މި ސަރުކާރުން ބިރު ދައްކައިގެން, ގައުމީ ބޭންކުގެ ސީއީއޯގެ މަގާމުން ކާލް ސްޓުމްކާ އިސްތިއުފާ ދެއްވިތާ މަދު ދުވަސްކޮޅެއްގެ ތެރޭގައި އެމަގާމަށް އައްޔަން ކޮށްފައިވާ, ބީއެމްއެލްގެ ކުރީގެ ޑެޕިއުޓީ ސީއީއޯ މުހައްމަދު ޝަރީފްއަކީ, ރާއްޖޭގެ ތާރީޚުގައި ހިގައިދިޔަ އެންމެ ބޮޑު ޚިޔާނާތުގައި ތަހުގީގަށް ސުވާލުކުރާން ޖެހޭ ފަރާތެއްކަން ހާމަ ވެއްޖެއެވެ.
މިކަން ހާމަވެގެން ދިޔައީ, އޭނާ މިއަދު ބީއެމްއެލްގެ ސީއީއޯކަމަށް އައްޔަން ކުރެވުމާއެކު މީޑިއާތަކުގައި އާންމުވެގެންދިޔަ މައުލޫމާތު ތަކުންނެވެ.
ރައީސް ޔާމިންގެ ދައުރުގައި ހިގައިދިޔަ އެމްއެމްޕީއާރުސީގެ ބޮޑު ޚިޔާނާތުގެ ހުރިހާ މުއާމަލާތެއް ހިގައިދިޔައިރު, ޝަރީފް ހުންނެވީ ބީއެމްއެލްގެ އެ މުއާމަލާތްތަކާ ގުޅުންހުރި ޒިންމާދާރު އިސް މަގާމެއްގައެވެ. އަދި އެ މުއާމަލާތްތައް ހިނގާފައިވަނީ އޭނާގެ އިހުމާލު އޮވެގެންކަމަށް, ފަހުން އެމްއެމްޕިއާރުސީއާއި ގުޅިގެން ހިގައިދިޔަ ތަހުގީގަތަކުން ހާމަވެފައި ވެއެވެ.
މި ތުހުމަތުތަކާއި, އަދި ރައްޔިތުންގެ މަޖިލީހަށް ދޮގު މައުލާތު ދިންކަމުގެ ތުހުމަތުތައްވެސް ޝަރީފްގެ ބޮލުގައި އެޅިފައިވަނިކޮށް, އޭނާ ބޭންކުން އިސްތިއުފާ ދިނީ ބޭންކުގައި 25 އަހަރު ޚިދުމަތްކުރުމަށްފަހުއެވެ. އޭނާ ބޭންކާ ގުޅުނީ 1995 ގައެވެ. އެ މުއްދަތުގައި އޭނާވަނީ ރީޓެއިލް ބޭންކިންގ ޑިރެކްޓަރ، ޑިރެކްޓަރ އޮފް އޮޕަރޭޝަންސް އަދި ޑެޕިއުޓީ ޗީފް އެގްޒެކެޓިވް އޮފިސަރގެ މަގާމާއި ޗީފް އޮޕަރޭޓިން އޮފިސަރގެ މަޤާމުވެސް ހިމެނޭ ގޮތުން އެކިއެކި މަޤާމުތަކުގައި ޚިދުމަތްކޮށްފައިވެއެވެ.
އޭނާ ބޭންކުގެ ޗީފް އޮޕަރޭޓިން އޮފިސަރ (ސީއޯއޯ) ގެ މަގާމަށާއި ޑެޕިއުޓީ ސީއީއޯގެ މަގާމަށް އައްޔަން ކުރެވުނީ 2019 ވަނަ އަހަރުގެ އޮކްޓޯބަރުގައެވެ.
2019 ގެ މެދުތެރޭގައި، މޯލްޑިވްސް ޕޮލިސް ސަރވިސް (އެމްޕީއެސް) އިން ވަނީ ޝަރީފް ރައްޔިތުންގެ މަޖިލީހަށް ދޮގު މަޢުލޫމާތު ދިނުމުގެ ތުހުމަތުގައި ތަޙްޤީޤު ކުރަމުންދާކަން ކަށަވަރުކޮށްދީފައެވެ. މިކަމާ ގުޅިގެން، ރައްޔިތުންގެ މަޖިލީހުގެ އޭރުގެ ރައީސް އަދި ކުރީގެ ރައީސް މުޙައްމަދު ނަޝީދު ވަނީ ޝަރީފް މަޖިލީހަށް އޮޅުވާލާފައިވާކަން ކަށަވަރުކޮށްދޭ އައު ހެކި ފެނުމާ ގުޅިގެން ތަޙްޤީޤުތައް ކުރިއަށް ގެންދިއުމަށް އޭރު ނިންމަވާފައެވެ.
ޝަރީފް އިންކާރުކުރެއްވި ކަމަށް ބެލެވެނީ އެސްއޯއެފްއަށް ނަގުދު ނުކުރެވޭނެ ޗެކެއް ފޮނުވިކަމަށެވެ. އެސްއޯއެފްއަކީ ޤައުމުގެ ތާރީޚުގައި އެންމެ ބޮޑު ކޮރަޕްޝަންގެ މައްސަލައިގައި ހިމެނޭ ކުންފުންޏެކެވެ.
މި ތުހުމަތުތަކާ ގުޅިގެން، ޝަރީފްގެ ނަން އޭރު ވަނީ ދައުލަތުން އޭރު ނޮމިނޭޓްކުރި ބީއެމްއެލްގެ ބޯޑު މެންބަރުންގެ ލިސްޓުން ވެސް އުނިކޮށްފައެވެ.
އެހެންނަމަވެސް, ބީއެމްއެލްއަކީ ރައީސް މުއިއްޒުގެ ގޮނޑިކޮއްކޮ މުވައްސަސާއަކަށް ހެދުމުގެ ބޭނުމުގައި, ކޮރަޕްޝަނާއި, އެތައް އިހުމާލަކާއި, އަދި ދައުލަތުގެ މުވައްސަސައާއަކަށް ކަނޑައެޅިގެން ދޮގު މައުލޫމާތު ދިންކަމުގެ އެތައް ބަދުނާމެއް އެޅި, ރައްޖޭގެ ތާރީޚުގައި ހިނގި އެންމެ ބޮޑު ވައްކަމުގެ ތަހުގީގުގައި ސުވާލުކުރާން ޖެހިފައިވާ ފަރާތެއް ރާއްޖޭގެ އެންމެ ބޮޑު މާލީ މުވައްސަސާގެ ސީއީއޯކަމަށް އައްޔަން ކުރެވުމުން, ރާއްޖޭގެ މާލީ ހާލަތާމެދު ބައިނަލްއަގުވާމީ މުޖުތަމައުގައި އިތުބާރު ގެއްލިގެންދާނެ ކަމީ ކަށަވަރުވެ ޔަގީންވާން އޮތް ކަމެކެވެ.