މި ދުވަސްވަރު ކަރަންޓު ބޭނުންކުރުމުގައި ސަމާލުކަންދީގެން ކަރަންޓު އިގްތިސާދު ކުރުމަށް ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ އިލްތިމާސްކުރައްވައިފިއެވެ.
ފަހުމީ މިހެން ވިދާޅުވީ އިއްޔެ އެކްސްގައި ކުރެއްވި ޕޯސްޓެއްގައެވެ. އެގޮތުން، މިދުވަސްވަރަކީ މިއަހަރު ރާއްޖެއަށް އެންމެ ހޫނު ގަދަވާނެ ދުވަސްވަރުކަމަށް މޫސުމާއިބެހޭ ޤައުމީ އިދާރާއިން ލަފާކޮށްފައިވާތީއާއި އަދި ރޯދަ މަހަކީ، ކަރަންޓުގެ ބޭނުންކުރާ މިންވަރު އެހެން މަސްމަހަށްވުރެ އިތުރު މަހަކަށްވުމުން މިދުވަސްވަރު ކަރަންޓު ބޭނުން ކުރުމުގައި ޚާއްސަ ސަމާލުކަމެއް ދިނުމަށް އޭނާ އެދިވަޑައިގެންނެވިއެވެ.
ސްޓެލްކޯގެ ތަފާސްހިސާބުތަކުން ދައްކާގޮތުން އެވްރެޖް މަހެއްގައި މާލެ ސަރަހައްދުގައި 94 މެގަވޮޓާއި ހަމައަށް ކަރަންޓު ބޭނުން ކުރާ ކަމަށް ފަހުމީ ވިދާޅުވިއެވެ. ނަމަވެސް، މި ދުވަސްވަރު 104.7 މެގަވޮޓާއި ހަމައަށް ކަރަންޓު ބޭނުން ކުރާކަން އޭނާ ފާހަގަކުރެއްވިއެވެ.
ކަރަންޓު ބޭނުންކުރާ މިންވަރު އިތުރުވާތީ ކަރަންޓަށް ކުރަންޖެހޭ ހޭދަ ވީހާވެސް ކުޑަ ކުރުމަށް، ކޮންމެހެން ބޭނުންވާ މިންވަރަށް ކަރަންޓު ބޭނުން ކުރުމަށް ފަހުމީ އިލްތިމާސްކުރެއްވިއެވެ.
މީގެ އިތުރުން، މި ދުވަސްވަރު ކަރަންޓު އިޤުތިސާދު ކުރެއްވުމަށް ޚާއްސަ ސަމާލުކަމެއް ދެއްވުމަށް ވެސް އިލްތިމާސް ކުރެއްވިއެވެ.
ރާއްޖޭގެ ހުރިހާ ސަރަހައްދެއްގައި ވެސް މި ދުވަސްވަރު ކަރަންޓު ބިލުތައް ބޮޑުވުމުގެ ޝަކުވާ ކޮންމެ އަހަރަކުވެސް ކުރެއެވެ.