އެޕަލް ކުންފުނިން އާލަތްތައް އުފެއްދުމަށް ބޭނުންކުރާ އިންޑިއާގެ ޓާޓާ އެލެކްޓްރޯނިކްސްއަށް ދިން ރެންސަމްވެއާ ހަމަލާއަކާ ގުޅިގެން، އެޕަލްއިން ދެން އެންމެ އަވަހަށް ނެރުމަށް ތައްޔާރުވަމުންދާ އައިފޯން 18 ޕްރޯގެ ސިއްރު މައުލޫމާތުތަކާއި ފޮޓޯތަކެއް ޑާކް ވެބްގައި އާންމުވެއްޖެއެވެ. ލީކުވެފައިވާ މި ލިޔެކިޔުންތަކުގެ ތެރޭގައި ފޯނު އުފެއްދުމަށް ބޭނުންކުރާ ސަޕްލަޔަރުންގެ ލިސްޓާއި، ބައިތަކުގެ ތަފްސީލުތައް ހިމެނެއެވެ. މި ލީކާ ގުޅޭގޮތުން ރޮއިޓާސްއިން ރިޕޯޓްކޮށްފައިވާ ގޮތުގައި، އާންމުވެފައިވާ ފައިލްތަކުގެ ތެރޭގައި އައިފޯން 18 ޕްރޯގެ މައި ސާކިޓް ބޯޑުގައި ހިމެނޭ ޗިޕްތަކާއި، ބެޓެރީ އަދި ކެމެރާގެ މައުލޫމާތު ހިމެނޭ ހަ ފައިލެއް ހިމެނެއެވެ. މީގެ އިތުރުން 2026 ވަނަ އަހަރުގެ ކުރީކޮޅު ޓާޓާގެ ފެކްޓްރީއެއްގައި މި ފޯނު ޑްރޮޕް ޓެސްޓް ކުރަނިކޮށް ނަގާފައިވާ ފޮޓޯތަކެއްވެސް ވަނީ ފެންމަތިވެފައެވެ. https://sun.mv/222879 އެޕަލްއިން އާންމުކޮށް ސަޕްލަޔަރުންގެ މައުލޫމާތު ސިއްރުކޮށްގެން ގެންގުޅޭއިރު، މި ލީކުގެ ސަބަބުން ވާދަވެރި ކުންފުނިތަކަށް ބޮޑެތި ފައިދާތަކެއް ލިބިދާނެ ކަމުގެ ބިރު ވަނީ ހީވެފައެވެ. ޗައިނާގެ ބަދަލުގައި އިންޑިއާގައި އައިފޯން އުފެއްދުން އިތުރުކުރުމަށް އެޕަލްއިން ކުރާ މަސައްކަތުގައި ޓާޓާ އެލެކްޓްރޯނިކްސްއަކީ އެންމެ މުހިންމު އެއް ބައިވެރިޔާއެވެ. އެގޮތުން 2026 ވަނަ އަހަރު ދުނިޔޭގައި އުފައްދާ އައިފޯނުގެ 26% އުފައްދާނީ އިންޑިއާގައި ކަމަށް ރިޕޯޓްތައް ބުނެއެވެ. މި ބޮޑު ޑޭޓާ ލީކުގައި އެޕަލްގެ އިތުރުން، ޓެސްލާ، ޓީއެސްއެމްސީ އަދި ކުއަލްކޮމް ފަދަ މަޝްހޫރު އެހެން ކުންފުނިތަކުގެ ސިއްރު ލިޔެކިޔުންތައްވެސް ވަނީ ހިމެނިފައެވެ. މި މައްސަލައާ ގުޅިގެން އެޕަލްއާއި ޓާޓާ ގުޅިގެން ތަހުގީގެއް ފަށާފައިވާއިރު، ޓާޓާއިން ވަނީ އެ ކުންފުނީގެ ސިއްރު ސިސްޓަމްތަކަށް ވަދެވޭ މިންވަރު ކޮންޓްރޯލްކޮށް، ފޮރެންސިކް އޮޑިޓެއް ހެދުމަށް ބައިނަލްއަގުވާމީ ކޮންސަލްޓަންޓެއް އައްޔަންކޮށްފައެވެ.