މެދުއިރުމަތީގައި އިތުރުވަމުންދާ ހަމަނުޖެހުންތައް ހަފުތާތަކަކަށް ދެމިގެންގޮސް، ދުނިޔޭގެ އިގުތިސާދީ ކުރިއެރުމަށް ހުރަސް އެޅި، އިންފްލޭޝަންގެ ނުރައްކާ ބޮޑުވެދާނެކަމުގެ ބިރުވެރިކަމާ އެކު، ތެލުގެ އަގު އުފުލި ދުނިޔޭގެ ހިއްސާގެ ބާޒާރުތަކަށް ބޮޑު ލޮޅުމެއް މިއަދު އަތުވެއްޖެ އެވެ.
އިރާނަށް އަމާޒުކޮށް އެމެރިކާ އާއި އިޒްރޭލުން ދެމުންދާ ހަމަލާތަކާއި، އޭގެ ރައްދުގައި އިރާނުން ދެމުންދާ މިސައިލް ހަމަލާތަކާ ގުޅިގެން ބްރެންޓް ކްރޫޑްގެ އަގު %6.4 މައްޗަށް ގޮސް، ފީފާއެއްގެ އަގު 77.57 ޑޮލަރަށް ވަނީ އުފުލިފަ އެވެ. އަދި އެމެރިކާގެ ސާފުނުކުރާ ތެލުގެ އަގު %6.2 މައްޗަށް ގޮސް ފީފާއެއްގެ އަގު 71.17 ޑޮލަރަށް ވަނީ އަރާފަ އެވެ.
މީގެ އިތުރުން، ރައްކާތެރި އިންވެސްޓްމަންޓެއްގެ ގޮތުގައި ގިނަ ބަޔަކު ރަން ގަންނަން ފެށުމާ އެކު، ރަނުގެ އަގު %1.6 މައްޗަށް ގޮސް އައުންސެއްގެ އަގު 5,360 ޑޮލަރަށް ވަނީ އުފުލިފަ އެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި ގޮތުގައި، މި ހަމަނުޖެހުންތައް ކުރިއަށް އޮތް ހަތަރު ހަފުތާއަށް ދެމިގެން ހިނގައިދާނެ އެވެ. އަދި އެމެރިކާގެ މަގުސަދުތައް ހާސިލުވަންދެން ހަމަލާތައް ކުރިއަށްދާނެ ކަމަށް ވެސް އޭނާ ވިދާޅުވި އެވެ.
މި ހާލަތާ ގުޅިގެން ބާޒާރުތަކުގެ ސަމާލުކަން މިހާރު ހުއްޓިފައިވަނީ ދުނިޔޭގެ ކަނޑުމަގުން އުފުލާ ތެލުގެ ފަސްބައިކުޅަ އެއްބައި ދަތުރުކުރާ ހޯރްމޫޒް ކަނޑުއޮޅިއަށެވެ. ސަލާމަތީ ކަންކަމާއި އިންޝުއަރެންސްގެ ބިރުވެރިކަމާ ހެދި އެ ސަރަހައްދުން ތެޔޮ އުފުލާ ބޯޓުފަހަރު ދަތުރުކުރުން މިހާރު ވަނީ ވަރަށް ބޮޑަށް މަދުވެފަ އެވެ.
ރައިސްޓެޑް އެނާޖީގެ އެނަލިސްޓް ޖޯޖް ލިއޮން ފާހަގަކުރެއްވި ގޮތުގައި، ތެލުގެ ބާޒާރަށް މިވަގުތު ކުރިމަތިވެފައިވާ އެންމެ ބޮޑު ގޮންޖެހުމަކީ ހޯރްމޫޒް ކަނޑުއޮޅިން ދަތުރުފަތުރުކުރުން ހުއްޓުމަކަށް އައުމެވެ. މަސްލަހަތު އަވަހަށް ފިނިނުވެއްޖެ ނަމަ، ތެލުގެ އަގު އިންތިހާއަށް އުފުލިގެން ހިނގައިދާނެ ކަމުގެ އިންޒާރު އޭނާ ދެއްވި އެވެ.
މީގެ އިތުރުން، މި ހާލަތު ދިގުލައިގެން ދިއުމަކީ ދުނިޔޭގެ އެކި ކަންކޮޅުތަކުގައިވާ ވިޔަފާރިތަކަށާއި އާންމު ރައްޔިތުންނަށް ކުރިމަތިވާނެ އިގުތިސާދީ ބުރައެއް ކަމަށް ވެސް މާހިރުން ބުނެ އެވެ.
ދުނިޔޭގެ އެކި ސަރަހައްދުތަކުގެ ހިއްސާގެ ބާޒާރުތަކަށް މިކަމުގެ ނޭދެވޭ އަސަރު ވަނީ ކޮށްފަ އެވެ. އެގޮތުން، ޖަޕާނުގެ ނިކޭ އިންޑެކްސް %1.3 ދަށަށް ގޮސްފައިވާއިރު، އެމެރިކާގެ ހިއްސާގެ ބާޒާރު ވަނީ %1 ދަށަށް ގޮސްފަ އެވެ. އަދި ޔޫރަޕްގެ މާކެޓްތަކުން %1އަށް ވުރެ ބޮޑު ދަށަށްދިއުމެއް ވަނީ ފެނިފަ އެވެ.
މީގެ އިތުރުން، ޔޫއޭއީ އާއި ކުވެއިތުގެ ހިއްސާގެ ބާޒާރުތައް ވަނީ ވަގުތީ ގޮތުން ބަންދުކޮށްފަ އެވެ. އިންވެސްޓަރުން ރައްކާތެރިކަމަށް އިސްކަންދިނުމާ ގުޅިގެން ޑޮލަރުގެ އަގު ވަނީ މައްޗަށް ގޮސްފައެވެ.
އޯޕެކް ޕްލަސް އިން އަންނަ މަހު ތެޔޮ އުފައްދާ މިންވަރު ކުޑަކޮށް އިތުރުކުރުމަށް އެއްބަސްވި ނަމަވެސް، ތެޔޮ ލިބުމަށް ހުރި ހުރަސްތަކުގެ ސަބަބުން ބާޒާރުގެ ނުތަނަވަސްކަން އަދިވެސް އޮތީ ބޮޑުކޮށެވެ.
ކުރިއަށް އޮތް ހަފުތާގައި އެމެރިކާގެ މުހިންމު އިގުތިސާދީ ތަފާސްހިސާބުތައް ހާމަކުރަން ހަމަޖެހިފައިވާއިރު، އިންފްލޭޝަނާއި އިގުތިސާދީ ކުރިއެރުމާ މެދު އޮތް ކަންބޮޑުވުންތަކާ ހެދި ބާޒާރުތަކަށް އަންނަ ލޮޅުންތައް އިތުރުވެގެންދާނެ ކަމަށް ބެލެވެ އެވެ.