ސަރުކާރުގެ ލޯނުގައި ބޭރު ގައުމުތަކުގައި މަތީ ތައުލީމު ހާސިލްކުރަމުން އަންނަ ދިވެހި ދަރިވަރުންނަށް ކުރާ ޚަރަދު، އަހަރުން އަހަރަށް ދަށްވަމުން އައިއިރު، މިދިޔަ އަހަރުގެ ފުރަތަމަ ދެ މަހަށްވުރެ މިއަހަރު 28 އިންސައްތަ ދަށްވެއްޖެއެވެ. ފިނޭންސް މިނިސްޓްރީން މިއަދު އާންމުކުރި ތަފާސްހިސާބުތަކުން ދައްކާ ގޮތުގައި މިދިޔަ ފެބްރުވަރީ މަހުގެ 27ވަނަ ދުވަހުގެ ނިޔަލަށް 79.1 މިލިއަން ރުފިޔާވަނީ ޚަރަދުކޮށްފައެވެ. އެއީ ދަރިވަރުންގެ ލޯނަށް ޚަރަދުކުރުމަށް މިއަހަރުގެ ބަޖެޓުން ކަނޑައަޅާފައިވާ އަދަދު ކަމަށްވާ 776.6 މިލިއަން ރުފިޔާގެ 10.2 އިންސައްތައެވެ. އެކަމަކު މިދިޔަ އަހަރުގެ މި މުއްދަތުގައި ސަރުކާރުން ވަނީ ސަރުކާރުގެ ލޯނު ސްކީމްގައި މަތީ ތައުލީމު ހާސިލްކުރަމުން އަންނަ ދަރިވަރުންނަށް 109.9 މިލިއަން ރުފިޔާ ޚަރަދުކޮށްފައެވެ. އެހެންކަމުން އެއީ މިދިޔަ އަހަރާ އަޅާ ބަލާއިރު 28 އިންސައްތައިގެ ދަށްވުމެކެވެ. https://sun.mv/215979 މިދިޔަ އަހަރު ސްޓޫޑެންޓް ލޯނަށް ޚަރަދުކުރަން ސަރުކާރުން ބަޖެޓުގައި ކަނޑައެޅީ 768 މިލިއަން ރުފިޔާއެވެ. ނަމަވެސް މިދިޔަ ޑިސެންބަރު މަހުގެ 18ވަނަ ދުވަހުގެ ނިޔަލަށް ލޯނަށް ޚަރަދުކުރީ 548.2 މިލިއަން ރުފިޔާއެވެ. އެއީ އެ އަހަރަށް ބަޖެޓުކޮށްފައިވާ އަދަދުގެ 71.4 އިންސައްތައެވެ. މިދިޔަ އަހަރު ނިމެން ގާތްގަނޑަކަށް ދެ ހަފުތާއަށްވީއިރު ކުރި އެ ޚަރަދަކީ 2024ވަނަ އަހަރާ އަޅައިބަލާއިރު 20.4 އިންސައްތައިގެ ދަށްވުމެކެވެ. އެގޮތުން އެ އަހަރުގެ އެ މުއްދަތުގައި ދަރިވަރުންގެ ލޯނަށް ކުރި ޚަރަދު 689 މިލިއަން ރުފިޔާއަށް އަރައެވެ. ހަޔާ އެޑިއުކޭޝަން މިނިސްޓްރީން މިދިޔަ ސެޕްޓެމްބަރު މަހު އާންމުކުރި ތަފާސްހިސާބުތަކުން ދައްކާ ގޮތުގައި، މަތީ ތައުލީމް ހާސިލްކުރަމުން އަންނަ ދަރިވަރުންނަށް މިދިޔަ އަހަރުން ފެށިގެން ލޯނުގެ ގޮތުގައި ބިލިއަނަކަށް ވުރެ ގިނަ ރުފިޔާ ދޫކޮށްފައިވެއެވެ. ފާހަގަކުރެވޭ ގޮތުގައި، މިދިޔަ އަހަރު ދަރިވަރުންގެ ލޯނު ފައިސާ ލިބުން ލަސްވުމާއި ސިޓީތަކާއި އީމެއިލްތަކަށް ޖަވާބު ލިބުން ލަސްވާތީ އެކަމުގެ ކަންބޮޑުވުން އޮތީ ބޮޑުވެފައެވެ. ޚާއްސަކޮށް ދަރިވަރުންނަށް ދޫކުރަންޖެހޭ ސްޓެއިޕެންޑާއި ޓިއުޝަން ފީ ޖަމާކުރުން ލަސްވުމުގެ މައްސަލަ އޮތީ ބޮޑުވެފައެވެ. ވަކިން ޚާއްސަކޮށް ރާއްޖެއިން ބޭރުން ސްޓޫޑެންޓް ލޯނުގައި ކިޔަވާ ދަރިވަރުންނާއި ބެލެނިވެރިންގެ ޝަކުވާ އެކަމުގައި ބޮޑެވެ. އެ ޝަކުވާތަކާ ގުޅިގެން ހަޔާ އެޑިއުކޭޝަން މިނިސްޓަރު ޑރ. ޢަލީ ހައިދަރު އަޙްމަދު އޭރު ވިދާޅުވީ، ސަރުކާރުގެ ޚަރަދުގައި ކިޔަވާ ދަރިވަރުންނަށް ސަރުކާރުން ދޭ ފައިސާ ލިބުން ލަސްވުމުގެ މައްސަލަ ހައްލުކުރުމަށް މަސައްކަތްކުރަމުން އަންނަ ކަމަށެވެ.