މިކަން ހާމަކުރައްވާފައި ވަނީ ލޯކަލް ގަވަރނަންސް މިނިސްޓަރު އާދަމް ޝަރީފް ޢުމަރު އެކްސްގައި ކުރެއްވި ޕޯސްޓެއްގައެވެ. މިނިސްޓަރ އާދަމް ޝަރީފް ޢުމަރު ވިދާޅުވީ، ރައީސް މުޙައްމަދު މުޢިއްޒުގެ ސިޔާސަތުގެ ދަށުން ކައުންސިލްތަކަށް ފަޅުރަށް ލިބޭގޮތަށް އިޢުލާނު ކުރެއްވި ޕްރޮޕޯސަލްގެ ދަށުން މި މަސައްކަތް ކުރިއަށް ގެންދިއުމަށް ނިންމަވާފައިވެއެވެ.މިނިސްޓަރ އާދަމް ޝަރީފް އުމަރުގެ ޕޯސްޓުގައި ވިދާޅުވެފައިވާ ގޮތުގައި، މިނިސްޓްރީ އޮފް ފިނޭންސް އެންޑް ޕްލޭނިންގ އާއި މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް ޓެކްނޮލޮޖީ އާ ގުޅިގެން މި މަސައްކަތް ކުރިއަށް ގެންދާނެއެވެ.އެގޮތުން، ރ. އިނގުރައިދޫ ކައުންސިލަށް ރ. ނޭވާ، އަދި ލ. މާވަށު ކައުންސިލަށް ލ. ބޮޑުމާބުޅަލި ހަވާލުކުރުމަށް ވަނީ ނިންމާފައިވާ ކަމަށާއި މީގެ އިތުރުން ދ. އަތޮޅު ކައުންސިލަށް ދ. މިނިމަސްގަލި އަދި ދ. ފެންފުށި ހަވާލުކުރުމަށްވެސް ވަނީ ނިންމަވާފައިކަމަށް ވަނީ ވިދާޅުވެފައެވެ. މިނިސްޓަރ އާދަމް ޝަރީފް އުމަރު އޭނާގެ ޕޯސްޓުގައި ރ. އިނގުރައިދޫ، ދ. އަތޮޅު އަދި ލ. މާވަށު ކައުންސިލް އަށާއި އެ ރަށްރަށުގެ ހުރިހާ ރައްޔިތުންނަށް މަރުޙަބާ ދަންނަވާފައިވެއެވެ.