'އަލް އަބްރާރު ޕްރައިވެޓް ލިމިޓެޑް' ގްރޫޕުން ފަހު ވަގުތު އުމްރާއަށް ފުރުން ކެންސަލްކުރުމުން، އެ ގްރޫޕާއެކު އުމްރާއަށް ފުރަން ތިބި 100 އަށްވުރެ ގިނަ މީހުންނަށް ފުރޭގޮތް ނުވެ, އެކަން ބޮޑު މައްސަލައަކަށް ވެފައި ވަނިކޮށް, އުމްރާއަށް ދާން ދެއްކި ފައިސާއިން ބައެއް ރިފަންޑުގެ ގޮތުގައި ދޭން ފަށައިފިއެވެ. މީގެ ތިން ވަރަކަށް މަސް ކުރިން މި ރޯދަ މަހުގެ ފަހު 15ގެ އުމްރާއަށް މީހުން ގެންދިއުމަށް އެ ގުރޫޕުން ވަނީ މީހެއްގެ އަތުން ގާތްގަނޑަކަށް 45000 ރުފިޔާ ނަގާފައި ކަމަށް, ފައިސާ ދެއްކި މީހުން ބުންޏެވެ. އެ ގުރޫޕުގެ ހަވާލުގައި އުމްރާއަށް ދާ މީހުން ފުރަން އޮތީ ރޭގެ ފްލައިޓުންނެވެ. އިއްޔެ ހެނދުނު ވެސް ފުރޭނެ ކަމަށް އެންގުމަށް ފަހު ނުފުރޭނެ ކަމާއި ދަތުރު ކެންސަލް ކުރަން ނިންމާފައިވާކަން އަންގާފައިވަނީ އިއްޔެ މެންދުރު ކުއްލި މީޓިންއެއް ބޭއްވުމަށް ފަހުގައި ކަމަށް އެ ޖަމާއަތުން އުމްރާއަށް ދާން ފައިސާ ދެއްކި މީހުން ބުނެއެވެ. ދަތުރު ކެންސަލް ކުރި ސަބަބެއް ކަމަށް ގުރޫޕުން ބުނަނީ މެދުއިރުމަތީގައި މިހާރު ކުރަމުން އަންނަ ހަނގުރާމަ ކަމަށް މައުލޫމާތު ދިން މީހުން ބުންޏެވެ. https://www.sun.mv/218665 އެއާއެކު ރޭ ވަނީ ގިނަ ބަޔަކު އެ އުމްރާ ގުރޫޕު ހިންގާ އޮފީސް ކައިރިއަށް އެއްވެ ނުރުހުން ފާޅުކޮށްފައެވެ. އަދި އިސްލާމިކް މިނިސްޓްރީ އާއި ފުލުހުން ވެސް އެ މައްސަލަ ބަލަން ފެށިއެވެ. އުމްރާއަށް ދިއުމަށް ފައިސާ ދެއްކި ބައެއްގެ އާއިލާ މެންބަރަކު މިއަދު "ސަން" އަށް ބުނިގޮތުގައި ރޭ ވަނީ އެ ގުރޫޕުން ރިފަންޑު ދޭން ފަށައިފައެވެ. އެގޮތުން ޓިކެޓަށްވާ 15,000 ރުފިޔާ ކެނޑުމަށް ފަހުގައި, އެ މީހަކު ދެއްކި އަދަދަކަށް ބަލައި ބާކީ ފައިސާ ރޭ ޖަމާކުރަން ފަށާފައިވާ ކަމަށް އޭނާ ބުންޏެވެ. އަދި ޓިކެޓް ފައިސާ ވެސް ފަހުން ޖަމާކޮށްދޭނެ ކަމުގެ ޔަގީންކަން ދޭ ކަމަށް ބުންޏެވެ. "އެކަމަކު މީގެ ހިތާމައަކީ ފައިސާ ލިބުނަސް ދަތުރު ކެންސަލް ވީމަ. އުމްރާއަށް ދިއުންތާ މީގެ އެންމެ މުހިންމު ކަމަކީ. އެކަން ނުވީމަ ވަރަށް ވެސް ދެރަ އަދި ފައިސާ ދޭން ފެށިޔަސް," މަންމަ އާއި ބައްޕަ އުމްރާއަށް ފޮނުވުމަށް އެ ގުރޫޕަށް ފައިސާ ދެއްކި ޒުވާނަކު ބުންޏެވެ. ހަނގުރާމައިގެ ސަބަބުން ދަތުރު ކެންސަލް ކުރަން ޖެހުނީ ކަމަށް އަލް އަބްރާރު ގުރޫޕުން ބުނި ނަމަވެސް މި ދުވަސްވަރު ވެސް ރާއްޖޭން ގިނަ ބަޔަކު އެކި ގުރޫޕުތަކުގައި އުމްރާއަށް އެބަ ފުރައެވެ. އަދި ސައުދީއިން ވެސް އުމްރާ ވެރިންނަށް އެ ފުރުސަތު އޮތީ ހުޅުވާލައިފައެވެ. މާތްވެގެންވާ ރަމަޟާން މަހުގެ ފަހު ފަނަރައަށް އުމްރާއަށް ދިއުމަށް ފައިސާ ދެއްކި 100 އަށް ވުރެން ގިނަ ދިވެހީންނަށް އުމްރާއަށް ނުފުރުނު މި މައްސަލަ ފުލުހުން ގެންދަނީ ތަހުގީގު ކުރަމުންނެވެ. މެދުއިރުމަތީގައި މިހާރު ކުރަމުން އަންނަ ހަނގުރާމައާ ގުޅިގެން އަރަބި ގައުމުތަކުގެ މެދުގައި މަސްރަހު ވަނީ ވަރަށް ބޮޑަށް ގޯސްވެފައެވެ. އެމެރިކާއާއި އިޒްރޭލުން ގުޅިގެން އީރާނަށް ދިން ވަރުގަދަ ހަމަލާގެ ބަދަލު ހިފުމުގެ ގޮތުން އީރާނުން ވަނީ ގަލްފުގެ (އަރަބި) ގައުމުތަކުގައި ހުރި އެމެރިކާގެ އެސެޓްތަކަށް ހަމަލާ ދީފައެވެ. އޭގެ ތެރޭގައި ސައުދީ ވެސް ހިމެނެއެވެ. ފާހަގަކޮށްލެވޭ ގޮތުގައި މީގެކުރިން ވެސް އުމްރާއަށް ދާ ގްރޫޕްތަކުގެ އެކި މައްސަލަތައް ފެންމަތިވެފައި އެބަހުއްޓެވެ. އެގޮތުން އުމްރާއަށް ގެންދަން ކަމަށް ބުނެ މީހުން އަތުން ފައިސާ ނަގައި، ސްކޭމްކުރުމުގެ މައްސަލަތަކުގައި މިނިސްޓްރީން ވަނީ އެކި ފިޔަވަޅުތައް އަޅައިފައެވެ.