ގްރޭޓާ މާލޭ އޭރިއާގެ ތެރޭގައި ހިމެނޭ މާލެ އާއި ހުޅުމާލޭގެ ކަރަންޓް އެއް ވިއުގައަކުން ގުޅާލައިފި އެވެ.
ވީ ކިހިނެއް؟- ސްޓެލްކޯގެ ފިފުފު ޕަވާ ޕްރޮޖެކްޓުގެ ދަށުން ކުރިއަށްގެންދިޔަ އެ މަޝްރޫއާ އެކު ގްރޭޓާ މާލެ ގްރިޑު މެދުވެރިކޮށް މާލޭ އިންޖީނުގެ އާއި ހުޅުމާލޭ އިންޖީނުގެ ކާމިޔާބު ކަމާ އެކު ސިންކްރޮނައިޒް ކުރުމާ އެކު މާލެއިން ހުޅުމާލެ އަށް އަދި ހުޅުމާލެއިން މާލެއަށް ކަރަންޓު ދެވޭނެ ކަމަށް އެ ކުންފުނިން ބުންޏެވެ.
"ގްރޭޓާ މާލެ ގްރިޑާ އެކު އަޅުގަނޑުމެން މިވަނީ ހަކަތައިގެ ސިނާއަތުގެ މުޅިން އާ ހަރުފަތެއް ގިރާކޮށްފައި، އިރާދަކުރެއްވިއްޔާ މި ގްރިޑާ އެކު އަޅުގަނޑުމެން ދެމުންގެންދާ ހިދުމަތުގެ ފެންވަރު އިތުރަށް ރަނގަޅުވެ، އެކަމުގެ ފައިދާތައް ރައްޔިތުންނަށް ލިބެމުންދާނެ،" ސްޓެކްލޯ އިން ކުރި ޓުވީޓެއްގައި ބުނެފައިވެ އެވެ.
ތަފްސީލް- ސްޓެލްކޯ ފިފުތު ޕަވާ ޕްރޮޖެކްޓުގެ ފުރަތަމަ ފޭސްއަކީ ހަތަރު ޖެނެރޭޓަރު ސެޓްގެ މައްޗަށް. މާލެ، ހުޅުމާލެ އަށް ކަރަންޓުގެ ހިދުމަތް ދިނުމަށް ފެއްޓި މަޝްރޫއުއެކެވެ. އެ ހަތަރު ޖެނެރޭޓަރުން 50 މެގަ ވޯޓުގެ ކަރަންޓު އުފައްދާނެ ކަމަށް ސްޓެލްކޯ އިން ބުންޏެވެ.
އެ ހަތަރު ޖެނެރޭޓަރާ އެކު މާލޭގައި ބަހައްޓާފައިވާ ވަގުތީ ޖެނެރޭޓަރު ސެޓުތައް ބޭނުން ކުރުން ހުއްޓާލާނެ އެވެ.
މާލެ، ހުޅުމާލޭގެ ކަރަންޓު އެއް ވިއުގައަކުން ގުޅާލުމަށް ކުރިއަށްގެންދިޔަ ފިފުތު ޕަވާ ޑިވެލޮޕްމެންޓު ޕްރޮޖެކްޓަކީ 100 ޕަސެންޓު ލޯނު އެހީގައި ކުރިއަށް ގެންދިޔަ ޕްރޮޖެކްޓެކެވެ. ސަތޭކަ ހަތަރު މިލިއަން ޑޮލަރުގެ ލޯނެއް ނަގައިގެން ކުރިއަށްގެންދިޔަ އެ މަޝްރޫއަށް 76 މިލިއަން ޑޮލަރު ހޯދީ ޗައިނާގެ އެގްޒިމް ބޭންކުންނެވެ. ބާކީ ފައިސާ ހޯދީ، އެ މަޝްރޫއުގެ މަސައްކަތް ކުރިއަށްގެންދިޔަ ޑޮންގްފަންގް އިލެކްޓްރިކް ކޯޕަރޭޝަން މެދުވެރިކޮށެވެ. 
އެ މަޝްރޫއުގެ ދަށުން ޖުމްލަ 50 މެގަ ވޯޓްގެ ކަރަންޓު އުފެއްދޭނެ ނުވަ މެގަވޮޓްގެ ހަ އިންޖީނު ބަހައްޓާފައިވެ އެވެ. 
ސްޓެލްކޯ އިން ބުނީ ފިފުތު ޕަވާ ޕްރޮޖެކްޓުގެ ދެ ވަނަ ފޭސްގެ ދަށުން އިތުރު 50 މެގަވޯޓުގެ ކަރަންޓު އުފައްދާނެ ޖެނެރޭޓަރުތައް ބަހައްޓާނެ އެވެ.