އައްޑޫގެ ގުޅިފައިވާ އަވަށްތަކުގެ ކަރަންޓްގެ ހާލަތު ގޯސްކުރީ ސަރުކާރުން ކަމަށާއި މިދިޔަ އެމްޑީޕީ ސަރުކާރުގައި މީގެ ކުރިން އައްޑޫގެ ކަރަންޓްގެ ހާލަތު ގޯސްނުވާ ވަރަށް ގޯސްފައިވާ ކަމަށް މަޖިލީހުގެ ފޭދޫ އުތުރު ދާއިރާގެ މެންބަރު އިސްމާއީލް ނިޒާރު ވިދާޅުވެއްޖެ އެވެ.
ކަރަންޓް ކެނޑޭ މައްސަލަ ހައްލު ނުވެ ގިނަ ބަޔަކު މިކަމުގެ ކަންބޮޑުން ފާޅުކުރަމުން ދަނިކޮށް އޭނަ ސޯޝަލް މީޑިއާ ޕޯސްޓެއްގައި ވިދާޅުވީ އައްޑޫގެ ކަރަންޓް މައްސަލަ އަކީ އެއްވެސް ސަރުކާރަކަށް ހައްލުކޮށް ނުދެވި އޮތް މައްސަލައެއް ކަމަށެވެ. އަދި ވަކިން ހާއްސަކޮށް ކުރީގެ ސަރުކާރުން ހާލަތު އިތުރަށް ގޯސްކޮށްފައިވާ ކަމަށް ނިޒާރު ވިދާޅުވި އެވެ.
އޭނަ ވިދާޅުވީ މި ސަރުކާރުން އަންނަނީ ކަރަންޓްގެ މައްސަލަ ހައްލު ކުރަން މަސައްކަތް ކުރަމުންނެވެ. ނަމަވެސް މިކަމުގައި ގިނަ ގޮންޖެހުންތަކެއް ހުރި ކަމަށާއި މައްސަލަ އަކީ ހަމައެކަނި އިންޖީނުތަކުގެ މައްސަލައެއް ވެސް ނޫން ކަމަށެވެ.
"ކަރަންޓްގެ ހިދުމަތަކީ ސިޔާސީ ކަމަކަށް ނުހަދައި ރައްޔިތުންނަށް އިހްލާސްތެރިކަމާ އެކީ ފޯރުކޮށް ދޭން ޖެހޭ އަސާސީ ހިދުމަތެއްކަން އެންމެންނަށް އެނގޭ،" ނިޒާރު ވިދާޅުވި އެވެ. "އެ މަގުން ކުރިއަށް ދިޔައިމަ މިހާރަށް ހާލަތު ރަނގަޅު ވާނެ."
އޭނަ ވިދާޅުވީ މިފަދަ ކަންކަމާ ގުޅޭ ގޮތުން މަޖިލީހުގެ ތަޅުމުގައި އަޑު އުފުލައި ސަރުކާރަށް އެއްޗެހި ނުގޮވިޔަސް ރައްޔިތުން ހޮވާފައި ހުރި މެންބަރެއްގެ ހައިސިއްޔަތުން ކަންކަން ރަނގަޅު ކުރަން މަސައްކަތް ކުރައްވާނެ ކަމަށެވެ.
"އޭގެ ނަތީޖާ ވެސް ފެންނާނެ." ނިޒާރު ވިދާޅުވި އެވެ.
އައްޑޫގެ ގުޅިފައިވާ އަވަށްތައް ކަމަށްވާ ހިތަދޫ، މަރަދޫ، މަރަދޫފޭދޫ އަދި ފޭދޫން ކަރަންޓް ކެނޑޭ މައްސަލަ މި ރޯދަ އަށް ހައްލު ކުރަން 1.8 މެގަވޮޓްހެ ޖެނެރޭޓަރެއް ގެނެސް ބޭނުން ކުރަން ފެށި ނަމަވެސް މައްސަލަ އަށް ހައްލެއް ނުވެ އެވެ. އެހެންވެ ފެނަކައިން މިހާރު ނިންމާފައި ވަނީ އަނެއްކާ ވެސް 1.8 މެގަވޮޓްގެ އިތުރު ޖަނަރޭޓަރެއް ގެންނާށެވެ.
މިކަމާ ގުޅޭ ގޮތުން ފެނަކައިގެ މެނޭޖިން ޑިރެކްޓަރު މުހައްމަދު ނަޖާހު ވިދާޅުވީ މިމައްސަލަ ހައްލު ކުރުމަށް އަންނަ ހަފުތާ ތެރޭގައި އިތުރު ޖަނަރޭޓަރެއް އައްޑު އަށް ގެންދިއުމަށް މަސައްކަތް ކުރަމުން އަންނަ ކަމަށެވެ.