ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ، އަންނަ އަހަރަށް ލަފާކުރާ ދައުލަތުގެ ބަޖެޓް ކަމުނުގޮސްގެން އުޅެނީ ރައީސް އިބްރާހިމް މުހަންމަދު ސާލިހް ވެރިކަމުން ވައްޓާނުލެވިގެން އެކަމާ އުޅޭމީހުން ކަމަށް، ޖުމްހޫރީ ޕާޓީގެ ލީޑަރ އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ގާސިމް އިބްރާހިމް ވިދާޅުވެއްޖެއެވެ.
ޖުމްހޫރީ ޕާޓީއަށް ނިސްބަތްވެވަޑައި ގަންނަވާ ޕޮލިޓިކަލް އެޕޮއިންޓީސް ތިއްބަވާ ވަޓްސްއަޕް ގްރޫޕެއްގައި ގާސިމް އިބްރާހިމް ޕޯސްޓްކުރެއްވި މެސެޖެއްގައި ވިދާޅުވެފައިވަނީ، ސަރުކާރުން މިހާރު ހުށަހަޅާފައިވާ ބަޖެޓަކީ ވަރަށް ރަނގަޅު ބަޖެޓެއް ކަމަށެވެ.
އެހެންޏާވެސް ބަޖެޓު ފާސްކުރަނީ ދަރަނިކޮށް ކަމަށް ގާސިމް ވިދާޅުވެފައި ވެއެވެ.
ގާސިމް އިބްރާހިމްވަނީ، ބަޖެޓާ ގުޅޭގޮތުން މިހާރު އުފެދިފައިވާ ޝަކުވާތަކަށް ހައްލު ހޯދޭނޭ ގޮތްތަކާ ގުޅޭގޮތުން މެސެޖްގައި ޚިޔާލު ފާޅުކުރައްވާފައެވެ.
ގާސިމް އިބްރާހިމް ވިދާޅުވީ، ރައްޔިތުންގެ މަޖިލީހުން ބަޖެޓް ތާށިކުރީމާ މުޅި ގައުމާއި، ރައްޔިތުން ޖެހޭނީ ބަނޑަށް ކަމަށާއި، މަޖިލީހުން ކުރަންއުޅޭ ކަމަކީ އެއީ ކަމަށާއި، އެހެން ހެދިގެން ނުވާނެ ކަމަށެވެ.
ގާސިމް ވިދާޅުވީ، މަޖިލީހުން ކުރަންވީ ކަމަކީ، ބޭރުން ނަގާފައިވާ ދަރަނި ދެއްކުމަށް އިތުރު މުއްދަތު ހޯދުމަށް ސަރުކާރުން ކުރާ މަސައްކަތަށް ފުރިހަމައަށް އެހީތެރިވުން ކަމަށެވެ. ލޯނުތައް ދެއްކުމުގެ މުއްދަތު އިތުރު ނުވެގެން ލިބޭ ގެއްލުން ތަހައްމަލް ކުރަންޖެހޭނީ މުޅި ރައްޔިތުން ކަމަށްވެސް ގާސިމް ވިދާޅުވިއެވެ.
ގާސިމް އިބްރާހިމް ވަނީ، ބަޖެޓު ފާސްކޮށްދެއްވައި، ސަރުކާރަށް ހެޔޮހިތުން އެހީތެރިވުމަށް މަޖިލީހަށް ގޮވާލައްވާފައެވެ.
ގާސިމްގެ މެސެޖުގައި ދިވެހި ގައުމަށާއި، ރައްޔިތުންނަށް ކުރިއެރުމާއި، އުފާވެރިކަމާއި ރޯޝަންކަން ދެއްވުންއެދި ދުއާކުރައްވާފައި ވެއެވެ.