ސ. ހިތަދޫ މުހިއްބުއްދީން ސްކޫލްގެ ގްރޭޑް 11- 12 ގެ ދަރިވަރުންނަށް އަމާޒުކޮށްގެން މި އަހަރު ހުޅުވި އައްޑޫ ހައި ސްކޫލް އަމިއްލަ ފަރާތަކާ ހަވާލުކުރަން ނިންމައިފި އެވެ.
ކުރިން އިސްލާމިއްޔާ ސްކޫލް ހިންގަމުން އައި އިމާރާތުގައި އޭލެވެލް އަށް ކިޔަވައިދޭން ފެށި ސްކޫލާ ބެހޭ ގޮތުން ވާހަކަ ދައްކަވަމުން، މިދިއަ ބުރާސްފަތިދުވަހު އައްޑޫގައި ބޭއްވި ފުރަތަމަ ކޮމިއުނިޓީ ކެބިނެޓުގައި، އެޑިއުކޭޝަން މިނިސްޓަރު ޝިފާ މުހައްމަދު ވިދާޅުވީ 400 އަށް ވުރެ ގިނަ ކުދިން ކިޔަވަމުން އަން ސްކޫލް އަމިއްލަ ފަރާތަކާ ހަވާލުކުރަނީ ޕަބްލިކް ޕްރައިވެޓް ޕާޓްނާޝިޕް (ޕީޕީޕީ) ދަށުން ކަމަށެވެ.
އައްޑޫ ހައި ސްކޫލުގެ ޕްރިންސިޕަލް އިބްރާހީމް ނަދީމު މިއަދު ވިދާޅުވީ ޕީޕީޕީގެ ދަށުން އެ ސްކޫލް ހިންގަން ސަރުކާރުން ނިންމައި، މިދިޔަ އަހަރުގެ ތެރޭގައި އެކަމަށް ކުރިމަތިލުމުގެ ފުރުސަތު ވެސް އެޑިއުކޭޝަނުން ހުޅުވާލި ކަމަށެވެ. އެހެން ނަމަވެސް ދެ ފަހަރަށް ބިޑްކޮށްގެން ވެސް ރަނގަޅު ހުށަހެޅުމެއް ލިބިފައިނުވާކަން އެނގިވަޑައިގެންފައިވާ ކަމަށް އޭނާ ވިދާޅުވި އެވެ.
"ކުރިން ޓާގެޓްކޮށްފައި އޮތީ މި އަހަރުގެ ކިޔެވުން ޖޫންގައި ފަށާ އިރު އެ ބަދަލާ އެކު ފަށަން،" ނަދީމް ވިދާޅުވި އެވެ. "އެހެން ނަމަވެސް އެކަން އަދި މިއޮތީ ވާ ގޮތް ނުވެފައި."
އޭނާ ވިދާޅުވީ އެ ސްކޫލް އަމިއްލަ ފަރާތަކާ ހިންގަން ހަވާލުކުރަން ނިންމާފައިވާ އިރު ދެ ގޮތަކަށް ދެކޭ ބެލެނިވެރިން އެބަ ތިބި ކަމަށެވެ. އެގޮތުން އެއް ބަޔަކީ ފީ ދައްކައިގެން ކުދިންނަށް ކިޔަވައިދޭން ޖެހުނަސް، ފެންވަރު ރަނގަޅުވާނެ ކަމަށް ދެކޭ ބެލެނިވެރިންނެވެ. އެހެން ނަމަވެސް މާލީ ހާލަތު މިވަގުތު ހުރި ގޮތުން އަމިއްލަ ފަރާތަކާ ސްކޫލް ހަވާލުކޮށް ފީ ދައްކައިގެން ކުދިން ފޮނުވަން ގިނަ ބެލެނިވެރިން ތާއީދުނުކުރާ ކަމަށް ނަދީމް ވިދާޅުވި އެވެ.
އެޑިއުކޭޝަނުން އައްޑޫ ހައި ސްކޫލް އަމިއްލަ ފަރާތަކާ ހިންގަން ހަވާލުކުރަން ނިންމާފައިވާކަން ކޮމިއުނިޓީ ކެބިނެޓުގައި މިނިސްޓަރު ޝިފާ ވިދާޅުވުމުން އެ ސްކޫލުގެ ދަރިވަރަކު އެ ދުވަހު ވަނީ އެކަން އެގޮތަށް ނުކުރުމަށް އެދިފަ އެވެ. އެގޮތަށް ހަމަޖައްސައިފި ނަމަ ބޮޑު ފީއެއް ދައްކާފައި، ދަރިވަރުން އެތަނަށް ކިޔަވަން ފޮނުވުމަކީ ބެލެނިވެރިންނަށް ކުރިމަތިވާނެ ވަރަށް ބޮޑު ބުރައެއް ކަމަށް ވެސް އެދަރިވަރު ބުންޏެވެ.