މާލެ، ހުޅުމާލެ އަދި ހުޅުލޭގެ ކަރަންޓުގެ އެއް ވިއުގަޔަކުން ގުޅާލުމަށް ޗައިނާގެ މަޝްހޫރު ޑޮންފެން އިލެކްޓްރިކް ކޮމްޕެނީ އާއި ހަވާލުކޮށްފިއެވެ.
"ގްރޭޓަރ މާލެ ގްރިޑް ޕްރޮޖެކްޓު"ގެ އެއްވަނަ ފިޔަވަހީގެ މަސައްކަތް ހަވާލުކުރުމަށް މިއަދު ސްޓެލްކޯގައި ބޭއްވި ހާއްޞަ ރަސްމިއްޔާތެއްގައި މި އެއްބަސްވުމުގައި ސްޓެލްކޯގެ ފަރާތުން އެ ކުންފުނީގެ ސީއީއޯ އަޙްމަދު ޒުހޫރު ސޮއި ކުރެއްވިއިރު، ޑޮންފެން އިލެކްޓްރިކް ކޮމްޕެނީގެ ފަރާތުން ސޮއި ކުރެއްވީ އެ ކުންފުނީގެ ޖެނެރަލް މެނޭޖަރ ވެން އެވެ.
މިއެއްބަސްވުމުގެ ދަށުން ސްޓެލްކޯއިން ހުޅުމާލޭގައި މިހާރު ޤާއިމްކުރަމުންދާ 50 މެގަވޯޓުގެ ޕަވަރ ސްޓޭޝަނާއި މާލެ ޕަވަރ ސްޓޭޝަން އަދި ހުޅުލެ އެއް ވިއުގަޔަކުން ގުޅާލެވިގެންދާނެއެވެ.
 
ޖުމްލަ 44.6 މިލިއަން ޑޮލަރަށް ޗައިނާގެ މަޝްހޫރު އިލެކްޓްރިކް ކުންފުނި ޑޮންފެން އިލެކްޓްރިކް ކޮމްޕެނީ އައި މިއަދު ހަވާލުކުރެވުނު މަސައްކަތް އެއް އަހަރު ދުވަހުގެ ތެރޭގައި ނިންމަންޖެހޭއިރު، ހުޅުމާލޭގައި ހަމަ އެ ކުންފުންޏާ ހަވާލުކޮށްގެން މިހާރު ޤާއިމްކުރަމުންދާ ފިފްތް ޕަވަރ ޕްރޮޖެކްޓްވެސް މި ޕްރޮޖެކްޓާ އެކުއެކީގައި ނިމިގެންދާނެކަމަށް މި ރަސްމިއްޔާތުގައި ސްޓެލްކޯގެ ސީއީއޯ އަޙްމަދު ޒުހޫރު ވިދާޅުވިއެވެ.
މިއަދު ހަވާލުކުރެވިގެންދިޔަ ޕްރޮޖެކްޓުގެ ތެރެއިން ހުޅުމާލެ، ހުޅުލެ އަދި މާލެއަށް ދެ ކޭބަލެއް އެޅިގެންދަނީ ދުރު ރާސްޓާއަށް އަމާޒު ކުރައްވައިގެން ކަމަށާއި، މިއިން ކޮންމެ ކޭބަލަކީވެސް 100 މެގަވޮޓްގެ ކަރަންޓް ޓްރާންސްފަރ ކުރުމުގެ ޤާބިލުކަން ލިބިފައިވާ ދެ ކޭބަލް ކަމަށްވެސް ޒުހޫރު ވިދާޅުވިއެވެ.
މާލެ، ހުޅުލެ އަދި ހުޅުމާލޭގެ ކަރަންޓަށް ދިމާވަމުންދާ މައްސަލަތަކަށް ބޮޑު ހައްލެއް ލިބި، ސީދާ ރައްޔިތުންނަށް މަންފާ ކުރުވަނިވި މުހިންމު އަދި ސްޓެލްކޯގެ ތަސައްވުރާއި ގުޅިފައިވާ މި ޕްރޮޖެކްޓަށް ޑޮންފެން އިލެކްޓްރިކް ކޮމްޕެނީން ފައިނޭންސް ކޮށްފައިވަނީ ދިވެހި ސަރުކާރުން ގެރެންޓީ ދީގެންނެވެ.