ރައީސުލްޖުމްހޫރިއްޔާ  ޑރ.މުހައްމަދު މުއިއްޒުގެ ޒައާމަތަކީ ރައްޔިތުން އެދިއެދި ތިބި، އޯގާތެރި ނިޔަނެތި ޒައާމަތެއް ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެއްޖެއެވެ.
ޕީޕަލްސް ނެޝަނަލް ކޮންގްރެސް(ޕީއެންސީ) އިން މިރޭ ކުރިއަށްގެންދާ ބޮޑު ޖަލްސާގައި އެ ޕާޓީގެ ސެނެޓު މެމްބަރު އަދި ނެޝަނަލް ސޯޝަލް ޕްރޮޓެކްޝަން އެޖެންސީ ( އެންސްޕާ) ގެ ސީއީއޯ ހީނާ ވަލީދު ވިދާޅުވީ، ވެރިކަމަށް ދެ އަހަރު ވާން ކައިރިވީއިރު، ގިނަ ކަންކަން ރައީސް މުއިއްޒުގެ ސަރުކާރުން ކޮށްދެއްވައިފައިވާ ކަމަށެވެ.
އެގޮތުން މި ސަރުކާރުން ކޮށްދެއްވައިފައިވާ މުހިންމު ކަންކަމަށް އަލިއަޅުވައިލައްވައި ހީނާ ވިދާޅުވި ގޮތުގައި، އާސަންދައިން އައިނު ހެއްދުމަށް 2000 ރުފިޔާ ދިނުމަށް މި ސަރުކާރުން ނިންމެވީ، ސަރުކާރުން އެކަމަށް ހޭދަ ކުރަން ޖެހޭ އެއްޗެއް ދެ ގުނަ ބޮޑު ވިޔަސް، ރައްޔިތުންނަށް ފަސޭހަ ކޮށްދިނުމުގެ ގޮތުންނެވެ.
އަދި ތެލަސީމިއާ ކުދިންނަށް ފަރުވާ ކުރުމަށް ދިމާވާ ދަތިތަކަށް ލުއި ހޯދުމަށް މި ސަރުކާރުން ކޮށްފައިވާ މަސައްކަތްތަކަށް ވެސް ހީނާ އަލިއަޅުވައިލެއްވިއެވެ.
އަންނަ ޖެނުއަރީ މަހުން ފެށިގެން، ތެލަސީމިއާ ބަލި ތަހައްމަލު ކުރަމުންދާ ފަރާތްތަކަށް ހާއްސަ އެލަވަންސެއް ލިބިގެންދާނެ ކަމުގައި ހީނާ ވިދާޅުވިއެވެ.
އަދި ދަރިމައިވުމުގެ މައްސަލަތައް ހައްލު ކުރުމަށް ފަރުވާ ހޯދާ ފަރާތްތަކަށް ދިން ލުއިތަކަށް ވެސް ހީނާގެ ވާހަކައިގައި އަލިއަޅުވައިލެއްވިއެވެ.
މީގެއިތުރުން، ސިޔާސީ މައިދާނުގައި، އަންހެނުންނަށް ފަހި ފުރުސަތުތަކެއް ހޯދައިދިނުމަށް ރައީސް މުއިއްޒުގެ ސަރުކާރުން މަސައްކަތްތައް ކުރަމުންދާ ކަމަށް ވެސް ހީނާ ވިދާޅުވިއެވެ.
 
ދިވެހީންގެރާއްޖެ ޖަލްސާގެ ތެރެއިން: ފޮޓޯ/ ޖަވިޔަނި
ހީނާ ވިދާޅުވީ، ސިޔާސީ މައިދާނުގައި މަސައްކަތް ކުރާ އަންހެނުން ބާރިވެރި ކުރުމަށް ސަރުކާރުން މަސައްކަތް ކުރިޔަސް، އެފަދަ ކަނބަލުން ބަލިކަށި ކޮށްލުމަށް ވާދަވެރި ފަރާތްތަކުން އެކި ވާހަކަތައް ދައްކާ ކަމަށެވެ.
މިކަމުގެ ޝިކާރައަކަށް ހުދު ހީނާ ވެސް ވެވަޑައިގެންފައިވާކަން ފާހަގަކުރައްވައި، އޭނާ ވިދާޅުވީ، އެއްވެސް ހަގީގަތެއް ނެތް ތުހުމަތުތަކެއްކޮށް، އޭނާ ފަހަތަށް ޖައްސައިނުލެވޭނެ ކަމަށެވެ.
”އަޅުގަނޑާ ރައީސުލްޖުމްހޫރިއްޔާ  ހަވާލު ކުރައްވައިފައިވާ މަގާމުގެ މަސްއޫލިއްޔަތު އަޅުގަނޑު އަދާ ކުރާނީ ވަރަށް ފުރިހަމަ ކަމާއެކު“ ހީނާ ވިދާޅުވިއެވެ.
ހީނާ އިތުރަށް ވިދާޅުވީ، އޭނާ ކުރައްވާ ކޮންމެ ކަމެއް ވެސް ކުރަނީ، ކަންކަން ބައްލަވާ ފަރާތެއްވާކަން ދެނެވަޑައިގެން، ތެދުވެރިކަމާއި އަމާނާތްތެރިކަމާއެކުގައި ކަމަށެވެ.
ޕީއެންސީން މިރޭ ބާއްވާ ޖަލްސާގައި ވަރަށް ގިނަ އަދަދެއްގެ ބަޔަކު ދަނީ ބައިވެރިވަމުންނެވެ. އެގޮތުން ރާއްޖޭގެ އެކި ކަންކޮޅުތަކުން މާލެ އައި މީހުންނާއެކު، ޖަލްސާ ބާއްވާ އާޓިފިޝަލް ބީޗު ސަރަހައްދު ވަނީ ފުރި ބާރުވެފައެވެ.
ޖަލްސާގެ ބައިވެރިން ތިބީ ގައުމީ ދިދަތަކާއި ކޮންގްރެސް ޕާޓީގެ ދިދަތައް ހިފައިގެންނެވެ.
މި ޖަލްސާގައި ރައީސުލްޖުމްހޫރިއްޔާ އަދި ޕީއެންސީގެ ރައީސް ޑރ.މުހައްމަދު މުޢިއްޒު ތަގުރީރު ކުރައްވަވާނެއެވެ.