އިންޑިއާގެ ސްކޫލެއްގައި ތައުލީމު ހާސިލް ކުރަމުން ދިޔަ ދެ ދަރިވަރަކު، މަރާލި ކަމަށް ބުނެ ސްކޫލްގެ ވެރިއެއްގެ ގައިގައި މަރުވަންދެން ތެޅި މައްސަލައެއް ފެންމަތިވެއްޖެއެވެ.
ނިރްޕޫރް ވިލެޖްގައި މިހާދިސާ ހިނގާފައިވަނީ އުމުރުން 10 އަހަރުގެ ކުއްޖަކާއި، 11 އަހަރުގެ ކުއްޖަކު ފެންގަނޑެއްގެ ތެރޭގައި މަރުވެފައި އޮއްވާ ފެނުމާއި ގުޅިގެންނެވެ. އެ ވިލެޖުގައި ދިރިއުޅޭ މީހުން ތުހުމަތު ކޮށްފައިވާ ގޮތުގައި އެދެކުދިން ވެސް މަރާލީ ގަންބާލައި، ނޭވާ ހާސްކުރުމަށްފަހުއެވެ.
މިހާދިސާ އާއި ގުޅިގެން މިދެކުދިންގެ މަރުގެ ތުހުމަތު އަޅުވާފައިވަނީ ވިލެޖްގައި ހުންނަ ސްކޫލެއްގެ ޑިރެކްޓަރު ބޮލުގައިއެވެ. އަދި މި މީހާގެ ގައިގައި ދަނޑި ބުރިން ތަޅައި މަންޒަރު ދައްކުވައިދޭ ވީޑިއޯ ފޫޓޭޖްއެއް ޓީވީ ޗެނަލަކުން ވެސް ވަނީ ދައްކާފައެވެ.
އެގޮތުން މި މީހާގެ މޭމަތީގައި އާއި ބަނޑުގައި އާއި ފައިގައި ތަޅަމުން ދިޔަ މަންޒަރު ވީޑިއޯއިން ފެނެއެވެ.
މި ކުޑަ ދެކުދިން ގެއްލިފައިވަނީ ހޮނިހިރު ދުވަހުގެ ވަގުތެއްގައި ކަމަށް ރިޕޯޓުތައް ބުނެއެވެ. އަދި ދެކުދިންގެ ޕޯސްޓުމޯޓަމް ހެދިއިރު، ދެކުދިން ވެސް މަރުވެފައިވާ ކަމަށް ދައްކަނީ ގެނބިގެންނެވެ. ސްކޫލްގެ އިސްވެރިޔާ މަރުވެފައިވަނީ ލިބުނު އަނިޔާތަކަށް ފަރުވާ ހޯދަމުން ދަނިކޮށް އާދިއްތަ ދުވަހުގެރެއެވެ.
ސްކޫލްގެ އިސްވެރިޔާ ގައިގައި ތަޅަމުންދާ ކަމުގެ ރިޕޯޓު ލިބުމާއި ގުޅިގެން، ހާދިސާ ހިނގި ސަރަހައްދަށް ފުލުހުންގެ ޓީމެއް ދިއުމުން ވިލެޖްގައި ދިރިއުޅޭ ބަޔަކު ވަނީ ފުލުހުންނާއި ވެސް ކުރިމަތިލާފައެވެ. އެގޮތުން ހަ އޮފިސަރަކަށް އެކި ވަރުގެ އަނިޔާ ލިބިފައިވާއިރު، ހަމަނުޖެހުން ކޮންޓްރޯލް ކުރުމަށް މަސައްކަތް ނުކުރުމުން ފުލުހަކު ސަސްޕެންޑްވެސް ކުރިއެވެ.
އަދި ރުޅި ގަދަ ވެފައި ތިބި މީހުން ވަނީ އެ ވިލެޖުގެ ބައެއް މަގުތައް ބްލޮކްކޮށް، ވެހިކަލެއްގައި ރޯވެސް ކޮށްލާފައެވެ. ނަމަވެސް މި ހަމަނުޖެހުންތައް މިހާރު ވަނީ ކޮންޓްރޯލްކޮށްފައެވެ.
ފުލުހުން ވަނީ މި ދެ މައްސަލައިގެ ހާއްސަ ތަހުގީގެއް ފަށާފައެވެ.