އާބާދީގެ ގޮތުން އެންމެ ކުޑަ އެއް ރަށް ކަމަށްވާ ވ. ރަކީދޫ ކައުންސިލުގެ އިދާރީ މުވައްޒަފުން އިސްތިއުފާދިނުމާ ގުޅިގެން، އެ ރަށު ކައުންސިލުގެ އިދާރީ ޚިދުމަތްތައް ހުއްޓިފައި އޮންނަ އޮތުން ހައްލުކުރުމަށް ކައުންސިލުތަކުގެ ބެލެނިވެރި އިދާރާ އެލްޖީއޭއާއެކު އަންނަ ހަފުތާގައި މަޝްވަރާކުރާނެ ކަމަށާއި، ރަކީދޫގެ އިތުރުން، އިދާރީ ޚިދުމަތްތައް ހުއްޓިދާނެ ކުދި އެހެނިހެން ރަށްރަށްވެސް އެބަހުރި ކަމަށް، ލޯކަލް ގަވަނަންސް މިނިސްޓަރު އާދަމް ޝަރީފް ޢުމަރު މިރޭ ވިދާޅުވެއްޖެއެވެ. ރަކީދޫ ކައުންސިލުގެ އިދާރީ މުވައްޒަފުން އިސްތިއުފާދިނުމުގެ ސަބަބުން ކައުންސިލުން ފޯރުކޮށްދޭ އިދާރީ ޚިދުމަތްތައް ހުއްޓިފައި އޮންނަތާ ހަފުތާއެއް ވަނީ ވެފައެވެ. އެހެންވެ، އެ ރަށު ރައްޔިތުން އިއްޔެ ނިކުމެ، ކައުންސިލު އިދާރާ ވަނީ ބަންދުކޮށްފައެވެ. https://sun.mv/218604 އެ މައްސަލައާ ގުޅިގެން މިނިސްޓަރު އާދަމް ޝަރީފް މިރޭ 'ސަން'އަށް ވިދާޅުވީ، އާބާދީ ކުދި ރަށްރަށުގައި އިދާރީ މުވައްޒަފުން ހޯދުމަކީ ދަތި ކަމެއް ކަމަށެވެ. އޭގެ ތެރެއިން އެއް ސަބަބެއްގެ ގޮތުގައި މިނިސްޓަރު ފާހަގަކުރެއްވީ ކުދި ބައެއް ރަށްރަށުގެ އާބާދީ މަދުވުމެވެ. ދެވަނަ ސަބަބެއް ކަމަށް ފާހަގަކުރެއްވީ ރަކީދޫ ހިމެނޭހެން އާބާދީ ގޮތުން ކުދި ބައެއް ރަށްރަށުގެ ރައްޔިތުންނަށް އާމްދަނީ ލިބޭނެ ރަނގަޅު ގޮތްތަކެއް މަގުފަހިވެފައި އޮތުމެވެ. ދުނިޔޭގެ ބައެއް ގައުމުތަކުގައި އަމަލުކުރާ ގޮތަށް ބަލާއިރު، އެވެނި ތަނަކުން ވަސީލަތްތަކާއި ޚިދުމަތްތައް ނުލިބޭނަމަ، އެއާ ޖެހިގެން އޮންނަ ތަނަކުން ވަސީލަތްތަކާއި ޚިދުމަތްތައް ދިނުމަށް މީހުން ބޭނުންކުރާ ކަމަށް އާދަމް ޝަރީފް ވިދާޅުވިއެވެ. އޭނާ ވިދާޅުވި ގޮތުގައި މިހާ ހިސާބަށް އައިއިރު އެފަދަ ކަންކަމަށް ގާނޫނީ ފަރުވާ ހޯދިފައި ނުވެއެވެ. "އެހެންވީމާ އަޅުގަނޑުމެން ޖެހޭނީ މިވަގުތަށް އެންމެ ރަނގަޅަށް މިކަން ކުރެވޭނެ ގޮތްތަކެއް ރާވަން މަސައްކަތްކުރަން، އެކަމަށްޓަކައި އަޅުގަނޑުމެން މިއަންނަ ހަފުތާގަ އެލްޖީއޭގެ ބޯޑު މީޓިންއެއް އެބަ ބާއްވަން ކޮބައިތޯ މިއަށް މިވަގުތުން މިވަގުތަށް އެޅޭނެ ފިޔަވަޅަކީ [ބަލަން]،" ޝަރީފް ވިދާޅުވިއެވެ. "ރަކީދޫ ފަދަ ހަމަ އެހެން ރަށްރަށްވެސް އެބަހުރި، ރަކީދޫގަ ދިމާވި ހާލަތަކީ ތަފާތު ހާލަތެއް، މިގޮތަކަށް އަދި ގިނަ ރަށްރަށުގައި ދިމާވެފައެއް ނެތް، އެހެންނަމަވެސް ވ. އަތޮޅުގަ އެބަހުރި އަދިވެސް މިގޮތަށް ދިމާވެދާނެ ރަށްރަށް،"އާދަމް ޝަރީފް ޢުމަރު - ލޯކަލް ގަވަނަންސް މިނިސްޓަރު ވ. އަތޮޅުގެ ބައެއް ރަށްރަށުގެ އިތުރުން އަރިއަތޮޅާއި އެހެނިހެން އަތޮޅުތަކުގެވެސް، އިދާރީ ޚިދުމަތްތައް ހުއްޓިދާނެ ފަދަ އާބާދީ ކުދި ބައެއް ރަށްރަށް އެބަހުރި ކަމަށް ވިދާޅުވެ، އެ މައްސަލައަށް ދާއިމީ ހައްލެއް ހޯދުމަށް މަސައްކަތްކުރަމުން އަންނަ ކަމަށްވެސް ޝަރީފް ވިދާޅުވިއެވެ. އެކަމާ ގުޅިގެން ރަކީދޫ ކައުންސިލުގެ ރައީސް ޢަބްދުالله ރަޝީދު 'ސަން'އަށް އިއްޔެ ވިދާޅުވީ، ކައުންސިލަށް އިދާރީ މުވައްޒަފުން ހޯދަން މަސައްކަތް މިހާރު ކުރަމުންދާ ކަމަށެވެ. އެގޮތުން މުވައްޒަފުން ބޭނުންވާކަން ސިވިލް ސާވިސް ކޮމިޝަން (ސީއެސްސީ)އަށާއި ކައުންސިލުތަކުގެ ބެލެނިވެރި އިދާރާ ލޯކަލް ގަވަމަންޓް އޮތޯރިޓީ (އެލްޖީއޭ)އަށްވެސް އެކަން އަންގާފައިވާނެ ކަމަށް އޭނާ ވިދާޅުވިއެވެ. https://sun.mv/218614 ނަމަވެސް ކައުންސިލްތަކުގެ ދައުރު ނިމެން އަހަރެއް ވުމުން، އެލްޖީއޭއާއި ފިނޭންސް މިނިސްޓްރީގެ ހުއްދަލިބިގެން ނޫނީ ކައުންސިލުތަކަށް މުވައްޒަފުން ނުނެގޭ ގޮތަށް ލާމަރުކަޒީ ގާނޫނަށް ގެނައި ބަދަލުގެ ސަބަބުން އިދާރީ މުވައްޒަފުން ނެގުން އޮތީ ހުއްޓިފައިކަން އޭނާ ފާހަގަކުރެއްވިއެވެ. އަދި ސީއެސްސީން ވެސް، އެލްޖީއޭއިން ވެސް އެ ހުއްދަ ނުލިބޭ ކަމަށް، ޢަބްދުالله ވިދާޅުވިއެވެ. އެކަމާ ގުޅިގެން އިއްޔެ މިނިސްޓަރު 'އެކްސް'ގައި ކުރެއްވި ޕޯސްޓެއްގައި ވަނީ، ފަތުރުވެރިކަމާއި އެނޫންވެސް އިގުތިޞާދީ ފުރުސަތުތައް ފަހިވެފައިވާ ކުދި ރަށްރަށުގެ ކައުންސިލު އިދާރާތަކުގައި މަސައްކަތް ކުރާނެ އިދާރީ މުވައްޒަފުން ނުލިބުމުގެ މައްސަލަ އިތުރުވަމުން އަންނަ ކަމަށާއި، އެ މައްސަލަ ހައްލުކުރުމަށް މަސައްކަތްކުރަމުން އަންނަ ކަމަށެވެ.