ހުޅުމާލޭގައި 10 ބުރީގެ ޒަކާތު ހައުސް އިމާރާތެއް މި އަހަރު ތެރޭގައި އަޅަން ފެށުމަށް ނިންމައިފިއެވެ. މި އިމާރާތަކީ ބައިތުއްޒަކާތުގެ ނަމުގައި އެޅުމަށް ހަމަޖެހިފައިވާ އިމާރާތެއްކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވަނީ ހާމަކުރައްވާފައެވެ.
މި އިމާރާތަކީ ޒަކާތު ފަންޑުގެ ފުރަތަމަ އިންވެސްޓްމަންޓްގެ ގޮތުގައި އިމާރާތްކުރެވޭ ތަނެއް ކަމަށްވާއިރު، މި އިމާރާތުގައި ޒަކާތުގެ އިދާރާގެ އިތުރުން އޮފީސް ބައިތަކެއް ހިމެނޭނެއެވެ. އަދި މި އޮފީސް ބައިތައް ކުއްޔަށް ދޫކޮށްގެން ލިބޭ އާމްދަނީ ޒަކާތުގެ ޙައްޤުވެރިންނަށް ބެހިގެންދާނެ ކަމަށް އިސްލާމިކް މިނިސްޓްރީން ވަނީ ބުނެފައެވެ.
ދިވެހިރާއްޖޭގައި ޒަކާތުގެ ހަރުދަނާ ނިޒާމެއް ޤާއިމުކުރުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދުތަކުގެ ތެރޭގައި ހިމެނޭ މުހިންމު ވަޢުދެއްގެ ގޮތުގައި ފާހަގަކުރެވެއެވެ. މިގޮތުން 2023 ވަނަ އަހަރުގެ ޑިސެންބަރު 18 ވަނަ ދުވަހު ވަނީ ޒަކާތު ހައުސް އުފައްދަވާފައެވެ.
2024 ވަނަ އަހަރަކީ ރާއްޖޭގެ ތާރީޚުގައި އެންމެ ގިނަ އަދަދަކަށް މުދަލު ޒަކާތް ލިބުނު އަހަރު ކަމަށްވާއިރު، 101 މިލިއަން ރުފިޔާއަށް ވުރެ ގިނަ ފައިސާ ވަނީ ޒަކާތު ފަންޑަށް ލިބިފައެވެ. 
މި އިމާރާތުގެ މަސައްކަތް ފެށުމާއެކު، ޒަކާތުގެ ފައިސާ އިތުރަށް އިންވެސްޓްކޮށް، އޭގެ މަންފާ ޒަކާތުގެ ޙައްޤުވެރިންނަށް ފޯރުކޮށްދިނުމަށް އިތުރު ފުރުސަތުތަކެއް ހުޅުވިގެންދާނެ ކަމަށް ބެލެވެއެވެ.