މާލޭ ސިޓީގެ ހެންވޭރު އަވަށުގެ ބަޔަކުން މިއަދު ހަވީރު ކަރަންޓް ކެނޑިދާނެ ކަމަށް ސްޓޭޓް އިލެކްޓްރޯނިކް ކޮމްޕެނީ ލިމިޓެޑް (ސްޓެލްކޯ) އިން ބުނެފިއެވެ.
ސްޓެލްކޯ އޮފިޝަލަލަކު މިއަދު ވިދާޅުވީ، ކޮންމެހެން ކުރަންޖެހޭ މަސައްކަތެއް ކުރުމަށްޓަކައި މިއަދު ހަވީރު 4:00 އިން ފެށިގެން 5:00 އާ ދެމެދުގެ ވަގުތުތަކުގައި މާލޭގެ ބައެއް ސަރަހައްދުތަކުން ކަރަންޓް ކެނޑިދާނެ ކަމަށެވެ.
ކަރަންޓް ކެނޑޭނީ ހެންވޭރުގެ ރޯޝަނީ މަގާއި، ރޯޝަނީ ގޯޅީގެ އިތުރުން ކަސްތޫރި މަގާއި، ކާނި ގޯޅިއާއި، ސޯސަންމަގު ހިމެނޭ ސަރަހައްދުންނެވެ.
ގްރޭޓާ މާލޭ ސަރަހައްދުގެ ކަރަންޓްގެ ހިދުމަތް އިތުރަށް ރަނގަޅުކޮށް ހަރުދަނާކުރުމަށް ސަރުކާރުގެ ކަރަންޓް ކުންފުންޏެއް ކަމަށްވާ ސްޓެލްކޯ އިން ދަނީ މަސައްކަތްތަކެއް ކުރަމުންނެވެ.
އެގޮތުން މިހާރު ވަނީ މާލެ ސަރަހައްދުގެ ކަރަންޓް، އެއް ވިއުގައަކުން ގުޅާލައި ހިދުމަތް ދޭން ފަށާފައެވެ.
އެ ކުންފުނީގެ ހިންގުން ވަރަށް ހަރުދަނާވެފައި ވަނިކޮށް ކުންފުނީގެ އެމްޑީ ވަނީ މިފަހުން ބަދަލުކޮށްފައެވެ. އެ ކުންފުނީގެ އެމްޑީ ކަމުގައި ހުންނެވި ހަސަން މުޣްނީގެ ބަދަލުގައި އީސީގެ ކުރީގެ ރައީސް އަހުމަދު ޝަރީފް ވަނީ އެ މަގާމަށް ހަމަޖައްސާފައެވެ.
މި ބަދަލު ގެނައި ސަބަބެއް މިހާތަނަށް އައިއިރު ސަރުކާރުން ހާމަކޮށްފައި ނުވެއެވެ.