ރަޝިއާގެ ރައީސް ލެޑިމިއަ ޕުޓިން އާއި ސީރިއާގެ ރައީސް އަހުމަދު އަލް-ޝަރާޢު މޮސްކޯގައި ބައްދަލުކުރައްވައި، ސީރިއާގައި ހުރި ރަޝިއާގެ އަސްކަރީ މަރުކަޒުތައް ދެމެހެއްޓުމާ ގުޅޭގޮތުން މުހިއްމު މަޝްވަރާތަކެއް ބާއްވައިފިއެވެ. މިއީ ބައްޝާރުލް އަސަދުގެ ވެރިކަން ވައްޓާލުމަށްފަހު، އަލް-ޝަރާޢު ރަޝިއާއަށް ކުރެއްވި ދެވަނަ ދަތުރެވެ.
ބުދަ ދުވަހު ބޭއްވި މި ބައްދަލުވުމުގެ ކުރިން ބޭއްވި ނޫސްވެރިންގެ ބައްދަލުވުމުގައި، ރައީސް އަލް-ޝަރާޢު ވަނީ ސީރިއާގެ އެއްބައިވަންތަކަމާއި ސަރަހައްދީ ހަމަޖެހުމަށް ރަޝިއާ އިން އަދާކުރާ ދައުރަށް ޝުކުރު އަދާކުރައްވާފައެވެ.
ޕުޓިން ވަނީ ސީރިއާގެ ހަމަޖެއްސުމަށް އަލް-ޝަރާޢު ކުރައްވާ މަސައްކަތްޕުޅަށް ތައުރީފު ކުރައްވައި، ރަޝިއާގެ ތާއީދު އޮތްކަން ހާމަކުރައްވާފައެވެ.
މި މަޝްވަރާތަކުގެ މައިގަނޑު ބޭނުމަކީ ސީރިއާގެ އައްސޭރިފަށުގައި ހުރި ރަޝިއާގެ ދެ އަސްކަރީ މަރުކަޒު ކަމަށްވާ "ހުމައިމީމް އެއާބޭސް" އާއި "ތަރްތޫސް ނޭވަލް ބޭސް" މުސްތަގުބަލުގައި ކުރިއަށް ގެންދިޔުން ކަށަވަރު ކުރުމެވެ.
މި ދެ މަރުކަޒަކީ ކުރީގެ ސޯވިއެޓް ޔޫނިއަންގެ ސަރަޙައްދުން ބޭރުގައި ރަޝިއާއަށް މިހާރު އޮތް ހަމައެކަނި އަސްކަރީ މަރުކަޒުތަކެވެ. މި ބައްދަލުވުމުގެ ކުރިން، ރަޝިއާ އިން ވަނީ ސީރިއާގެ އިރުއުތުރުގައި އޮތް ޤާމިޝްލީ އެއާޕޯޓުން އެ ގައުމުގެ ސިފައިން ބާލުވާފައެވެ.
ރަޝިއާއާއެކު ގާތް ގުޅުމެއް ބާއްވަވަމުން ގެންދަވާއިރު، އަނެއްކޮޅުން އެމެރިކާގެ ޓްރަމްޕް ސަރުކާރާއެކު ސްޓްރެޓީޖިކް ގުޅުމެއް ބިނާކުރުމަށްވެސް ރަޝިއާގެ އާ ރައީސް ގެންދަވަނީ މަސައްކަތް ކުރައްވަމުންނެވެ.