ލިވަޕޫލުން އެވަޓަން ބަލިކޮށް ލީގާ ގާތަށް ޖެހިލައިފި
އިންގްލިޝް ޕްރިމިއާ ލީގުގައި ތާވަލުގެ އެއްވަނައިގައި އުޅޭ ލިވަޕޫލާއި ވާދަވެރި އެވަޓަން ބައްދަލުކުރި މެޗު ކާމިޔާބުކޮށް ލީގު ކާމިޔާބު ކުރުމާ ލިވަޕޫލް އެއްފިޔަވަޅު ގާތަށް ޖެހިލައިފިއެވެ. ލިވަޕޫލްގެ ދަނޑުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ އެއް ލަނޑު ސުން ލަނޑުންނެވެ. އާންމުކޮށް ވަރަށް ވާދަވެރި އެހާމެ ގަދަފަދަ ކުޅުމެއް އަބަދުވެސް ފެނިގެންދާ މާސީސައިޑް ޑަބީގެ ނަމުން މަޝްހޫރުވެފައިވާ މި ކުރިމަތިލުން ވެސް ދިޔައީ އެހާމެ ވާދަވެރި ކޮށެވެ. މިމެޗުގައި ގިނައިރު ބޯޅަ ގެންގުޅެ ލިވަޕޫލުން މޮޅަށް ކުޅުނު ނަމަވެސް އެވަޓަންއިން ވެސް ވަނީ ވަރަށް ރަނގަޅަށް ޑިފެންޑްކޮށް ލިބޭ ފުރުސަތު ތަކުގައި ހަމަލާ އުފެއްދޭތޯ މަސައްކަތް ކޮށްފައެވެ. މިމެޗުގެ 11ވަނަ މިނެޓުގަައި ލިވަޕޫލްގެ އެލެކްސިސް މެކްއެލިސްޓާއަށް އެވަޓަންގެ ކެޕްޓަން ޖޭމްސް ޓާކޯސްކީ ކުރި ނުރައްކާތެރި ފައުލާ ގުޅިގެން އޭނާއަށް ރަތް ކާޑެއް ދައްކާނެ ކަމަށް ހީވިނަމަވެސް ރެފްރީ ދެއްކީ ރީނދޫ ކާޑެކެވެ. އަދި ވީއޭއާރުން ވެސް އެހާދިސާ ބެލުމަށްފަހު އިތުރު ފިޔަވަޅެއް އަޅަން ޖެހޭކަމަށް ރެފްރީއަށް ލަފާދީފައެއް ނުވެއެވެ. މިމެޗުގެ ފުރަތަމަ ހާފު ނިމިގެންދިޔައީ ދެޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވިއެވެ. މިމެޗުގައި ލިވަޕޫލުން ކާމިޔާބުކުރި ހަމައެކަނި ލަނޑު މެޗުގެ 57ވަނަ މިނެޓުގައި ކާމިޔާބު ކޮށްދީފައި ވަނީ ޑިއޮގޯ ޖޮޓާއެވެ. މިލަނޑު ޖެހުމަށް ފުރުސަތު ތަނަވަސްކޮށްދިން ލުއިސް ޑިއާޒް ހުރީ އޮފް ސައިޑް ޕޮޒިޝަނެއްގައިކަމަށް ބުނެ އެވަޓަންއިން މައްސަލަ ޖެއްސި ނަމަވެސް ވީއޭއާރުން ބެލުމަށްފަހު އެލަނޑު ވަނީ ބަލައިގެންފައެވެ. މިމެޗުގައި އެވަޓަންއަށް ލަނޑެއް ނުޖެހި އަދި ލިވަޕޫލްގެ ގޯލަށް އަމާޒުކޮށް ހަމަލާއެއް ފޮނުވާލެވުނުކަމަށް ނުބެލެވުނު ނަމަވެސް އެވަޓަންގެ ފޯވަޑް ބޭޓޯވަނީ ނުރައްކާތެރި ދެ ހަމަލާއެއް އުފައްދާ ލިވަޕޫލްގެ ޑިފެންސް ހާސްކޮށްލައިފައެވެ. މިގޮތުން ފުރަތަމަ ހަމަލާ ލިވަޕުލްގެ ގޯލަށް ވައްދާލި ނަމަވެސް އެލަނޑު ވަނީ އޮފް ސައިޑް ކަމަށް ދައްކާފައެވެ. އަދި ދެވަނަ ހަމަލާ އަމާޒުވީ ލިވަޕޫލްގެ ގޯލުގެ ދަނޑިއަށެވެ. މިކާމިޔާބީ އާއެކު ލިވަޕޫލް މިހާރުވަނީ 30 މެޗުން ލިބިފައިވާ 73 ޕޮއިންޓާއެކު ތަވަލުގެ އެއްވަނައިގައެވެ. އަދި ބާކީ ލިބެން ޖެހޭ 24 ޕޮއިންޓްގެ ތެރެއިން 13 ޕޮއިންޓް ހޯދައިގެން ލިވަޕޫލަށް 20ވަނަ ފަހަރަށް ޕްރިމިއާ ލިގުގެ ތަށި އުފުލާލުމުގެ ފުރުސަތު ލިބިގެންދާނެއެވެ. ދެވަނައިގައި އުޅޭ އާސެނަލް އާއި ދެމެދު 12 ޕޮއިންޓްގެ ފަރަގެއް ހުރުމުން މިކަން އެޓީމަށް ނުވާނެ ސަބަބެއް ނެތް ކަމަށް ގިނަ ބަޔަކު ގަބޫލު ކުރެއެވެ. މިމެޗުން ބަލިވުމުން އެވަޓަން މިހާރު އުޅެނީ 34 ޕޮއިންޓާއެކު ތާވަލްގެ 15 ވަނައިގައެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ
އެންމެފަހުން އަޕްޑޭޓްކުރީ