އީރާނުގެ ކަރަންޓު އުފައްދާ މަރުކަޒުތަކަށް ހަމަލާދޭނެ ކަމަށް ވިދާޅުވެ އެމެރިކާގެ ރައީސް ޑޮނަލްޑް ޓްރަމްޕް ދެއްވާފައިވާ އިންޒާރުތައް މަޑުޖައްސަވާލައްވައި، މެދުއިރުމަތީގައި އުފެދިފައިވާ ހަމަނުޖެހުންތަކަށް ދާއިމީ ހައްލެއް ހޯދުމަށް މަޝްވަރާކުރައްވަން ފައްޓަވައިފި އެވެ.
މެދުއިރުމަތީގައި ހިނގަމުންދާ ހަމަނުޖެހުންތަކަށް ނިމުމެއް ގެނައުމަށް ކުރެވެމުންދާ މަޝްވަރާތަކުގައި ކުރިއެރުންތަކެއް ލިބެމުންދާކަން ފާހަގަކުރައްވައި، އީރާނުގެ ކަރަންޓު އުފައްދާ މަރުކަޒުތަކަށް ދިނުމަށް ރާވާފައިވާ އަސްކަރީ ހަމަލާތައް ފަސް ދުވަހަށް ފަސްކުރުމަށް ޓްރަމްޕް ވަނީ މިއަދު ނިންމަވާފަ އެވެ.
ޓްރޫތު ސޯޝަލްގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، ވޭތުވެދިޔަ ދެ ދުވަހު ވޮޝިންޓަނާއި ތެހެރާނާ ދެމެދު "ވަރަށް ރަނގަޅު އަދި ނަތީޖާ ނެރެވޭ ފަދަ" މަޝްވަރާތަކެއް ކުރެވިފައިވާ ކަމަށެވެ. މި މަޝްވަރާތައް ބިނާވެފައިވަނީ "މެދުއިރުމަތީގައި އުފެދިފައިވާ ދެކޮޅުވެރިކަމަށް ފުރިހަމަ އަދި ދާއިމީ ހައްލެއް" ހޯދުމުގެ މައްޗަށް ކަމަށް ވެސް އޭނާ ވިދާޅުވި އެވެ.
މީގެ އިތުރުން، މަޝްވަރާތަކުގެ ނަތީޖާ ފެންނަންދެން ހަމަލާތައް މަޑުޖައްސާލުމަށް ޑިފެންސް މިނިސްޓްރީއަށް އަންގަވާފައިވާ ކަމަށް ވެސް ޓްރަމްޕް ވިދާޅުވި އެވެ.
މި ނިންމެވުން އައިސްފައިވަނީ ޓްރަމްޕް ކުރިން ކަނޑައެޅުއްވި ސުންގަޑި ހަމަވާން މަދު ގަޑިއިރުތަކަކަށް ވެފައި ވަނިކޮށެވެ. އީރާނުން ހޮރްމޫޒް ކަނޑުއޮޅި ބައިނަލްއަގުވާމީ ދަތުރުފަތުރަށް ފުރިހަމައަށް ހުޅުވާނުލައިފި ނަމަ، އެ ގައުމުގެ ކަރަންޓު އުފައްދާ މަރުކަޒުތައް ސުންނާފަތިކޮށްލާނެ ކަމުގެ އިންޒާރު ޓްރަމްޕް ކުރިން އޮތީ ދެއްވާފަ އެވެ.
ޓްރަމްޕްގެ އިންޒާރުތަކާ ގުޅިގެން އީރާނުން ވެސް ވަނީ ބަދަލުހިފާނެ ކަމުގެ އިންޒާރު ދީފަ އެވެ. އެގޮތުން، އެމެރިކާއިން ހަމަލާދީފި ނަމަ އިޒްރޭލުގެ ކަރަންޓު އުފައްދާ މަރުކަޒުތަކަށާއި ގަލްފުގެ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ބޭނުންވާ ހިދުމަތްތައް ފޯރުކޮށްދޭ ތަންތަނަށް ހަމަލާދޭނެ ކަމަށް އީރާނުގެ ރިވޮލިއުޝަނަރީ ގާޑްސްއިން ބުނެފައިވެ އެވެ.
މި ހާލަތަށް ވަގުތީ ލުޔެއް ލިބުމާ އެކު ދުނިޔޭގެ ބާޒާރުގައި ތެލުގެ އަގަށް ވަނީ ހެޔޮ ބަދަލެއް އައިސްފަ އެވެ. އެގޮތުން، ބްރެންޓް ކުރޫޑް ތެލުގެ އަގު ގާތްގަނޑަކަށް %7 ދަށްވެ، ފީފާއެއްގެ އަގު 104 ޑޮލަރަށް މިއަދު ވަނީ ތިރިވެފަ އެވެ.
ހަތަރުވަނަ ހަފުތާއަކަށް ދެމިގެން ގޮސްފައިވާ މި ހަމަނުޖެހުންތަކުގައި މިހާތަނަށް 2،000އަށް ވުރެ ގިނަ މީހުން މަރުވެފައިވާއިރު، މީގެ ސަބަބުން ދުނިޔޭގެ ހަކަތައިގެ ބާޒާރަށް ވަނީ ބޮޑެތި ލޮޅުންތަކެއް އަރާފަ އެވެ.
މީގެ އިތުރުން، ތަކެތީގެ އަގު އުފުލުމާއި ގަލްފުގެ ގައުމުތަކުގައި ހުރި ފެން ސާފުކުރާ ނިޒާމުތައް ފަދަ މުހިންމު ވަސީލަތްތަކަށް ލިބިދާނެ ގެއްލުމަކާ މެދު ބައިނަލްއަގުވާމީ މުޖުތަމައުން ދަނީ ކަންބޮޑުވުން ފާޅުކުރަމުންނެވެ.