ލަންޑަން (އޭޕްރީލް 2) - އިނގިރޭސި ޕްރިމިއާ ލީގުގައި ރޭ ބުކާޔޯ ސަކާ ޖެހި ގޯލުން 2-1 އިން ފުލަމް އަތުން އާސެނަލް މޮޅުވިއިރު، ނޮޓިންހަމް ފޮރެސްޓުން މެޗުގެ ކުރީކޮޅުގައި ޖެހި ގޯލާ އެކު، 1-0 އިން މެންޗެސްޓާ ޔުނައިޓެޑް ބަލިކޮށްފި އެވެ.
މި މޮޅާ އެކު، އާސެނަލުން ވަނީ ލީގުގެ އެއް ވަނައިގައި އޮތް ލިވަޕޫލްގެ ލީޑު ނުވަ ޕޮއިންޓަށް ކުޑަކޮށްފަ އެވެ. ލިވަޕޫލަށް 29 މެޗުން 70 ޕޮއިންޓް ލިބިފައިވާއިރު، އާސެނަލަށް ވަނީ، 30 މެޗުން 61 ޕޮއިންޓް ލިބިފަ އެވެ. އަދި، ތިން ވަނައިގައި އޮތް ފޮރެސްޓަށް 30 މެޗުން ވަނީ، 57 ޕޮއިންޓް ލިބިފަ އެވެ.
އާސެނަލްގެ އެމިރޭޓްސް ސްޓޭޑިއަމްގައި ރޭ ކުޅުނު މެޗުގެ ފުރަތަމަ ހާފުގައި އެ ޓީމުން ލީޑުނެގީ މިކޭލް މެރީނޯ، އޭރިއާތެރެއިން ލިބުނު ފުރުސަތަކުން ކާމިޔާބުކުރި ގޯލުންނެވެ. އާސެނަލަށް ފުރަތަމަ ހާފުގައި މައްސަލަ ދިމާވީ އެ ޓީމުގެ އިތުބާރު ޑިފެންޑަރު، ގަބްރިއެލް މަގާޅައެސްގެ ފަލަމަސްގަނޑަށް އަނިޔާވެ ބަދަލުކުރަން ޖެހުމުންނެވެ.
އަނިޔާގެ ސަބަބުން ތިން މަސް ދުވަހު ކުޅުމާ ދުރުގައި ހުރުމަށް ފަހު، ރޭގެ މެޗުގައި ކުޅެން ނުކުތް ސަކާ ވަނީ، ބަދަލަކަށް އެރިތާ ހަތް މިނިޓް ތެރޭ ގޯލު ޖަހައިފަ އެވެ. އަރިމަތިން ގަބްރިއެލް މާޓިނެލީ ނަގައިދިން ހުރަަހަކަށް އަރައި ސަކާ މި ގޯލު ޖެހީ ބޮލުންނެވެ.
ފުލަމް އިން ބަދަލުތަކެއް ގެނެސްގެން އެޓޭކް ރަނގަޅުކުރި އެވެ. އެ ގޮތުން، އެ ޓީމުން މެޗުގައި ޖެހި ހަމައެކަނި ގޯލު ކާމިޔާބުކުރީ، އިތުރު ވަގުތުގެ ހަތަރު ވަަނަ މިނިޓްގައި ރޮޑްރީގޯ މުނީޒް އެވެ. ބަަަދަލަކަށް ކުޅެް އެރި މުނީޒް އަށް މި ލަނޑު ޖެހުމުގެ ކުރިން ވެސް ގޯލެއް ޖަހަން ރަަނގަޅު ފުރުސަތެއް ލިިބި ބޭނުމެއް ނުކުރެވުނެވެ.
ފޮރެސްޓުން ރޭގެ މެޗުގައި ޔުނައިޓެޑް ކޮޅަށް ޖެހި ހަމައެކަނި ގޯލު ޖެހީ މެޗު ފެށުނުތާ ފަސް ވަނަ މިނިޓްގަ އެވެ. މިއީ، ކުރިން ޔުނައިޓެޑަށް ކުޅުނު އެންތަނީ އެލަންގާ ޖެހި ގޯލެކެވެ. އަމިއްލަ ހާފުގެ ތެރެއިން ބޯޅަ ހިފައިގެން ގޮސް ޔުނައިޓެޑްގެ އޭރިއާތެރެއަށް ވަދެ، އެލަންގާ ޖެހި ބޯޅަ އަމާޒުވީ ގޯލުގެ ތިރީ ކަނަށެވެ.
ނަތީޖާ އަނބުރާލެވޭތޯ ޔުނައިޓެޑުން ވީ ވަރަކުން މަސައްކަތް ކުރި ނަމަވެސް ފޮރެސްޓްގެ ޑިފެންސްލައިން ފޫއަޅުވާލެވޭނެ ގޮތެއްނުވި އެވެ.