މިދިޔަ އަހަރު ޔަޝް ރާޖް ފިލްމްސް (ވައިއާރުއެފް)އިން ގެނެސްދިން ފިލްމު "ސައްޔާރާ"އިން ބޮޑު މަގުބޫލުކަމެއް ހޯދި ޒުވާން އެކްޓަރު އަހާން ޕާންޑޭގެ ކެރިއަރުގެ ދެވަނަ ފިލްމު ސިނަމާތަކަށް ގެންނަ ތާރީޚު އިއުލާނުކޮށްފިއެވެ. ވައިއާރުއެފްއިން އިއުލާންކޮށްފައިވާ ގޮތުގައި، އަލީ އައްބާސް ޒަފަރު ޑައިރެކްޓްކުރާ އަދި އަދި ވަކި ނަމެއް ދީފައިނުވާ މި ފިލްމު ސިނަމާތަކަށް ގެންނާނީ އަންނަ އަހަރުގެ މާޗް މަހުގެ 26ވަނަ ދުވަހުއެވެ. މި ފިލްމުން އަހާން އާއި ޝަރުވަރީގެ އިތުރުން އައިޝްވާރީ ތާކްރޭ އާއި ބޮބީ ޑިއޯލް ވެސް މުހިއްމު ރޯލްތަކުން ފެންނާނެއެވެ. މިއީ 'މެރޭ ބްރަދަ ކީ ދުލްހަން'، 'ގުންޑޭ'، 'ސުލްތާން' އަދި 'ޓައިގާ ޒިންދާ ހޭ'އަށް ފަހު ޒަފަރު ވައިއާރުއެފްއާ އެކު މަސައްކަތްކުރާ ފަސްވަނަ ފިލްމެވެ. މިއީ ރޮމޭންޓިކް އެކްޝަން ޑްރާމާއަކާ އެކު އޭނާ އަލުން އެ ޕްރޮޑަކްޝަން ހައުސްއާ ގުޅުނު ފިލްމުވެސް މެއެވެ. އަހާން ޑައިރެކްޓަރު އަލީ އައްބާސް ޒަފަރުއާ އެކު--ފޮޓޯ/ޓެލެގްރާފްއިންޑިއާ މިދިޔަ އޭޕްރީލް މަހު އަހާން ވަނީ ފިލްމުގެ މަސައްކަތް ފެށުމުގެ ގޮތުން ސެޓުގައި ނަގާފައިވާ ބައެއް ފޮޓޯތައް ސޯޝަލް މީޑިއާގައި ހިއްސާކޮށްފައެވެ. ނަމަވެސް ފިލްމުގެ ވާހަކަ އާއި އިތުރު ތަފްސީލުތައް އަދި ވަނީ ސިއްރުކުރެވިފައެވެ. އަލީގެ ފިލްމުގެ ނިންމައިލުމަށްފަހު އަހާން އަނެއްކާވެސް ތައްޔާރުވާނީ ފިލްމު "ސައްޔާރާ"ގެ ޑައިރެކްޓަރު މޯހިތު ސޫރީ އުފައްދާ އިތުރު ފިލްމަކަށެވެ. ނަން އަދި ހާމަނުކުރާ މި ފިލްމުގެ ބަތަލާ އަކީ "ސައްޔާރާ"އިން އަހާންއާ އެކު ބޮޑު މަޝްހޫރުކަމެއް ލިބުނު އަނީތު ޕައްޑާއެވެ. އަދި އެ ފިލްމު އުފައްދަނީ ވެސް ވައިއާރްއެފުންނެވެ.