ދެމަފިރިންގެ މެދުގައި މައްސަލަތައް ގިނަވެ ޙައްލު ނުކުރެވި ގިނަ ދުވަސްވާނަމަ އެކުގައި އުޅެން ބޭނުންވިޔަސް އެއީ ކުރަން ފަސޭހަކަމަކަށް ނުވާނެއެވެ! ޚާއްޞަކޮށް ބައިވެރިޔާއަކީ ދޮގުވެރި މަކަރުވެރިއެއްނަމަ ވަކިން ބޮޑަށް އުނދަގޫވާނެއެވެ. އަދި ބައިވެރިޔާއަކީ ތިމާދެކެ ލޯބިނުވާ، އަނިޔާވެރިވާ އަދި ރަޙުމް ނުކުރާ މީހަކުނަމަ އިތުރަށް އުނދަގޫވާނެއެވެ. 
މިޙާލަތުގައިވެސް ބައެއް މީހުންނަށް ބައިވެރިޔާއާއި ވަކިވާން އުނދަގޫވެއެވެ. ލޯބިވެވޭވަރުންނެވެ. އަދި ވަކިވުމަށްފަހުގައިވެސް ދުރުގައި ނުހެރެވުމުގެ މައްސަލަތައް ކުރިމަތިވެއެވެ. ހަމަ ލޯބިވެވޭ ވަރުންނެވެ. 
ބުނަންހެއްޔެވެ؟ ކޮންމެ މީހަކުވެސް އެންމެ ބޮޑަށް ލޯބިވާންޖެހޭނީ އެމީހެއްގެ އަމިއްލަ ނަފްސް ދެކެއެވެ. އަމިއްލަ ނަފްސްދެކެ ލޯބިވެވޭނަމަ މިބުނި ޙާލަތުގައި ބަލަންޖެހޭނީ ދިރިއުޅެވޭނެ އެހެން މަގެއް ހޯދުމަށެވެ. އެކަމަށް ބޭނުންވާ ހިތްވަރު ދެއްވެވުން އެދިގެން މިފަދައިން ދުޢާކުރާށެވެ! 
"ޔާ ﷲ! މިއަޅާއަށް ދޮގުހަދައި މަކަރުވެރިވެ، އަނިޔާވެރިވާ މީހުންނާއި ވަކިވުމުގެ ހިތްވަރު މިއަޅާއަށް ދެއްވަވާނދޭވެ! އަދި ވަކިވުމަށްފަހު ފަސްއެނބުރި ބަލާނުލައި ކުރިއަށްދިއުމުގެ ޘާބިތުކަންވެސް މިއަޅާއަށް ދެއްވަވާނދޭވެ! 
ޔާ ﷲ! އުފާވެރިކަން ލިބުން ވަނީ ހަމައެކަނި އިނބަ ﷲ ގެ ޙަޟްރަތުންނެވެ. އިނބަ ﷲ މިންވަރުކުރެއްވެވުމުންނެވެ. ޔާ ﷲ! މިއަޅާއަށް އުފާވެރި ދިރިއުޅުމެއް ދެއްވަވާނދޭވެ!" އާމީން  
 
- އިސްލާމީ ތިލަފަތުގެ ދަރުސަކުން