މިދިޔަ އަހަރު ދުނިޔޭގެ މަޝްހޫރު ޑިކްޝަނަރީތަކުން ހޮވި "އަހަރުގެ ބަސް" ތަކުން ނުވަތަ މަގުބުލު ލަފުޒުތަކުން ފެނިގެންދިޔައީ ޓެކްނޮލޮޖީއާއި އާޓިފިޝަލް އިންޓެލިޖެންސްގެ ސަބަބުން އިންސާނުންގެ ދިރިއުޅުމަށާއި ބަސްމަގަށް އައިސްފައިވާ ބޮޑެތި ބަދަލުތަކެވެ. މި ބަސްތަކުން ހާމަކޮށްދެނީ ޑިޖިޓަލައިޒޭޝަންގެ ސަބަބުން އުފެދިފައިވާ ނުރަނގަޅު އާދަތަކާއި، އިޖުތިމާއީ އަދި ނަފްސާނީ ގޮތުން މުޖުތަމައަށް ކުރިމަތިވަމުންދާ ގޮންޖެހުންތަކެވެ. މިއީ ހަމައެކަނި ބަސްމަގަށް އައި ބަދަލެއް ނޫން ކަމަށާއި، މިއީ އަދުގެ ޑިޖިޓަލް ދުނިޔޭގެ ހަގީގީ ސޫރަ ކަމަށް މާހިރުން ފާހަގަކުރެއެވެ. ވޭތުވެދިޔަ އަހަރުތަކަށް ބަލާއިރު، މަގުބޫލު ބަސްތައް ހޮވުމުގެ އާދަ "އިމޯޖީ" ނުވަތަ "ސެލްފީ" ފަދަ އާދައިގެ ޓެކްނޮލޮޖީ ބަސްތަކުން ފެށުނު ނަމަވެސް، ފަހަކަށް އައިސް މި މިސްރާބު ވަނީ ބަދަލުވެފައެވެ. މިހާރު ހޮވާ ބަސްތަކުން ބޮޑަށް ބަލަނީ "ޕޯސްޓް-ޓްރޫތް"، "ގޭސްލައިޓިން" އަދި "ބްރެއިން ރޮޓް" ފަދަ، އިންސާނުންގެ ވިސްނުމާއި އަޚްލާގަށް ކުރާ ފުން އަސަރުތައް ބަޔާންކޮށްދޭ ބަސްތަކަށެވެ. މިއަހަރުގެ ބަސްތަކުންވެސް ފެނިގެންދިޔައީ މި ނޭދެވޭ މިސްރާބު އިތުރަށް ވަރުގަދަވަމުންދާ ތަނެވެ. އޮކްސްފޯޑް ޔުނިވާސިޓީ ޕްރެސްއިން 2025 ވަނަ އަހަރުގެ ބަހަކަށް ހޮވި "ރޭޖް ބެއިޓް" އަކީ ސޯޝަލް މީޑިއާގައި މީހުން ރުޅިއަރުވާލައި، ނަފުރަތު އުފައްދައިގެން ގިނަ ބައެއްގެ ސަމާލުކަން ހޯދުމަށް ގަސްތުގައި ފަތުރާ ކޮންޓެންޓެވެ. އިންޓަނެޓް ބޭނުންކުރާ މީހުންގެ މެދުގައި ރުޅިވެރިކަން އުފައްދައިގެން ފައިދާ ހޯދުމުގެ ސަގާފަތް އިތުރުވެފައިވާ މިންވަރު މި ބަހުން ހާމަވެއެވެ. މިއީ މުޖުތަމައުގެ އެއްބައިވަންތަކަމަށް އޮތް ބޮޑު ނުރައްކަލެއްގެ ގޮތުގައި މާހިރުން ސިފަކުރެއެވެ. މީރިއަމް-ވެބްސްޓާ ޑިކްޝަނަރީއިން މިއަހަރުގެ ބަހަކަށް ހޮވީ "ސްލޮޕް" އެވެ. މިއީ އާޓިފިޝަލް އިންޓެލިޖެންސް ބޭނުންކޮށްގެން އެއްވެސް ފެންވަރެއް ނެތި، ހަމައެކަނި އަދަދު ގިނަކުރުމުގެ ބޭނުމުގައި އުފައްދާފައިވާ ކޮންޓެންޓެވެ. އޭއައި ބޭނުންކޮށްގެން ލިޔެފައިވާ ފެންވަރު ދަށް ފޮތްތަކާއި އިޝްތިހާރުތަކުން އިންޓަނެޓް ފުރިފައިވުމުގެ ސަބަބުން، އިންސާނުންގެ އުފެއްދުންތެރިކަމުގެ އަގު ވެއްޓެމުންދާކަން މި ބަހުން ދޭހަވެއެވެ. ކޭމްބްރިޖް ޑިކްޝަނަރީއިން އިޚްތިޔާރުކުރި "ޕެރަސޯޝަލް" އަކީ އެކަނިވެރި ނުވަތަ އެއްކޮޅު ގުޅުމަކަށް ކިޔާ ނަމެކެވެ. ޑިޖިޓަލް ޒަމާނުގައި އިންސާނުން މަޝްހޫރު މީހުންނާ ނުވަތަ އޭއައި ޗެޓްބޮޓްތަކާ އެކު އަމިއްލަ ނަފްސަށް ހީވާ ހީވުމެއްގެ މައްޗަށް ބިނާކޮށް ގާތް ގުޅުންތައް އުފައްދަމުންދާކަން މިއީ މި ބަހުން ފާހަގަކުރާ މުހިންމު ނުކުތާއެކެވެ. މިއީ އިންސާނުންގެ މެދުގައި އޮންނަންޖެހޭ ހަގީގީ ގުޅުންތަކުގެ ބަދަލުގައި ޚިޔާލީ ދުނިޔެއަކަށް މީހުން ވަންނަމުންދާ ކަމުގެ ހެއްކެކެވެ. ތުރުކީ ބަހުގެ އެކަޑަމީއިން ނެރުނު "ޑިޖިޓަލް ކޮންޝަންސް" ނުވަތަ ޑިޖިޓަލް ޟަމީރަކީ މިއަހަރުގެ އެންމެ ފުން މާނައެއް އެކުލެވޭ އެއް ބަހެވެ. މިއީ އަމަލީ ގޮތުން އެއްވެސް މަސައްކަތެއް ނުކޮށް، ހަމައެކަނި ސޯޝަލް މީޑިއާގައި ޕޯސްޓެއް ޝެއާ ކޮށްލުމުން ނުވަތަ ލައިކެއް ދިނުމުން ތިމާގެ އިންސާނީ ޒިންމާ އަދާކުރެވުނީ ކަމަށް ގަބޫލުކޮށް ހިތްހަމަޖައްސާލާ އާދައެވެ. މި ބަހުން ބޮޑަށް ފާހަގަކޮށްދެނީ އިންސާނީ ހަމްދަރުދީއާއި ކުލުނު ފަދަ އިހުސާސްތައް މަދު ކްލިކްތަކަކަށް ބަދަލުވެފައިވާ މިންވަރެވެ. ޖުމްލަ ގޮތެއްގައި 2025 ވަނަ އަހަރުގެ މި މަގުބޫލު ބަސްތަކަކީ ޑިޖިޓަލް ދުނިޔޭގެ ކަޅު އަނދިރި ފަރާތް ވަރަށް ރަނގަޅަށް ހާމަކޮށްދޭ ބަސްތަކެކެވެ. މި ބަސްތަކުން އިންޒާރު ދެނީ ޓެކްނޮލޮޖީގެ ސަބަބުން އިންސާނުންގެ އަޚްލާގާއި، ވިސްނުމާއި، އަދި އެކަކު އަނެކަކާ އޮންނަ ގުޅުމަށް ކުރިމަތިވެފައިވާ ގޮންޖެހުންތަކެވެ. އިންސާނީ ވަގުތާއި އިހުސާސްތައް ޑިޖިޓަލް އުކުޅުތަކެއްގެ ދަށުވަމުންދާކަން މިއީ މިއަދުގެ ހަގީގަތެވެ.