ޝަރުއީ ދާއިރާގައި މަސައްކަތް ކުރައްވާ ކޮންމެ ޚިދުމަތްތެރިއަކީ ނަޒާހަތްތެރިއަކަށް ވާންޖެހޭ ކަމަށް އުއްތަމަ ފަނޑިޔާރު އަލްއުސްތާޒު އަހްމަދު ފާއިޒު ހުސައިން ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ މިއަދު ފާހަގަކުރަމުންދާ ބައިނަލްއަގުވާމީ އެންޓި ކޮރަޕްޝަން ދުވަހުގެ މުނާސަބަތުގައި އޭސީސީން ނެރުނު ސަޕްލިމެންޓަށް ދެއްވި ޚިތާބުގަ އެވެ.
މި ޚިތާބުގައި އުއްތަމަ ފަނޑިޔާރު އިތުރަށް ފާހަގަކުރައްވާފައިވާ ކަންކަމަށް ބަލާއިރު ކޮރަޕްޝަނަކީ ޖުމްހޫރިއްޔަތަށް ހުރި ނުރައްކަލެއް ކަމަށާއި އޭގެ ސަބަބުން އަދުލު އިންސާފުގެ ހަމަތައް ގެއްލި ގާނޫނުގެ ވެރިކަން ނުވަތަ ރޫލް އޮފް ލޯ ނެތިގެންދާ ކަމަށް ވިދާޅުވި އެވެ.
"ކޮރަޕްޝަނާއި ދެކޮޅަށް ތެދުވެ ކޮރަޕްޝަން ހުއްޓުވުމަށް ގާނޫނާއި ގަވާއިދުގެ އެހީގައި މަސައްކަތް ކުރުމަކީ މުޖުތަމައުގެ ވަކިވަކި އާންމު ފަރުދުންނާއި ދައުލަތުގެ ހުރިހާ މުއައްސަސާއެއްގެ އިތުރުން ޝަރުއީ ދާއިރާއިން ނަގަހައްޓަން ޖެހޭ ބޮޑު ޒިންމާއެއް ކަމީ ޝައްކެއް ނެތް ކަމެއް. ޚާއްސަ ގޮތެއްގައި ޝަރުއީ ދާއިރާގެ ޒިންމާ ބޮޑު. ކޮންމެ ހާލަތެއްގައި ވިޔަސް ކުރާ ކޮންމެ ކަމެއް ތެދުވެރިކަމާއެކު ކުރުމަކީ ނަޒާހަތްތެރިވުން،" އުއްތަމަ ފަނޑިޔާރު ވިދާޅުވި އެވެ.
މީގެ އިތުރުން ދިވެހިރާއްޖޭގެ ޝަރުއީ ދާއިރާއަކީ ކޮރަޕްޝަނުގެ ނުފޫޒުން އެއްކިބާވެފައިވާ، މިނިވަން އިންސާފުވެރި މުއައްސަސާއެއްގެ ގޮތުގައި ދެމިއޮތުމަށްޓަކައި ޝަރުއީ ދާއިރާގައި މަސައްކަތް ކުރައްވާ ވަކިވަކި ބޭފުޅުންގެ ޒިންމާ ބޮޑު ކަމަށާއި އިންސާފު ހޯދުމަށް ޝަރުއީ މުއައްސަސާތަކުގައި ޓަކިޖައްސަވާ ކޮންމެ ރައްޔިތެއްގެ މުރާދު ފުރިހަމަ ކޮށްދެއްވުމަކީ ޝަރުއީ ދާއިރާގެ އަމާޒު ކަމުގައި ހައްދަވަންޖެހޭ ކަމަށް އުއްތަމަ ފަނޑިޔާރު ވިދާޅުވި އެވެ.
ކޮރަޕްޝަން ހުއްޓުވުމާއި ކޮރަޕްޝަނާ ބެހޭގޮތުން ހޭލުންތެރިކަން އިތުރުކުރުމަށް ކުރެވޭ މަސައްކަތްތައް ފާހަގަކުރުމާއެކު އެކަމުގައި ޝާމިލްވާ ހުރިހާ ފަރާތްތައް ހިތްވަރާއެކު ކުރިއަށް ދިއުމަށްވެސް އުއްތަމަ ފަނޑިޔާރު އިލްތިމާސް ކުރައްވާފައިވެ އެވެ.