ދިވެހި ރާއްޖޭގެ ތައުލީމަށް ހިދުމަތް ކުރުމުގެ އެންމެ މަތިވެރި ޝަރަފު އިސްލާމީ ޔުނިވަސިޓީގެ ޗާންސެލާ އަދި ނިޝާން އިއްޒުއްދީނުގެ އިއްޒަތުގެ ވެރިޔާ މުހައްމަދު ޒާހިރު ހުސައިނަށް އަރުވައިފިއެވެ.
މި ޝަރަފު ޒާހިރަށް އަރުވާފައި ވަނީ މިރޭ ދަރުބާރުގޭގައި ކުރިއަށްދިޔަ ޖުމްހޫރީ ދުވަހުގެ ރަސްމީ ޖަލްސާގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ. މިއީ ތައުލީމީ ރޮނގުން ރާއްޖޭގެ ރައްޔިތުން ހޭލުންތެރިކުރެއްވުމަށް އިހުލާސްތެރިކަމާއެކު ޒާހިރު ކުރެއްވި ގިނަ ހިދުމަތްތަކުގެ އަގުވަޒަންކުރުމުގެ ގޮތުން އެރުއްވި ޝަރަފެކެވެ.
މިއީ މި ރޮނގުން ޝަރަފުގެ އައްޑަނަޔާއި ޝަރަފުގެ މެޑެއްޔެއް އެރުވި ފުރަތަމަ ބޭފުޅާކަން ފާހަގަކޮށްލެވެއެވެ.
ޑރ. މުހައްމަދު ޒާހިރު ހުސައިނު، މިސްރުގެ އަލްއަޒްހަރު ޔުނިވާސިޓީއިން މަތީ ތައުލީމު ފުރިހަމަ ކުރެއްވުމަށްފަހު ރާއްޖެއަށް ވަޑައިގެން، އެންމެ ފުރަތަމަ ހިދުމަތް ފެއްޓެވީ، އަމީނިއްޔާ ސްކޫލްގައެވެ. އެއަށްފަހު ތައުލީމީ ދާއިރާގެ އެކި މަގާމުތައް ފުރުއްވައި، މިނިސްޓާ އޮފް އެޑިޔުކޭޝަންގެ މަގާމުވެސް އެމަނިކުފާނު ފުރުއްވިއެވެ.
އަދި އެ މަގާމުގައި ހުންނަވައިގެން ތައުލީމީ ދާއިރާގެ ކުރިއެރުމަށް ގިނަގުނަ މަސައްކަތްތަކެއް ޒާހިރު ވަނީ ކޮށްދެއްވާފައެވެ. އެގޮތުން ސައިންސް އެޑިޔުކޭޝަން ސެންޓަރު 1979ވަނަ އަހަރު ހުޅުވީ އެ މަނިކުފާނުގެ މޭސްތިރިކަމުގެ ދަށުންނެވެ. މީގެއިތުރުން، ޒަމާނާ އެކަށޭނަ އަދި ދިވެހިވަންތަ ނިޒާމަކަށް ކިޔަވައިދެވޭނެ ގޮތަކަށް، ރާއްޖޭގެ ތައުލީމީ މުގައްރަރަށްވެސް އެކިފަހަރު މަތިން އިސްލާހީ ހެޔޮ ބަދަލުތަކެއް ޑރ. ޒާހިރު ގެނެސްދެއްވިއެވެ. އެގޮތުން އެމަނިކުފާނު ހުންނަވައިގެން ހިންގެވި އެންމެބޮޑު އަނެއް މަޝްރޫއަކީ، އަސާސީ ތައުލީމުގެ މަޝްރޫއެވެ.
ހަމައެހެންމެ ރާއްޖޭގެ ތައުލީމީ ވަޒީރުކަން 10 އަހަރާއި 9 މަހަށްވުރެ ދިގު މުއްދަތެއްގައި ކުރެއްވުމަށްފަހު، ދެން އެ މަނިކުފާނު އައްޔަން ކުރެއްވީ، ރައީސުލްޖުމްހޫރިއްޔާގެ އޮފީހުގެ މިނިސްޓަރެއްގެ މަގާމަށެވެ. އެއަށްފަހު، މިނިސްޓާ އޮފް ޔޫތު އެންޑް ސްޕޯޓްސްގެ މަގާމާއި، މިނިސްޓާ އޮފް ޔޫތު ޑިވެލޮޕްމަންޓް އެންޑް ސްޕޯޓްސްގެ މަގާމުވެސް ޑރ. މުހައްމަދު ޒާހިރު ފުރުއްވިއެވެ.
ރާއްޖޭގެ ދުސްތޫރީ ނިޒާމު ހަރުދަނާ ކުރެއްވުމުގައި ރައްޔިތުންގެ މަޖިލީހުގައި ރައީސުލްޖުމްހޫރިއްޔާގެ މެންބަރެއްގެ ހައިސިއްޔަތުންވެސް އެ މަނިކުފާނު ވަނީ ހިދުމަތް ކުރައްވާފައެވެ.
އަދި، ކީރިތި ގުރްއާން ދިވެހިބަހަށް ތަރުޖަމާކުރާ ކޮމިޓީގައިވެސް ދިގު މުއްދަތެއްގައި އެމަނިކުފާނު ހިދުމަތް ކުރެއްވިއެވެ. މީގެއިތުރުން ހުކުރު ހުތުބާ ލިޔުއްވުމާއި، މާލޭގައި ހުކުރު ނަމާދާއި އީދުނަމާދު އިމާމުވެ ކުރައްވައި އަދި ރައީސުލްޖުމްހޫރިއްޔާގެ އޮފީހުން ނެރުއްވި "ދީނުގެ މަގު" ނޫހަށް އެކި މައުޟޫއުތަކަށް މަޒުމޫނުތައްވެސް އެމަނިކުފާނު ލިޔުއްވިއެވެ.
އަދި 1989ވަނަ އަހަރު، ނޫސްވެރިކަމުގެ ރޮނގުން އާންމު ހިދުމަތުގެ ޝަރަފުވެރިކަމުގެ އިނާމު، އަދި 1990ވަނަ އަހަރު، މިނިވަން 25ގެ އާންމު ހިދުމަތުގެ އިނާމު، ޑރ. މުޙައްމަދު ޒާހިރަށް ވަނީ އަރުވާފައެވެ. ނޫސްވެރިކަމުގެ "އަލިމަސް ގަލަން" ވެސް އެމަނިކުފާނަށް ވަނީ ލިބިވަޑައިގެންފައެވެ.
ނއއވ ޑރ. މުހައްމަދު ޒާހިރު ހުސައިން ޕީއެޗްޑީ ހާސިލުކުރެއްވީ، ތިއޯލޮޖީ އެންޑް ފިލޯސޮފީގެ ރޮނގުން، 2001 ވަނަ އަހަރު މެލޭޝިއާއިންނެވެ. ޕީއެޗްޑީ ހާސިލުކުރެއްވުމާ ގުޅިގެން، ސަރުކާރުން ދެއްވާ ހާއްސަ އިނާމު، އެ އަހަރު އެ މަނިކުފާނަށް ވަނީ ލިބިވަޑައިގެންފައެވެ. ނިޝާން އިއްޒުއްދީންގެ އިއްޒަތުގެ ލަގަބު، އެ މަނިކުފާނަށް 10 ނޮވެންބަރު 2008 ގައި އަރުވާފައިވާއިރު 2019 ވަނަ އަހަރުން ފެށިގެން މިހާރު ފުރުއްވަމުން ގެންދަވަނީ އިސްލާމީ ޔުނިވަރސިޓީގެ ޗާންސެލާ ކަމުގެ މަގާމެވެ.
ޑރ. މުހައްމަދު ޒާހިރު ހުސައިން، ދިވެހި ދައުލަތަށް ހިދުމަތް ކުރައްވަމުން ގެންދަވާތާ މިހާރު 48 އަހަރުވެއްޖެއެވެ. އަދި ތައުލީމީ ދާއިރާގައި އެމަނިކުފާނު ހިދުމަތް ކުރައްވަމުން ގެންދަވާތާ މިހާރު 32 އަހަރަށްވުރެ ގިނަ ދުވަސް ވެއްޖެއެވެ.