ޣައްޒާ-އިސްރާއީލު ވަކިކުރާ އިމުގައި އިސްރާއީލުގެ އުދުވާނީ ސިފައިން ބަޑިޖަހައި ފަލަސްތީނުގެ 28 މީހުން ޝަހީދުކޮށްލައިފިއެވެ.
އިސްރާއީލުގެ އުދުވާނީ ސިފައިން ފަލަސްތީނު އާންމުންގެ ގަޔަށް ބަޑިޖަހާފައިވަނީ، އިސްރާއީލުގައި ހުންނަ އެމެރިކާ އެމްބަސީ ގުދުސްއަށް މިއަދު ބަދަލުކުރުމާ ދިމާކޮށް އެކަމާ ނުރުހުން ފާޅުކޮށް ފަލަސްތީނުގެ އާންމުން ސަރަހައްދީ އިމަށް ޖަމާވެ އިހުތިޖާޖު ކުރަމުން ދަނިކޮށެވެ.
މިއަދުގެ ކުރިމަތިލުމަށް ފަލަސްތީނުގެ އެތައްހާސް އާންމުން އެ ސަރަހައްދަށް ޖަމާވެ، ޓައިރު އަންދައި، ބައެއް މީހުން ކަށިނަރުތައް ކޮށާލައި އިސްރާއީލުގެ ތެރެއަށް ވަންނަން މަސައްކަތް ކުރަމުން ދިޔައިރު، އިސްރާއީލުގެ އުދުވާނީ ސިފައިން ވަނީ އަސްލު ވަޒަން ބޭނުންކޮށްގެން ފަލަސްތީނު މީހުންގެ ގަޔަށް ބަޑިޖަހާފައެވެ.
ބަޑިޖެހުމުގެ ސަބަބުން ފަލަސްތީނުގެ 28 މީހުން ޝަހީދުވެފައިވާ ކަމަށް ހަމާސްއިން ޣައްޒާގައި ހިންގާ ހެލްތު މިނިސްޓްރީން ކަށަވަރު ކޮށްދީފައި ވެއެވެ. ނަމަވެސް ޒަޚަމްވި މީހުންގެ އަދަދު އަދި ހާމަކޮށްފައެއް ނުވެއެވެ.
މިއީ، 2014 ވަނަ އަހަރު އިސްރާއީލާއި ހަމާސްއާ ދެމެދު ހިނގި ހަނގުރާމައިގެފަހުން، އެއްދުވަހެއްގައި ފަލަސްތީނުގެ މިހާގިނަ މީހުން ޝަހީދުކޮށްލި ފުރަތަމަ ފަހަރެވެ.