ކުށްކުރާ މީހުންގެ ކިބައިން ރައްޔިތުން ސަލާމަތް ކުރުމަށް ޖޭޕީގެ ލީޑަރު އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ގާސިމް އިބްރާހިމް ގޮވާލައްވައިފި އެވެ.
ސީރިއަސް ޒަހަމުތަކަކާއެކު މަރާލާފައި އޮއްވާ އިއްޔެ ފެނުނު މުހައްމަދު އިބްތިހާލުގެ މަރުގެ މައްސަލައަށް އިޝާރާތްކުރައްވާ ގާސިމް ވިދާޅުވީ އެފަދަ ކަންތައްތަކުން ސަލާމަތްވުމަށް ހުރިހާ ރައްޔިތުން އަތުކުރި އޮޅާލައިގެން މަސައްކަތްކުރަންޖެހޭ ކަމަށެވެ. އަދި އެބާވަތުގެ އަމަލުތައް ކުރާ މީހުންގެ ކިބައިން ރައްޔިތުން ސަލާމަތް ކުރުމަށް އެމަނިކުފާނު ގޮވާލެއްވި އެވެ.
"މަރުވާ މީހުންގެ ގާތިލުން ކޮބައިތޯ؟. އެތައް ހާސްބަޔަކު އެބަތިބި ދައުލަތުން ބޮޑެތި މުސާރަތައް ދީފައި ބައިތިއްބާފައި. އެހެންނަމަވެސް ކުށްކުރާ މީހުން ޝަރީއަތް ނިމިގެންދާ ތަނެއް ނުފެނޭ. އެކަމަށްވެސް ހައްލެއް ނާންނަތަން ފެނިގެން މިދަނީ،" ގާސިމް ވިދާޅުވި އެވެ.
ސީރިއަސް ޒަހަމްތަކާއެކު އިބްތިހާލް މަރުވެފައި އޮއްވާ ފެނުނީ އިއްޔެ 12:10 ހާއިރު އެެވެ.
ރަކީދޫ ބައެއް މީހުންނާ އަދި އެރަށު ކައުންސިލުން ވެސް ބުނީ އިބްތިހާލް މަރުވީ އޭނާގެ މަންމަ އެކުއްޖާއަށް އަނިޔާކުރުމުން ކަމަށް ބެލެވޭ ކަމަށެވެ.
ޓެސްޓް ތަކެއް ހެދުމަށްޓަކައި އިބްތިހާލުގެ ހަށިގަނޑު ރޭ މާލެ ގެނެސްފަވާއިރު އެ ކުއްޖާގެ މަންމަ އާފިޔާ މުހައްމަދު ހައްޔަރުކުރުމަށް ފުލުހުން މިއަދު ވަނީ ކޯޓް އަމުރަކަށް އެދިފަ އެވެ.
އިބްތިހާލްގެ މަރުގެ މައްސަލައިގައި ދައުލަތުގެ އެއްވެސް މުއައްސަސާއެއްގެ އިހުމާލެއް ފާހަގަކުރެވިއްޖެ ނަމަ އެ ފަރާތްތަކުގެ ތަހުގީގު ހިންގާ ޖިނާއީ ދައުވާ ކުރުމަށް އަމުރު ކުރައްވާނެ ކަމަށް ޕްރޮސެކިއުޓަ ޖެނެރަލް (ޕީޖީ) މުހުތާޒް މުހުސިން ވަނީ ބައެއް މީޑިއާތަކުގައި ވިދާޅުވެފަ އެވެ.
އިބްތިހާލްގެ މަރުގެ މައްސަލަ ފުލުހުންނާއި އެޗްއާރްސީއެމުން ވެސް އަންނަނީ ތަހުގީގު ކުރަމުންނެވެ.