ފުލުހުންގެ ތެރެއިން އެއްވެސް ފޮޓޯއެއް ލީކުވެފައި ނުވާ ކަމަށް ދިވެހި ފުލުހުންގެ ޚިދުމަތުން ބުނެފިއެވެ.
މާލޭގެ ގެއެއްގެ ތެރޭގައި ރަހުމުކުޑަ ގޮތަކަށް މަރާލާފައި އޮއްވައި ފެނުނު ޝިއާއު މުހައްމަދު ސައީދު (ޝިއާ)ގެ ފޮޓޯތައް ފުލުހުން ލީކްކޮށްލައިފި ކަމަށް ބުނެ މިއަދު ބައެއް މީޑިއާތަކުން ވަނީ ރިޕޯޓްކޮށްފައެވެ.
މިކަމާއި ގުޅިގެން ފުލުހުންގެ މީޑިއާ އޮފިޝަލް މީޑިއާތަކަށް ފޮނުއްވި މެސެޖެއްގައި ވިދާޅުވީ، ފުލުހުންގެ ތެރެއިން އެއްވެސް ފޮޓޯއެއް ލީކުވެފައިވާކަން އެނގިފައި ނުވާ ކަމަށެވެ. އަދި އެފަދަ ކަމެއް ހިނގާފައިވޭތޯ އެ މުވައްސަސާ އިން އިތުރަށް ބަލާނެ ކަމަށް ވެސް އޮފިޝަލް ވިދާޅުވިއެވެ.
ރާއްޖޭގެ ބައެއް މީޑިއާތަކުން މިއަދު ރިޕޯޓްކޮށްފައިވާ ގޮތުގައި ޝިއާއުގެ ފޮޓޯ ލީކް ކޮށްލާފައި ވަނީ ފުލުހުންގެ ތެރެއިންނެވެ. ރިޕޯޓްތައް ބުނާ ގޮތުން ފޮޓޯތައް ލީކްކޮށްލާފައި ވަނީ ރޭގެ ވަގުތެއްގައެވެ. އަދި ޖުމުލަ ތިން ފޮޓޯއެއް ވަނީ ލީކް ކޮށްލާފައެވެ.
ރަހުމްކުޑަ ގޮތަކަށް މަރާލާފައި އޮއްވާ ފެނުނު ޝިއާއުގެ ޖަނާޒާ މިދިޔަ އާދީއްތަ ދުވަހުގެ ރޭ ވަނީ ބާއްވާފައެވެ. މި މަހުގެ 11 ވަނަ ދުވަހު ޕޯސްޓު މޯޓަމް ހެދުމަށް ޝިއާއުގެ ހަށިގަނޑު ރާއްޖެއިން ބޭރަށް ފޮނުވުމަށްފަހު 13 ވަނަ ދުވަހުގެ ރޭގެ ވަގުތެއްގައި ވަނީ ރާއްޖެ ގެނެސްފައެވެ.
މިކަމާ ގުޅޭގޮތުން، ފުލުހުން ބުނީ، ޕޯސްޓް މޯޓަމްގެ ނަތީޖާ ލިބޭނެ ސީދާ ތާރީހެއް ބުނަން އަދި ދަތިކަމަށެވެ. އަދި މި މައްސަލައާ ގުޅޭ އިތުރު މައުލޫމާތު ފަހުން ހާމަކުރާނެކަމަށްވެސް ފުލުހުން ވަނީ ބުނެފައެވެ.
ޝިއާއުގެ ޖަނާޒާ، ބާއްވާފައި ވަނީ އޭނާގެ އުފަން ރަށް ފުވައްމުލައް ސިޓީގައެވެ.
ޝިއާއު މަރާލާފައިވަނީ ވަރަށް އިހާނެތިކޮށް ނަމަވެސް، އޭނާއަށް ލިބިފައިވާ އަނިޔާތަކުގެ އެއްވެސް މައުލޫމާތެއް ފުލުހުން ހާމަކޮށްފައެއް ނުވެއެވެ. ފުލުހުން ބުނީ ޝިއާގެ އައިލާއިން އެގޮތަށް އެދިފައިވާ ކަމަށާއި، އާއިލާގެ އެދުމަށް އިހްތިރާމް ކުރުމުގެ ގޮތުން އެ މައުލޫމާތު ހާމަކުރުމަށް ގަސްތު ނުކުރާ ކަމަށެވެ.
އެހެންނަމަވެސް ފުލުހުން ވަނީ ޝިއާއުއަށް ބޮޑެތި ޒަހަމްތަކެއް ލިބިފައިވާކަން ކަށަވަރުކޮށްދީފައެވެ.
ޝިއާއު މަރާލިކަމުގެ ތުހުމަތުގައި ކުށުގެ ވެށިން ފުލުހުން ވަނީ ޒުވާނަކު ހައްޔަރުކޮށްފައެވެ. މި މައްސަލައިގައި ހައްޔަރުކޮށްފައިވަނީ، ފ. ނިލަންދޫ ފިނިފެންމާގޭ އަލީ ޝާޙިލްއެވެ. ޝިއާއު މަރާލާފައި އޮއްވާ ފެނިފައިވަނީ ޝާހިލް ދިރިއުޅޭ އެޕާޓްމަންޓުންނެވެ.
ޝާހިލް ޝަރީއަތް ނިމެންދެން ބަންދުކުރަން ކްރިމިނަލް ކޯޓުން އަމުރު ނެރެފައިވާއިރު، އޭނާގެ ބަންދާ މެދު ގޮތެއް ނިންމުމަށް ބޭއްވި އަޑުއެހުން ވަނީ ސިއްރުކޮށްފައެވެ. ޝާހިލުގެ ބަންދާ ގުޅޭ ގޮތުން ގޮތެއް ނިންމަން އޮތް އަޑުއެހުން ސިއްރުކުރަން ގާޟީ ނިންމަވާފައިވާ ކަމަށާއި، ގާޟީ އެފަދައިން ނިންމަވާފައިވަނީ ފުލުހުންގެ އެދުމުގެ މަތީން ކަމަށް ކޯޓުން ވަނީ ބުނެފައެވެ.