އެޕަލްގެ މަޝްހޫރު ވާޗުއަލް އެސިސްޓަންޓް "ސިރީ" އިތުރަށް ތަރައްގީކޮށް، އާޓިފިޝަލް އިންޓެލިޖެންސް (އޭއައި)ގެ އެންމެ ފަހުގެ ވަސީލަތްތައް އޭގައި ހިމެނުމަށްޓަކައި ގޫގުލްގެ "ޖެމިނައި" އިންފްރާސްޓްރަކްޗާ ބޭނުންކުރުމާ ގުޅޭ ގޮތުން އެޕަލްއިން މަޝްވަރާ ކުރަމުންދާ ކަމަށް ރިޕޯޓުތައް ބުނެފިއެވެ. މި ބަދަލާއެކު ސިރީ މެދުވެރިކޮށް ކުރާ މުއާމަލާތްތައް މިހާރަށްވުރެ ބޮޑަށް އިންސާނުންނާ ވާހަކަދައްކާ ފަދަ ގޮތަކަށް ބަދަލުވެ، އުނދަގޫ މަސައްކަތްތައް އޭއައިގެ އެހީގައި ފަސޭހަކަމާއެކު ނިންމާލެވޭނެއެވެ. "ދަ އިންފޮމޭޝަން" އިން ރިޕޯޓުކޮށްފައިވާ ގޮތުގައި، އެޕަލްއިން ވަނީ ގޫގުލްގެ ސާވާތައް އެޕަލްގެ އަމިއްލަ ޑޭޓާ ސެންޓަރުތަކުގައި ބެހެއްޓިދާނެތޯ ބެލުމަށް ގޫގުލްގައި އެދިފައެވެ. މިގޮތަށް ކަންތައް ކުރުމުން، ގޫގުލްގެ ކްލައުޑް ނެޓްވޯކަށް މުޅިން ބަރޯސާވުމުގެ ބަދަލުގައި، އެޕަލްގެ އަމިއްލަ ކޮންޓްރޯލްގެ ދަށުން މި އޭއައި ސިސްޓަމްތައް ހިންގުމުގެ ފުރުސަތު ލިބިގެންދާނެއެވެ. އެޕަލް އިން އަބަދުވެސް އިސްކަންދެނީ ކަސްޓަމަރުންގެ ޕްރައިވަސީ ނުވަތަ ސިއްރުތައް ހިފެހެއްޓުމަށެވެ. އެހެންކަމުން، ގިނަ މަސައްކަތްތައް ފޯނުގެ އަމިއްލަ ޕްރޮސެސަރުން ނިންމާއިރު، މާ ބޮޑެތި މަސައްކަތްތަކަށް އެޕަލްގެ "ޕްރައިވެޓް ކްލައުޑް ކޮމްޕިއުޓް" ބޭނުންކުރާނެއެވެ. އެޕަލް އިން ބުނާ ގޮތުގައި، ކްލައުޑް ސާވަރަށް ފޮނުވާ މައުލޫމާތަކީ ހަމައެކަނި އެ ވަގުތުގެ ބޭނުމަށް ބޭނުންކުރާ އެއްޗެކެވެ. މަސައްކަތް ނިމުމާއެކު އެއްވެސް މައުލޫމާތެއް ސާވަރުގައި ރައްކާނުކުރާނެ ކަމުގެ ޔަގީންކަން އެ ކުންފުނިން ދެއެވެ. އެޕަލްގެ ސީއީއޯ ޓިމް ކުކް ވަނީ، އެޕަލްގެ އަމިއްލަ އޭއައި މަސައްކަތްތައް ކުރިއަށްދާ ވަގުތު، ގޫގުލްގެ ޖެމިނައި މޮޑެލްވެސް އިތުރު އިޚްތިޔާރެއްގެ ގޮތުގައި ބޭނުންކުރާނެ ކަން މީގެ ކުރިން ކަށަވަރުކޮށްދެއްވާފައެވެ. ސިރީގެ އާ ވާޝަނަކީ ގޫގުލްއާ ގުޅިގެން ކުރިއަށްގެންދާ މަޝްރޫއެއް --- މިހާރު ތަރައްގީކުރަމުންދާ ސިރީގެ އާ ވާޝަނަކީ ގޫގުލްއާ ގުޅިގެން ކުރިއަށްގެންދާ މަޝްރޫއެއްކަންވެސް މިހާރު ވަނީ ހާމަވެފައެވެ. އެޕަލް އިން އޭއައި ނުވަތަ އާޓިފިޝަލް އިންޓެލިޖެންސްގެ ދާއިރާއިން ބޮޑެތި ބަދަލުތަކެއް ގެންނަން މި ފެށީ، މައިކްރޯސޮފްޓް އަދި ގޫގުލް ފަދަ ޓެކްނޮލޮޖީގެ ބޮޑެތި ކުންފުނިތަކުން "ޖެނެރޭޓިވް އޭއައި" ގެ ރޭހުގައި ބޮޑެތި ކުރިއެރުންތަކެއް ހޯދަމުންދާ ދަނޑިވަޅެއްގައެވެ. 2011 ވަނަ އަހަރު "ސިރީ" ތައާރަފްކުރި ފަހުން، މިއީ އެ ޚިދުމަތަށް ގެނެވޭ އެންމެ ބޮޑު އިންގިލާބީ ބަދަލެވެ. މިއަހަރުގެ ޑިވެލޮޕާސް ކޮންފަރެންސްގައި އެޕަލް އިން ވަނީ "އެޕަލް އިންޓެލިޖެންސް" އިޢުލާންކޮށް، އޯޕަން އޭއައިގެ ޗެޓްޖީޕީޓީ ވެސް އެޕަލްގެ އުފެއްދުންތަކުގައި ބޭނުންކުރެވޭނެ ގޮތް ހަދާނެކަން ހާމަކޮށްފައެވެ. އެޕަލް އާއި ގޫގުލް އަކީ ކުރިއްސުރެ ސަފާރީ ބްރައުޒާގެ ސާޗް އިންޖީނުގެ މުއާމަލާތްތަކުގައި ބިލިއަން ޑޮލަރުގެ ޕާޓްނަޝިޕެއް އޮންނަ ދެ ކުންފުނި ކަމަށްވާއިރު، އޭއައިގެ ދާއިރާއިން މި އުފެދޭ އައު ގުޅުމަކީ ޓެކްނޮލޮޖީގެ ދުނިޔޭގައި އެޕަލްގެ މަގާމު ވަރުގަދަކުރުމަށް އެޅޭ މުހިންމު ފިޔަވަޅެކެވެ.