أهْلُ ވެރީންގެ عمل ތަކަކީ ކޮބައިތޯ އެވެ. وحى ކުރެއްވިޔޭ، އެއީ އަހުރެނާއި މެދުގައި شَرِيْكُ ކޮށް އަހުރެން ފޮނުވާ رَسُولُ  ންގެ ބަސްތައް ދޮގުކޮށް  އަހުރެންގެ ފޮތުގައި ހުރި އަމުރާއި ނަހީޔަށް އުރެދި އުޅުމެވެ.  آدَمُ ގެފާނު ދެންނެވިޔޭ، އެއުރެން އެކަން ނުކުރެތްތޯ އެއުރެން ހެކިކުރެއްވުން ކިޔެއްތޯ އެވެ. ދެންފަހެ އެއުރެން ހެކި ކުރައްވައިފި އެވެ. އެއުރެންނަށް وحى  ކުރައްވައިފިޔޭ. اَلَسْتُ بِرَبِّكُمْ އިބުރެމެންގެ ކަލާނގެ ކަމުގައި އަހުރެން ނުވަންހެއްޔެވެ. އެއުރެން ދަންނަވައިފޫއޭ، ނޫނެކޭ. ނޫނެކޭ. އަޅަމެން ހެކި ވެއްޖައީމުއެވެ.
ދެންފަހެ އެއުރެން އެކަލާނގެ ކައުކަމަށް ހެކިވީ ކަމުގެ މައްޗަށް آدم ގެފާނާއި މަލާއިކަތުން ހެކި ކުރައްވައިފައި އެއުރެން އިހުތިބިތަނަށް ރައްދު ކުރައްވައިފި އެވެ. އެއިރު އެއުރެން ދިރިތިބީ، ހަށިތަކަކާއި ނުލައި ހުސް ނަފުސުތަކަކުންނެވެ. ދެންފަހެ آدم ގެފާނުންގެ ބުރިކަށިފުޅަށް އެއުރެން ރައްދު ކުރެއްވި ހިނދުގައި އެއުރެން މަރުގަންނަވައި ފުރާނަ ހިއްޕަވައި عَرْشِى ގެ خَزَانه  ތަކުގެ ތެރެއިން خَزَانه އެއްގައި އެފުރާނަތައް ލައްވައިފި އެވެ. ފަހެ އިންސާނަކަށް ވުމަށް ތައްޔާރުވެގެންވާ މަނީގެ ފޮދުވަރު رحم އަކަށް ފައިބައްޖެއްޔާއި އެތާނގައި قَرَار ވެ، ސޫރަ ފުރިހަމަ ވެއްޖައުމަށް ދާންދެން އޮވެދެއެވެ. އެއިރު އެއިގެ ނަފުސުވަނީ މަރުވެގެންނެވެ. އެކަމަކު އެއިގައި ހުރި مَلَكُوتِى جَوْهَر އަށްޓަކައި އެކުނިވެ ފާސިދުވެގެން ދިއުން މަނާކުރެއެވެ. ދެންފަހެ މާތްރަސްކަލާނގެ އެއަށް ފުރާނަ އަޅުއްވައިފިއްޔާއި އެއިން ހިއްޕަވައި عَرْشِىގެخَزَانه ގައި ފޮރުއްވައިފައިވާ ސިއްރު އެއަށް ރައްދު ކުރައްވައި ފަތެވެ. އެއިރުން އެކުއްޖާ ތޮޅިލައިފައެވެ. އެތޮޅިލާ ތޮޅިލުން މައިމީހާއަށް އެނގެއެވެ. ބައެއްފަހަރަށް ނުއެނގިވެސް ހިނގައިދެއެވެ. މިއީ ފުރަތަމަ މަރުވެފައި ދެވަނައަށް ދިރުނު ދިރުނުމެކެވެ.  
 
- ފަޟީލަތުއްޝައިޚް ޙުސައިން ޞަލާޙުއްދީން ލިޔުއްވާފައިވާ "اللَّمْعَةُ الظَّاهِرَة- ޤިޔާމަތުގެ ވާހަކަ"ފޮތުން  
(މިލިޔުމުގައި މިޒަމާނުގައި ބޭނުން ނުކުރާ ބައެއް ބަސްތައް ހުރިކަން ފާހަގަކުރެވެއެވެ. އެބަސްތައް ގެނައީ މުޞައްނިފްގެ ޢިބާރާތުން ގެންނަންވެގެންނެވެ.)