މިނިސްޓްރީތަކުގައި މަސައްކަތް ކުރާނެ ސިސްޓަމެއް ނެތް، ކަމަށާއި ސިސްޓަމް ހުރިއްޔާ ސޮފްޓްވެއަރ އެއް ނެތް ކަމަށް ބުނެ ޝަކުވާތައް ވައިބަރ ގްރޫޕް ތަކުގައި ސިޔާސީ މުއައްޒަފުން ކުރަން ފަށައިފިއެވެ. މޭޒެއް، ގޮނޑިއެއް، އިންޓަރނެޓެއް، ކަރަންޓް ނަގާނެ ގޮތެއް ނެތް ކަމަށް ކޮށްފައިވާ މެސެޖެއްގައި ވެއެވެ. ދައުލަތުގެ ވަސީލަތް ނެތް ވަރަށް 4000 ސިޔާސީ މުއައްޒަފުން ނަގައި، ރާއްޖޭގެ ބަޖެޓުން ބޮޑު އަދަދެއް އެބަޔަކަށް އިސްރާފު ކުރަމުންދާ ފަރާތްތަކުގެ ޝަކުވާ އިން ސާފުވާ ކަމަކީ އެމީހުންގެ ފަރާތުން ސަރުކާރު ހިންގުމަށް އެއްވެސް އެހީ އެއް ނެތް ކަމެވެ. ސޯޝަލް މީޑިޔާއަސް ލީކް ވެފައިވާ ވައިބަރ ގްރޫޕްތަކުގެ ޗެޓްތަކަކީ މިނިސްޓްރީ އޮތް ޔޫތުގެ ވައިބަރ ގްރޫޕެއްގެ ޗެޓް ލޮގްތަކެވެ. ޔޫތް އެންޑް ސްޕޯޓް އޮއްވައި، މި މިނިސްޓްރީ ދެ މިނިސްޓްރީ އަކަށް ހެދީ މުއިއްޒު ވެރިކަމަށް އައުމަށް ފަހުއެވެ. މިއީ ކޮށްފައިވާ ބޭކާރު ޚަރަދެކެވެ.
ދައުލަތަށް ޚިދުމަތް ކުރުމުގެ އެއްވެސް ދައުރެއް ނެތް ބަޔަކަށް ރައްޔިތުންގެ ޓެކްސް ފައިސާ އިން މާލީ ބޮޑު ބުރައެއް ޖެހިފައި މިވަނީ މުއިއްޒުގެ ނުކުޅެދުންތެރި ސަރުކާރު ހިފެހެއްޓުމަށް ކުރެވޭނެ އިތުރު ކަމެއް ނެތުމުގެ ސަބަބުންނެވެ.
ސިޔާސީ މަގާމުތައް މަދު ކުރާނެ ކަމަށް ބުނި ނަމަވެސް، ދަނީ އިތުރު ކުރަމުންނެވެ. 78 ސިޔާސީ މުއައްޒަފުން މިވަގުތު ޔޫތް މިނިސްޓްރީގެ އަކަނިވެސް ތިބި ކަމަށް ލީކުވި ވައިބަރ މެސެޖްތަކުން ހާމަ ވެއެވެ. ނަމަވެސް ދިވެހިންގެ ގިނަ ބަޔަކު ގަބޫލު ކުރާ ގޮތުގައި މިނިސްޓަރގެ އިތުރަށް، 1 ސްޓޭޓް މިނިސްޓަރ އާއި، 2 ޑެޕިއުޓީ މިނިސްޓަރުން ފިޔަވައި އިތުރަށް ދީފައިވާ ސިޔާސީ މަގާމުތަކަކީ މިވަގުތު ރާއްޖޭގެ އިޤްތިޞާދީ ހާލަތު ހުރި ގޮތުން އައްޔަން ކުރުން އެކަށީގެންވާ ބައެއް ނޫނެވެ.
ލީކް ވެފައިވާ ސްކްރީންޝޮޓެއް
މިއީ އެންމެ މިނިސްޓްރީއެއްގެ ޝަކުވާ އެވެ. ބެލެވޭ ގޮތުގައި ބައެއް މިނިސްޓްރީ ތަކުގެ ސިޔާސީ މަގާމުތަކުގައި ތިބި ފަރާތްތަކުގެ އަދަދު 100 އަށް ވުރެވެސް އިތުރެވެ. އަދި ބައެއް ކުންފުނިތަކުގައި ތިބި ސިޔާސީ ފަރާތްތައް 300 އާއި 500 އާއި ދެމެދު އަދަދަކަށް އަރާފައިވާ އިރު، ދާދި ފަހުން ލީކްވި އެހެން ވައިބަރ މެސެޖްތަކުން، ސާފުވާ ގޮތުން، އެމްޕީއެލް އަށް ނަގާފައިވާ ސިޔާސީ ފަރާތްތައް އޮފީހަށް ހާޒިރު ނުވެއެވެ. އެމީހުން އެޓެންޑަންސް ނަގަމުން ދަނީ ވައިބަރ ގްރޫޕް ތަކުގައި “present” ޖަހައިގެންނެވެ.
ސިޔާސީ މުއައްޒަފުންނަކީ މުއިއްޒުގެ މަތިބަރު ސަރުކާރު ހިފެހެއްޓުމަށް ޖަހާ މަރުފައްޔެވެ.