ޗެމްޕިއަންސް ލީގުގެ ލީގު ބުރުގެ ފަހު 18 މެޗު އެއްފަހަރާ ރޭ ކުޅުނު އިރު ބެންފީކާ އާއި ރެއާލް މެޑްރިޑްގެ މެޗު ނިމުނީ އަޖައިބު ކުރުވަނިވި ގޮތަކަށެވެ. މެޗު އެއްވަރުކޮށްގެން ވެސް ލީގުގެ ގަދަ އަށެއްގެ ތެރޭގައި ހިމެނެން އޮތް ރެއާލް 4-2 އިން ބަލިވީ އެވެ. އެންމެ ހައިރާންކުރުވަނިވި ކަމަކީ އިތުރު ވަގުތުގައި ލިބުނު ހިލޭ ޖެހުމެއްގައި ބެންފީކާގެ ކީޕަރު އެނަޓޮލީ ޓްރޫބިން ބޮލުން ޖަހައި ވައްދާލި ލަނޑެވެ.
ރެއާލްގެ ކުރީގެ ކޯޗު ހޯސޭ މޮރީނިޔާ މިހާރު ކޯޗުކޮށްދެމުން އަންނަ ބެންފީކާއަށް މި ބޮޑު މޮޅު ނުލިބުނު ނަމަ ޕްލޭ-އޮފް ސްޓޭޖަށް ވެސް ނުގޮސް ކެޓީހެވެ. މެޗު އެއްވަރުވި ނަމަވެސް ބެންފީކާ ވެއްޓުނީހީ 32 ވަނަ އަށެވެ. ނަމަވެސް ރެއާލް ބަލިކޮށް ލިބުނު ތިން ޕޮއިންޓާ އެކު ޕްލޭ-އޮފްގެ ފަހު ޖާގަ މިހާރު އެ އޮތީ ކަށަވަރުވެފަ އެވެ.
ރޭގެ މެޗަށް ނުކުތް އިރު 15 ޕޮއިންޓްގައި އޮތް ރެއާލްއަށް އެންމެ ޕޮއިންޓެއް ލިބުނު ނަމަ ތާވަލްގެ އަށްވަނައަށް އެރީހެވެ. އޭރުން ނުވަ ވަނައަށް ވެއްޓޭނީ މެންޗެސްޓާ ސިޓީ އެވެ.
ޗެމްޕިއަންސް ލީގު މިހާރު ރޭވިފައި އޮންނަ ގޮތުން 36 ޓީމު ކުޅޭނީ ލީގު އުސޫލުން އެއްބުރެވެ. މި ބުރުގައި އެންމެ ގިނަ ޕޮއިންޓް ހޯދާ އަށް ޓީމަށް ގަދަ 16 ނުވަތަ ނޮކްއައުޓް ބުރުން ޖާގަ ކަށަވަރުވާނެ އެވެ. ތާވަލްގެ ނުވަވަަނައިން ފެށިގެން 24 ވަނާގައި އޮންނަ 16 ޓީމު ޕްލޭ-އޮފް ދެ މެޗު ކުޅޭނެ އެވެ. ގަދަ 16ގެ އަނެއް އަށް ޖާގަ ލިބޭނީ ޕްލޭ-އޮފްއިން މޮޅުވާ އަށް ޓީމަށެވެ.
ރޭގެ މެޗުގައި ރެއާލް ބަލިވީ 30 ވަނަ މިނިޓްގައި ކީލިއަން އެމްބާޕޭ ލަނޑު ޖަހައި ލީޑު ވެސް ނަގާފައި އޮއްވަ އެވެ. އޭގެ ފަހުން ބެންފީކާއިން ތިން ލަނޑު ކާމިޔާބުކުރި އެވެ. ރެއާލްގެ ދެވަނަ ލަނޑު އައީ ވެސް، 58 ވަނަ މިނިޓްގައި، އެމްބާޕޭގެ ފަރާތުންނެވެ. 
މެޗުގެ އިތުރު ވަގުތުގައި ރެއާލްގެ ރޮޑްރިގޯ އާއި ރައުލް އަސެންސިއޯއަށް ރަތް ކާޑު ވެސް ދެއްކި އެވެ.
ލީގު ބުރު ނިމުނު އިރު އަށް މެޗު ވެސް ކާމިޔާބުކޮށް ތާވަލްގެ އެއްވަނަ ހޯދީ އާސެނަލް އެވެ. ރޭ އާސެނަލްގެ ދަނޑުގައި 3-2 އިން ބަލިކުރީ ކައިރަޓް އަލްމަޓީ އެވެ.
އާސެނަލް، ކުޅުނު 8، ޕޮއިންޓް 24
ބަޔާން މިޔުނިކް، ކުޅުނު 8، ޕޮއިންޓް 21
ލިވަޕޫލް، ކުޅުނު 8، ޕޮއިންޓް 18
ޓޮޓެންހަމް، ކުޅުނު 8، ޕޮއިންޓް 17
ބާސެލޯނާ، ކުޅުނު 8، ޕޮއިންޓް 16
ޗެލްސީ، ކުޅުނު 8، ޕޮއިންޓް 16
ސްޕޯޓިން، ކުޅުނު 8، ޕޮއިނޓް 16
މެންޗެސްޓަ ސިޓީ، ކުޅުނު 8، ޕޮއިންޓް 16
ރެއާލް މެޑްރިޑް
އިންޓަ މިލާން
ޕީއެސްޖީ
ނިއުކާސަލް
ޔުއެންޓަސް
އެތުލެޓިކޯ މެޑްރިޑް
އެޓަލަންޓާ
ބަޔާން ލެވަކޫސަން
ބްރޫޝިއާ ޑޯޓްމުންޑް
އޮލިމްޕިއަކޯސް
ކްލަބް ބްރުގޭ
ގަލަތަސަރޭ
މޮނާކޯ
ގަރަބަޖް އެފްކޭ
ބޯޑޯ/ގްލިމްޓް
ބެންފީކާ