ކުރީގެ ރައީސް މުހަންމަދު ނަޝީދުގެ ވެރިކަން "ވައްޓާލުމަށް" އަބަދުވެސް ސައްލާ ކުރައްވާ ކަމަށް ޕީޕީއެމްގެ އިންތިގާލީ ނާއިބު ރައީސް އުމަރު ނަސީރު މިރޭ ވިދާޅުވެއްޖެ އެވެ. " 2008 ގެ ނޮވެމްބަރު 12 ވަނަ ދުވަހުން ފެށިގެން އަޅުގަނޑުމެން ގެންދިޔައީ ސައްލާ ކުރަމުން އެ ސަރުކާރު ވައްޓާލެވޭނެ ގޮތެއް ހޯދުމަށް. ވާހަކަ ދައްކަން ޖެހުނު ކޮންމެ މީހަކާއެކު އެ ވާހަކަ ދެއްކިން. ޕޯޑިއަމްތަކުގައި ދެއްކިން. މީޑިއާތަކުގައި އެ ވާހަކަތައް ވާނީ ދައްކާފައި. އެކަމަކު އެކަންކުރަން އަޅުގަނޑުމެން އުޅުނީ ގާނޫނު އަސާސީ އާއި ގާނޫނީ އިމުގެ ތެރެއިން. މުހަންމަދު ނަޝީދުގެ ވެރިކަން ބަދަލުކުރަން ބޭނުންވީ ގާނޫނީ އިމުގެ ތެރެއިން. އެކަން އެންމެ ފަހުން މިކުރީ ވެސް ގާނޫނީ އިމުގެ ތެރެއިން،" ނަޝީދުގެ ވެރިކަން ބަދަލުވިގޮތާ ގުޅޭ ގޮތުން އެ މަނިކުފާނުގެ ސަރުކާރުގެ ހައުސިން މިނިސްޓަރު މުހަންމަދު އަސްލަމާއި ގައުމީ ސަލާމަތާއި ބެހޭ މުޝީރު އަމީން ފައިސަލް ތައްޔާރު ކުރެއްވި ރިޕޯޓަށް ރައްދު ދެއްވައި އުމަރު ވިދާޅުވި އެވެ. ނަޝީދު މިއަދު ނެރެދެއްވި އެ ރިޕޯޓުގައިވާ ގޮތުން އެ މަނިކުފާނުގެ ވެރިކަން ވައްޓާލުމުގެ މަސައްކަތް ފަށާފައި ވަނީ ޕީޕީއެމްގެ ކައުންސިލް މެމްބަރު އަދި އުމަރާ އެންމެ ގާތްކޮށް އުޅުއްވާ މާޒް އަހުމަދު ސަލީމްގެ އެޕާޓްމަންޓުގައި ކުރި މަޝްވަރާ އިންނެވެ. އަދި އެ ސައްލާ ކޮށްފައި ވަނީ މިދިޔަ އަހަރުގެ ސެޕްޓެމްބަރު މަހު ކަމަށް ރިޕޯޓުގައިވެ އެވެ. މަޝްވަރާތަކުގައި ބައިވެރިވި ކަމަށް އޭގައި ވަނީ އެމްއެންޑީއެފުން ވަކިވެފައިވާ ވޮރަންޓް އޮފިސަރު ގްރޭޑް 1 އަދި ރިޓަޔާޑް ބްރިގޭޑިއާ ޖެނެރަލަކާއި ރިޓަޔާޑް ޑެޕިއުޓީ ޕޮލިސް ކޮމިޝަނަރެކެވެ. އުމަރު ވިދާޅުވީ ނަޝީދުގެ ސަރުކާރުގެ އެންމެ ބޮޑު މައްސަލައަކަށްވީ ސިފައިންނާއި ފުލުހުންގެ މައްޗަށް ޣައިރު ގާނޫނީ އަމުރުކުރުން ކަމަށާއި އޭރުގެ އިދިކޮޅު ފަރާތްތަކުން ދެމުން ދިޔައީ އެއަށް ތަބާނުވުމުގެ މެސެޖު ކަމަށެވެ. "ފުލުހުން ލައްވައި ސުޕްރީމް ކޯޓުގައި ތަޅު އެޅުވިއިރު ވެސް އަޅުގަނޑު ބުނިން ތިއީ ޣައިރު ގާނޫނީ އަމުރެކޭ. ޔާމީނާއި ގާސިމް ހައްޔަރުކުރީ ޣައިރު ގާނޫނީ އަމުރެއްގެ ދަށުންނޭ ބުނިން. އަބްދުﷲ ގާޒީ ހައްޔަރުކުރީ ވެސް ޣައިރު ގާނޫނީ އަމުރެއްގެ ދަށުންނޭ ބުނިން. ޣައިރު ގާނޫނީ އަމުރަށް ތަބާނުވުމުގެ ހައްގު ގާނޫނު އަސާސީން ސިފައިންނާއި ފުލުހުންނަށް ލިބޭ. އެއީ ފެހި ގާނޫނު އަސާސީން ލިބިދިން މުޅިން އާ ހައްގެއް،" މިވަގުތު ސިންގަޕޫރުގައި ހުންނެި އުމަރު ވިދާޅުވި އެވެ. "އަޅުގަނޑުމެން ކުރި ކަމަކީ އެ ހައްގު އޮތްކަން ބުނެދިނުން. ގޯޅިގޯޅި ކަންމަތީގައި ވެސް ކުރި ކަމަކީ އެއީ. ޖެހުނު ކޮންމެ ތަނަކު ދެއްކީ އެ ވާހަކަ." ރިޕޯޓުގައިވާ ބުނެފައިވާ ގޮތުން 23 ޑިސެމްބަރު އިއްތިހާދުން ބޭއްވި ބޮޑު މުޒާހަރާގައި ވެސް ބައިވެރިންނާއެކު ސަރުކާރު ވައްޓާލަން އުމަރު މަގުމައްޗަށް ނުކުތުމަށް މަސައްކަތް ކުރި ކަމުގެ މައުލޫމާތު ވަނީ ލިބިފަ އެވެ. އެހެން ނަމަވެސް އެކަން ކާމިޔާބުނުވުމުން ދެން ރޭވީ "މަހާސިންތާ" ނަމުގައި އެހެން އެއްވުމެއް ބާއްވާ ނަޝީދުގެ ވެރިކަން ނިމުމަކަށް ގެނައުން ކަމަށް ރިޕޯޓުގައި ވަނީ ތުހުމަތުކޮށްފަ އެވެ. އެ ތުހުމަތުތަކާ ގުޅޭ ގޮތުން "ހަވީރު" ން ސުވާލު ކުރުމުން އުމަރު އެއަށް އިންކާރެއް ނުކުރައްވަ އެވެ. އޭނާ ވިދާޅުވީ 23 ޑިސެމްބަރު އިއްތިހާދުން ބޭއްވި ބޮޑު މުޒާހަރާގައި ސަރުކާރު ވައްޓާލަން މަގުމައްޗަށް ނުކުންނަވަން އުޅުއްވި ކަމަށެވެ. "އެކަމަކު އޭރު ބައެއް ބޭފުޅުން ބޭނުން ނުވީމާ އެކަން ނުވީ. އެކަމަކު އެރޭ ވެސް މުހަންމަދު ނަޝީދުގެ ވެރިކަން ވައްޓާލާނީ އަޑު އުފުލައިގެން ގާނޫނީ އިމުގެ ތެރެއިން،" އުމަރު ވިދާޅުވި އެވެ.