ހޯމް މިނިސްޓަރު އުމަރު ނަސީރު އުޅުއްވަނީ ކޯޓަށް ފިއްލަވައިގެން ނޫން ކަމަށާއި ރާއްޖެވަޑައިގެން އަމިއްލަފުޅަށް ކޯޓަށް ހާޒިރުވެވަޑައިގަންނަވާނެ ކަމަށް ހޯމް މިނިސްޓްރީން މިއަދު ބުނެފި އެވެ. މިނިސްޓަރު އުމަރު ބަންދުގައި ބަހައްޓައިގެން ކޯޓަށް ހާޒިރުކުރުމަށް ކްރިމިނަލް ކޯޓުން ވަނީ ފުލުހުންގެ މައްޗަށް އަމުރު ނެރެފަ އެވެ. މިއީ މިނިސްޓަރަކު ބަންދުގައި ބަހައްޓައިގެން ހާޒިރުކުރަން ފުލުހުންގެ މައްޗަށް އަމުރު ނެރުނު ފުރަތަމަ ފަހަރެވެ. ހޯމް މިނިސްޓްރީގެ މީޑިއާ ކޯޑިނޭޓަރު ތަޒްމީލް އަބްދުއްސަމަދު މިއަދު ވިދާޅުވީ މިނިސްޓަރު ރާއްޖެ އިން ބޭރަށް ވަޑައިގަތީ ރަސްމީ ދަތުރުފުޅެއްގައި ކަމަށެވެ. އެހެންކަމުން ދަތުރުފުޅު ނިންމަވާލެއްވުމަށް ފަހު ހޯމަ ދުވަހުގެ ރޭ މާލެވަޑައިގެން، މިނިސްޓަރު ކޯޓަށް ހާޒިރުވެވަޑައިގަންނަވާނެ ކަމަށް ވެސް އޭނާ ވިދާޅުވި އެވެ. "މިނިސްޓަރަކީ އެއްގޮތަކަށް ފިއްލަވައިގެން އުޅުއްވާ ބޭފުޅެއް ނޫން. އަމިއްލަފުޅަށް ކޯޓަށް ވަޑައިގަންނަވާނެ،" ތަޒްމީލް ވިދާޅުވި އެވެ. އޭނާ ވިދާޅުވި ގޮތުގައި ހޯމް މިނިސްޓަރު ބަންދުގައި ބަހައްޓައިގެން ކޯޓަށް ހާޒިރުކުރަން އަމުރު ނެރެފައިވަނީ އެ ޝަރީއަތް މި މަހު 17ގެ ފަހަށް ޝެޑިއުލްކޮށްދޭން އުމަރުގެ ވަކީލް ކޯޓުގައި އެދިވަޑައިގެންފައި ވަނިކޮށެވެ. އަދި ރަސްމީ ދަތުރުފުޅެއްގައި މި މަހުގެ 10-16 އަށް މިނިސްޓަރު އުމަރު ރާއްޖެ އިން ބޭރަށް ވަޑައިގަންނަވާނެ ކަން ހޯމް މިނިސްޓްރީން ވެސް ކްރިމިނަލް ކޯޓަށް އަންގާފައިވާނެ ކަމަށް ތަޒްމީލް ވިދާޅުވި އެވެ. "އެގޮތަށް އެދިިފައިވަނިކޮށް ސިޓީ އަށް ވެސް ޖަވާބެއް ނުދެއްވައި، ބަންދުގައި ބަހައްޓައިގެން ކޯޓަށް ހާޒިރުކުރަން އަމުރު ނެރުމަކީ ސުވާލު އުފެދޭ ކަމެއް،" ތަޒްމީލް ވިދާޅުވި އެވެ. އުމަރުގެ މައްޗަށް ދައުލަތުން ދައުވާ ކުރަނީ ކުރީގެ ރައީސް މުހައްމަދު ނަޝީދުގެ ސަރުކާރުގެ ދުވަސްވަރު އޭރުގެ އިދިކޮޅު ފަރާތްތަކުން ކުރި މުޒާހަރާއެއްގައި ދައުލަތުގެ އަމާންކަމަށް ގެއްލުން ލިބިދާނެ ފަދަ ވާހަކަ ދެއްކެވި ކަމަށް ބުނެ އެވެ. ނަމަވެސް އެ ދައުވާ އަށް އުމަރު އިންކާރު ކުރައްވަ އެވެ. މި މައްސަލާގައި މިދިޔަ އަންގާރަ ދުވަހާއި ބުރާސްފަތި ދުވަހު ބާއްވަން ހަމަޖެއްސި ޝަރީއަތް ވަނީ ކެންސަލްކޮށްފަ އެވެ. އަންގާރަ ދުވަހުގެ އަޑުއެހުން ކެންސަލްކުރީ އުމަރު ކޯޓަށް ވަޑައިނުގަތުމުންނެވެ. އޭރު އޭނާ ހުންނެވީ ރަސްމީ ދަތުރުފުޅެއްގައި ނެދަލެންޑްސްގަ އެވެ. އުމަރުގެ ޝަރީއަތް ބުރާސްފަތި ދުވަހު ކެންސަލްކުރި ސަބަބު ސާފުވާ ގޮތެއް ނުވި އެވެ.