ސެޕްޓެންބަރު 9 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބަށް ކުރިމަތިލުމަށް ޝަރުތު ހަމަވެފައިވާ ފަރާތްތަކުގެ ނަންތައް ތަރުތީބުކުރުން މާދަމާ ހަވީރު ބޭއްވުމަށް އިލެކްޝަންސް ކޮމިޝަނުން ނިންމައިފިއެެވެ.
އިލެކްޝަންސް ކޮމިޝަނުން ބުނީ، ކެންޑިޑޭޓުންގެ ނަން ތަރުތީބުކުރުން މާދަމާ 16:30 ގައި އިންތިޚާބާބެހޭ މަރުކަޒު، ދަރުބާރުގެ، ރަންނަބަނޑޭރި މާލަމުގައި އޮންނާނެކަމަށެެވެ.
އެހެންކަމުން އިންތިޚާބުގައި ވާދަކުރައްވާ ކެންޑިޑޭޓުން ކަނޑައެޅިފައިވާ ގަޑިއަށް ގުރުއަތުނަގާ ތަނަށް ވަޑައިގެންދެއްވުން އީސީން ވަނީ އެދިފައެވެ. ކެންޑިޑޭޓަށް ހާޒިރުވެވެން ނެތްނަމަ، ކެންޑިޑޭޓުގެ ބަދަލުގައި ވަޑައިގަންނަވާ ބޭފުޅެއް ބަޔާންކޮށް، ކެންޑިޑޭޓުގެ ސިޓީއެއް އެކޮމިޝަނަށް ހުށަހެޅުމަށްވެސް އީސީން އެދިފައިވެއެވެ.
އެހެންނަމަވެސް، ކެންޑިޑޭޓް ނުވަތަ ބަދަލުގައި ބޭފުޅަކު ހާޒިރުނުވާނަމަ، ކެންޑިޑޭޓުގެ ބަދަލުގައި ގުރުއަތު ނަގާނީ އިލެކްޝަންސް ކޮމިޝަނުގެ ފަރާތުންނެވެ.
މިފަހަރުގެ އިންތިޚާބުގައި ވާދަކުރަން ނަން ހުށައެޅުމުގެ ވަހުތު ހަމަވިއިރު އަށް ބޭފުޅުން ކެންޑިޑަސީ ހުށައަޅާފައިވާއިރު، މި އަށް ބޭފުޅުންގެ ކެންޑިޑެސީ ފޯމު އީސީން ވަނީ ބަލައިގެންފައެވެ.
އިންތިހާބުގައި ވާދަކުރައްވަނީ އެމްޑީޕީގެ ފަރާތުން އެޕާޓީގެ އިސްލީޑަރު އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ޕީއެންސީގެ ފަރާތުން އެޕާޓީގެ މެމްބަރު އަދި މާލޭ ސިޓީގެ މޭޔަރ ޑރ. މުޙައްމަދު މުއިއްޒު، އެމްއެންޕީގެ ފަރާތުން އެޕާޓީގެ ރައީސް ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު މުހައްމަދު ނާޒިމު، ދަ ޑިމޮކްރެޓްސް ފަރާތުން އެޕާޓީގެ މެމްބަރު އަދި ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބު، ޖުމްހޫރީ ޕާޓީގެ ފަރާތުން އެޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރު ގާސިމް އިބްރާހީމްގެ އިތުރުން އަމިއްލަ ގޮތުން ވާދަކުރައްވާ ކުރީގެ ހޯމް މިނިސްޓަރު އުމަރު ނަސީރު، އަމިއްލަ ގޮތުން ވާދަކުރައްވާ ފާރިސް މައުމޫން އަދި އަމިއްލަ ގޮތުން ވާދަކުރައްވާ ޙަސަން ޒަމީލްއެވެ.