މިހާރު ކުރިއަށްދާ ދެކުނު އޭޝިއާގެ ފުޓްބޯޅަ އީދު ސާފް ސުޒުކީ ކަޕަށް ހާއްސަކޮށްގެން "ހަވީރާ"އި މުވާސަލާތީ ކުންފުނި ދިރާގު ގުޅިގެން ކުއިޒެއް ތައާރަފްކޮށްފި އެވެ. މުބާރާތުގެ ތާރީހާއި ޓީމުތަކާ ބެހޭ މައުލޫމާތުގެ މައްޗަށް ބިނާކޮށްފައިވާ ސުވާލުތައް މި ކުއިޒްގައި ހިމެނޭއިރު ކުއިޒުން ވަނަ ހޯދައިގެން އިނާމް ހޯދުމުގެ ފުރުސަތު އެބައޮތެވެ. އެގޮތުން އެއް ވަނަ ފަރާތަކަށް 10،000ރ، ދެ ވަނަ އަށް 5000ރ. އަދި ތިން ވަނަ ފަރާތަކަށް 3000ރ. ގެ އިނާމެއް ލިބޭނެ އެވެ. ކުއިޒް އިން ވަނަ ލިބޭނީ އެންމެ މަދުން މަސައްކަތްކޮށްގެން އެންމެ އަވަހަށް އެންމެ ގިނަ ސުވާލުގެ ޖަވާބު ދިމާކުރާ ފަރާތަކަށެވެ. ކުއިޒްގައި އެކަކަށް ކިތަންމެ ގިނަ ފަހަރު ބެސް ބައިވެރިވޭނެ އެވެ. މި މަހުގެ 23 އިން ފެށިގެން ކުރިއަށްގެންދާ މި ކުއިޒް އަށް ބޮޑު ތަރުހީބެއް ލިބެމުން އަންނަ ކަމަށް ހަވީރުން ބުނެ އެވެ. ސާފް ސުޒުކީ ކަޕް ފުޓުބޯޅަ މުބާރާތަށް ހާއްސަ ކޮށްގެން "ހަވީރު"ން ނެރުނު ހާއްސަ އަދަދު ނެރުމުގެ ރަސްމިއްޔާތު.---ހަވީރު ފޮޓޯ: ނިޝާން އަލީ ދިރާގުގެ އެސިސްޓަންޓް މެނޭޖާ ޕަބްލިކް ރިލޭޝަން އިމްޖާދު ޖަލީލް ވިދާޅުވީ ދިރާގަކީ އަބަދުވެސް ދިވެހިންނާ ގުޅުން ހުރި ކުޅިވަރުގެ ހަރަކާތްތައް ހިއްސާވާ ކުންފުންޏެއް ކަމަށާއި ހާއްސަކޮށް ސާފް ޗެމްޕިއަންޝިޕަކީ ސަރަހައްދީ ފެންވަރުގައި ރާއްޖެ އަށް ކާމިޔާބީ ހޯދުމުގެ ފުރުސަތަކަށް ވާތީ އެކަމުގައި ބައިވެރިވާން ބޭނުންވީ ކަމަށެވެ. "މީގެ އިތުރުން ހަވީރަކީ އަޅުގަނޑުމެންނާ ވަރަށް ގާތް ޕާޓްނަރެއް. ހަވީރަކީ ތަފާތު ކުޅިވަރުތައް ހާއްސަކޮށް ގައުމީ ޓީމު ބައިވެރިވާ މުބާރާތްތައް ފުރިހަމައަށް ކަވަރުކުރާ މީޑިއާއެއް. އެގޮތުން ސާފް ޗެމްޕިއަންޝިޕަށް ވެސް ވަރަށް ފުރިހަމަ ކަވަރޭޖަށް އެބަ ގެނެސްދޭ،" ސާފް ސުޒުކީ ކަޕަށް ހާއްސަކޮށްގެން ހަވީރު އޮންލައިނުގައި ހާއްސަ ސެކްޝަނެއް ގާއިމްކޮށްފައިވާއިރު ހަވީރުން ވަނީ މުބާރާތަށް ހާއްސަ ފޮތެއް ވެސް ނެރެފަ އެވެ. މީގެ އިތުރުން އެކްޕާޓް މޮޓޯސްއާ ގުޅިގެން ސްކޯ ޕްރެޑިކްޝަން ހަރަކާތެއް ވަނީ ފަށައިފަ އެވެ.