ސެޕްޓެމްބަރު 7 ގައި ބާއްވާ ރިޔާސީ އިންތިޚާބު ކަވަރުކުރާ "ހަވީރު"ގެ ޚާއްސަ ޓީމުގައި ވޮލަންޓިއަރުން ބައިވެރިވުމުގެ ފުރުސަތު މުޅި ރާއްޖެ އަށް ހުޅުވާލައިފި އެވެ.
"ހަވީރު" ގެ އިސް އޮފިޝަލަކު ވިދާޅުވި ގޮތުގައި ރާއްޖޭގެ ކޮންމެ ރަށަކުން ވެސް "ހަވީރު"ގެ މި ޓީމާ ބައިވެރިވެގެން އިންތިޚާބުގެ މައުލޫމާތު ވަގުތުން ވަގުތަށް، ރައްޔިތުންނަށް ފޯރުކޮށްދެވިދާނެ އެވެ.
"މިއީ ވޮލަންޓްރީކޮށް ހަވީރުގެ ޓީމާ އެކު މަސައްކަތްކުރުމަށް ހުޅުވާލެވޭ ފުރުސަތެއް،" އޮފިޝަލް ވިދާޅުވި އެވެ. "ރާއްޖެ އެންމެ ބޮޑު އަދި އެންމެ ގިނަ ދުވަސް ވީ ނޫހަކީ ހަވީރު. އަދި ރާއްޖޭގެ އެންމެ މަގްބޫލް ވެބްސައިޓަކީ ހަވީރު އޮންލައިން. އެހެންވީމާ މި ދެ ބައި އެކުވެގެން އުފެދޭ ވަރުގަދަ ޓީމްގައި ބައިވެރިވުމުގެ ފުރުސަތު ލިބުމަކީ އަޅުގަނޑު ދެކޭ ގޮތުގައި އާންމުންނަށް ވެސް ލިބޭނެ ވަރަށް ބޮޑު އުފަލެއް."
"ހަވީރު"ގެ ރިޔާސީ އިންތިޚާބު ކަވަރޭޖް ޓީމްގައި ބައިވެރިވާން ބޭނުންވާ ފަރާތްތަކުން ކުރު ފޯމެއް ފުރިހަމަކުރަން ޖެހެ އެވެ. މި ފޯމް "ހަވީރު އޮންލައިން" މެދުވެރިކޮށް ފުރުމަށް ފަހު ހުށަހެޅޭ ގޮތަށް މިހާރު ވަނީ އާއްމުކޮށްފަ އެވެ.
ރިޔާސީ އިންތިޚާބުގެ ހުރިހާ ކަމެއް ކިޔުންތެރިންނަށް ގެނެސްދިނުމަށްޓަކައި "ހަވީރު" ނޫހާއި "ހަވީރު އޮންލައިނު"ން ވަނީ ޚާއްސަ މަސައްކަތްތަކެއް ފަށާފަ އެވެ.
"ހަވީރު"ގެ އޮފިޝަލް ވިދާޅުވި ގޮތުގައި ކެމްޕެއިނާއި ވޯޓު ލުމާއި ނަތީޖާތަކާ ގުޅޭ ފުރިހަމަ މައުލޫމާތު ވަގުތުން ވަގުތަށް ފޯރުކޮށްދެމުން ދާނެ އެވެ.
"އަޅުގަނޑުމެން ރާވާފައި މިއޮތީ މައުލޫމާތު މުއްސަނދިކޮށް، ވަގުތުން ވަގުތަށް އަޕްޑޭޓްތައް ގެނެސްދޭ ކަވަރޭޖެއް. އަޅުގަނޑުމެންގެ ނޫސްވެރިންނާއި ވޮލަންޓިއަރުން ރާއްޖޭގެ ހުރިހާ ދިމާލެއްގައި ހަރަކާތްތެރިވަމުންދާނެ އިރާދަކުރެއްވިޔާ،" އޮފިޝަލް ވިދާޅުވި އެވެ.