ކުރިއަށްއޮތް ލޯކަލް ކައުންސިލް އިންތިހާބުގައި އިލެކްޝަން ކޮމިޝަންގެ އޮފިޝަލުން ބޭނުންކުރާ ބިބްތައް ހެދުމަށް އެކަނިވެސް 4 މިލިއަނަށްވުރެ ގިނަ ރުފިޔާ ހަރަދުވެފައިވާކަމަށް ކޮމިޝަނުގެ ހިސާބުތަކުން ދައްކައިފިއެވެ.
އިލެކްޝަންސް ކޮމިޝަނުން އާއްމުކުރި ޕްރޮކިއުމެންޓް ހިސާބުތަކަށް ބަލާއިރު، ބިބްތައް ތައްޔާރުކުރުމަށް 4,158,000 މިލިއަން ރުފިޔާ ވަނީ ހަރަދުވެފައެވެ. އިލެކްޝަން ކޮމިޝަނުން ކުރިއަށްއޮތް އިންތިހާބަށް ތައްޔާރުވަމުންދާއިރު، މިހާތަނަށް ކުރި ހަރަދުތަކުގެ ތެރެއިން ދެން އެންމެ ފާހަގަކޮށްލެވެނީ، ސްޓޭޝަނަރީ ގަތުމަށްކުރި ހޭދައެވެ.
ސްޓޭޝަނަރީ ޕެކް، ސެކިއުރެޓީ އެންވެލަޕް އަދި އިންޑެލިބަލް މާކަރު ނުވަތަ ފަސޭހައިން ނުފުހެވޭ މާކަރުފަދަ ތަކެތި ގަތުމަށްވަނީ، 2.06 މިލިއަން ރުފިޔާ ހޭދަކޮށްފައެވެ. އިލެކްޝަންސް ކޮމިޝަނުން އޮފިޝަލުންގެ ބިބްތައް ތައްޔާރުކުރުމުގެ އިތުރުން ސްޓޭޝަނަރީ ހޯދާފައިވަނީ ނޮވެލްޓީންނެވެ.
ލޯކަލް ކައުންސިލް އިންތިހާބަށް އެކަނިވެސް 80 މިލިއަން ރުފިޔާ ހޭދަވާނޭކަމަށް އިލެކްޝަންސް ކޮމިޝަނުން ވަނީ ބުނެފައެވެ. ރާއްޖޭގައި ބާއްވާ އިންތިހާބުތަކަށް ބޮޑު ހޭދައެއް ކުރަންޖެހޭކަމަށް މީގެކުރިން އިލެކްޝަނުން ވަނީ ފާހަގަކޮށްފައެވެ. ރައްޔިތުން މަޖިލީހުގެ އިންތިހާބާއި، ލޯކަލް ކައުންސިލް އިންތިހާބު އަދި ރައީސުލްޖުމްހޫރިއްޔާ އިންތިހާބު ކުރުމަށް އިންތިހާބުތައް ވަކިވަކިން ބާއްވަމުން އަންނައިރު، މިއިން ކޮންމެ އިންތިހާބަކަށްވެސް ދައުލަތުގެ ބައިތުލްމާލާއި ރައްޔިތުންގެ ޖީބުންވެސް ބޮޑެތި އަދަދުތަކެއް ހޭދަކުރެއެވެ.
ފަސް އަހަރުތެރޭ އެކި ފަހަރުމަތިން އިންތިހާބުތައް ބާއްވަމުން އަންނައިރު މިކަމަކީ ވަރަށްބޮޑު ތަކްލީފްތަކެއް އުފުލަންޖެހޭ ކަމެއްގެ ގޮތުގައި ގިނަ އަދަދެއްގެ ރައްޔިތުން ފާހަގަކުރެއެވެ. މިފަހުން ބޭއްވިގެންދިޔަ އިންތިހާބުތަކަށް ބަލާއިރު ވޯޓުލާން ނިކުންނަ ރައްޔިތުން ނިސްބަތުން ވަރަށްބޮޑަށް މަދުވަމުން އަންނަކަން ފާަހގަކޮށްލެވެއެވެ.