ދަރިންނަކީ މާތްﷲ އިންސާނާއަށް ޙަވާލްކުރާ އެންމެ ބޮޑު އަމާނާތެވެ. މި އަމާނާތަކީ އިންސާނާގެ ޒިންމާއެއްގެ ގޮތުގައި ބަލަހައްޓަންޖެހޭ އެއްޗެކެވެ. ކީރިތި ޤުރުއާނުގައި ވަޙީކުރައްވާބަސްފުޅުގެ މާނާގައި ވަނީ "ތިޔަބައިމީހުންގެ މުދަލާއި ދަރިންނަކީ ފިތުނައެއްކަން ދަންނާށެވެ." މިއާޔަތުން އަހަރެމެންނަށް އެނގިގެންދަނީ ދަރިންނަކީ އަހަރެމެންގެ އިމްތިޙާނެއްކަމެވެ. ދަރިންގެ ޝަރުޢީ މައިންބަފައިން ތިބުމަކީ އިސްލާމްދީނުގައި ވަރަށް މުހިންމު ކަމެކެވެ. މިގޮތުން ކައިވެނި ޝަރުޢު ކުރެވިފައިވަނީ ދަރިން ލިބި، އެ ދަރިންނަށް ޝަރުޢީ މަންމަ އަކާއި ބައްޕައެއް ހުރުމަށްޓަކައެވެ. އިސްލާމްދީނުގެ މަޤްޞަދު ތަކުގެ ތެރެއިން ނަޞަބު ރައްކާތެރިކުރުމުގެ ގޮތުންވެސްމެއެވެ. ކައިވެނީގެ މުއައްސަސާ ޤާއިމުކުރެވިފައިވަނީ މުޖުތަމަޢުގެ އަސާސް ބިނާކުރުމަށްޓަކައެވެ. އަބުރު ރައްކާތެރި ކުރުމާއި އެކު ދަރިފަސްކޮޅު ޝަރުޢީ ހަމަތަކުގެ މަތިން ދެމެހެއްޓުމަށްޓަކައެވެ. ދަރިއަކަށްބަލިވެ އިންނަ ހިސާބުން ފެށިގެން މައިމީހާއަށް ރައްކާތެރި ކަމާއި ލުއިތަކެއް އިސްލާމްދީނުގައިކަނޑަ އަޅުއްވާފައި ވެއެވެ. އެގޮތުން މާބަނޑު އިރު ބަނޑުގައިވާ ދަރިފުޅަށް ގެއްލުމެއް ލިބިދާނެ ކަމަށްޓަކައި ރަމަޟާންމަހުގެ ރޯދަ ޤަޟާކުރުމުގެ ހުއްދަލިބިދެއްވިއެވެ. ފިރިމީހާ އަށް މާބަޑު އަނބިމީހާއަށް އަޅާލާ އޯގާތެރި ވުމަށް އިރުޝާދު ދެއްވައެވެ. މާތް ރަސޫލާ ޞައްލަﷲ ޢަލައިހި ވަސައްލަމަ ޙަދީޘް ކުރައްވާފައިވާ ބަސްފުޅެއްގެ މާނާގައި ވެއެވެ: "ތިޔަބައިމީހުންގެ ތެރެއިން އެންމެ ހެޔޮވެގެންވާ މީހަކީ އޭނާގެ އަހުލުވެރިންނަށް އެންމެ ހެޔޮވެގެންވާ މީހާއެވެ." މިއިން އެނގިގެންދަނީ އަނބި ދަރިންނަށް ހެޔޮކޮންހިތައި އޯގާތެރިވާން ޖެހޭ މިންވަރެވެ. ކުޑަކުޑަ ދެލޯފުޅު ދުނިޔެއަށް އައުމަކީ ލިބޭ ބޮޑު އުފަލެކެވެ. އެ އުފަލާއި އެއްވަރަށް ޒިންމާތައްވެސް ބޮޑެވެ. ތިމާމެންގެ ދެލޯފަދަ ދަރިފުޅު ދުނިޔަށް އުފަންވުމާއި އެކު އަދާކޮއްދޭންޖެހޭ ޙައްޤުތަކެއް މަންމައާއި ބައްޕަގެ މައްޗަށްވެއެވެ. އެގޮތުން އެންމެ ފުރަތަމަ ކަންފަތްދޮށުގައި ބަންގި ދިނުމާއި ޝަޙަދަތުގެ 2 ކަލިމަ އިއްވުން ހިމެނެއެވެ. ހަތްދުވަސްވުމުން އަޤީޤާ ކަތިލައި އިސްލާމްދީނުގެ ރީތި ނަމަކުން ނަމެއްދޭންޖެހެއެވެ. ދެ އަހަރު ފުރެންދެން މަންމަގެ ގާތުން ދިނުމަށް އިރުޝާދު ދީފައިވެއެވެ. މިއީ ދަރިފުޅުގެ ހެދި ބޮޑުވުމާއި ސަލާމަތް ޞިއްޙަތަށް ނުހަނު މުހިންމު ކަމެކެވެ. ދީން ބާރު އަޅާކަމެކެވެ. މިޒަމާނުގެ ސައިންޓިފިކް ހޯދުންތަކުން ދައްކާގޮތުން ތުއްތު ދަރިފުޅަށް އެންމެ ރަނގަޅު ކާނާ އެވެ. ޑަކްޓަރުން ނުހަނު ބާރު އަޅުއްވާކަމެކެވެ. މިއީ ހައްތަހާވެސް މައިން ބަފައިންގެ މައްޗައްވާ ދަރިންގެ ޙައްޤު ތަކެވެ. ދެލޯފުޅު ދުނިޔެއަށްލާ ކޮންމެ ނޭވާއެއްގައި މައިން ބަފައިންނަށް ހިތްހަމަޖެހުމާއި އުފާވެރިކަން ވެއެވެ. ކޮންމެ ޙަރަކާތެއްގައި ޙަޔާތަށް ދިރުމެއްވާ ކަހަލައެވެ. ލޯހުޅުވައި ބަލައި ލުމާއި އަޑު އަޑު ލައްވާލާއި މޫނު މައްޗަށް ގެންނަ ކޮންމެ ޙަރަކާތެއްވެސް މާނަފުން އިޙްސާސްތަކެއް ހިތަށް ކުރުވައެވެ. މަންމަގެ މުޅި ވުޖޫދު ތުއްތު ތުއްތު ދެލޯފުޅުގެ އިޙްސާސްތަކުން ފުރާލައެވެ. ކޮންމެ އަކަސް ދަރިންގެ ޙައްޤު ތަކުގެ ތެރެއިން އިސްލާމްދީނަށް ލޯބިޖެއްސުމާއި ، ދީނަށް ހާނާ ތަރުބިއްޔަތު ކުރަންޖެހެއެވެ. ކީރިތި މާތް ރަސޫލާ ޞައްލަﷲ ޢަލައިހި ވަސައްލަމަ ޙަދީޘް ކުރައްވާފައިވާ ބަސްފުޅެއްގެ މާނާގައި ވެއެވެ: " ކޮންމެ ކުއްޖަކުވެސް ދުނިޔެއަށް އުފަންވަނީ ފިތުރަތުގެ ސާފުކަންމަތީގައެވެ.އެއަށްފަހު އެކުއްޖާ ޔަހޫދީއަކަށް ނުވަތަ ނަޞްރާނީއަކަށް ނުވަތަ މަޖުސީއަކަށް ހަދަނީ އެކުއްޖާގެ މައިން ބަފައިންނެވެ". ވީމާ ދަރިންނަށް އިސްލާމީ އަޚްލާޤާއި އާދަކާދަތައް ދަސްކޮށްދިނުމަކީ މައިންބަފައިންގެ އެންމެ މުހިންމު ޒިންމާއެވެ. މިކަމުގައި އެންމެ މުހިންމު ދައުރެއް އަދާކުރަނީ މައިންބަފައިންގެފަރާތުން ދަރިންނަށް ފެންނަ ނަމޫނާއެވެ. ދަރިން ބޮޑުވަމުން އަންނަނީ މައިންބަފައިންގެ ބަސްތަކަށްވުރެ ބޮޑަށް ޢަމަލުތަކަށް ބަލައި ކަންކަން ދަސްކޮއްގެންނެވެ. ދަރިންނަކީ އަޅުގަނޑުމެންގެ މުސްތަޤްބަލެވެ. މުސްތަޤްބަލް މިއަދުގެ ލޮލުންދެކެން އެދޭނަމަ ދެކެންބޭނުންވާ މަންޒަރު މިއަދު ކުރަހާށެވެ. އޯގާތެރި ވާށެވެ. އަޅާލުމާއި ރައްކާތެރިކަންދޭށެވެ. ކުލުނުވެރި ހިތަކުން ޝަރުތެއްނެތި ލޯބި ދޭށެވެ. ކުލަޔަކަށް ޖިންސަކަށްނުބަލާށެވެ. ކުޅެދުނަސް ނުކުޅެދުނަސް އެއީ ތިމާމެންނަށް ލެއްވި ނަސީބުކަން ދަންނާށެވެ. އިހުމާލު ވުމެއް ތަފާތުކުރުމެއް ނެތި ސާފު ހިތަކުން ބަލައިގަންނާށެވެ. އަޅާކިޔުމެއްނެތި ކޮންމެ ކުއްޖަކީ ތަފާތުކުއްޖެއްކަން ދަންނާށެވެ. މާތްﷲގެ ބެއްސެވުމަށް ރުހި ޤަބުލްކުރާށެވެ. ވަގުތު ދޭށެވެ. އުފަލުގައި ބޮޑުކުރާށެވެ. ތި ޖެއްސި ހުރިހާ ކުލަޔާއި ރަހަޔެއް މުސްތަޤްބަލުގައި ދެލޯފުޅުގެ ފާރާތުން އިރާދަކުރެއްވިއްޔާ ފެނަނާނެކަން ދަންނާށެވެ. މުސްތަޤްބަލަށްޓަކައި އުފުލި ތަކުލީފުގެ ފޮނިކަން ލިބޭނެއެވެ. އަމާނާތް ރައްކާތެރިކަމާއެކު ބަލަހައްޓައި، ރަނގަޅު ތަރުބިއްޔަތެއް ދޭށެވެ. ދަރިންގެ ފުރިހަމަ ޒިންމާނަގާށެވެ. މިކަމުގައި އިހުމާލުވެއްޖެނަމަ، އޭގެ ނޭދެވޭ އަސަރު މުޅި މުޖުތަމަޢުއަށް ކުރާނެކަން ކަށަވަރެވެ. އެހެންކަމުން، އަޅުގަނޑުމެން އެންމެން މިކަމަށް ސަމާލުވެ، އަޅުގަނޑުމެންގެ ދަރިން ހެޔޮލަފާ، ދީނަށް ލޯބިކުރާ، ޤައުމަށް ވަފާތެރި ރައްޔިތުންތަކެއްގެ ގޮތުގައި ތަރުބިއްޔަތު ކުރުމަށް މަސައްކަތް ކުރަމާ ހިންގަވާށެވެ. އަޅުގަނޑުމެންގެ ދެލޯފަދަ ދޯބިވާ ދެލޯފުޅަކަށް ކޮންމެ ކުއްޖަކަށް ވެސް ފުރުޞަތު ދެމާ ތޯއެވެ.