ރިޔާސީ އިންތިހާބަށް ރަށްވެހިވެފައިވާ ރަށްނޫން، އެހެން ތަނެއްގައި ވޯޓުލުމަށް، ރީ-ރަޖިސްޓްރޭޝަނަށް ހުޅުވާލި މުއްދަތު މާދަމާގެ ނިޔަލަށް ހަމަވާނެ ކަމަށް އިލެކްޝަންސް ކޮމިޝަން (އީސީ)ން ބުނެފިއެވެ.
އީސީގެ ނައިބު ރައީސް އިސްމާއިލް ހަބީބް ކުރެއްވި ޓްވީޓުގައި، ވިދާޅުވީ، ރަށްވެހިވެފައިވާ ރަށް ނޫން، އެހެން ތަނެއްގައި ވޯޓުލުމަށް ރީ-ރަޖިސްޓްރޭޝަނަށް ހުޅުވާލި މުއްދަތު މާދަމާ ގެ ނިޔަލަށް، ހަމަވާނެ ކަމަށެވެ. އަދި އެއަށްފަހު ރީ-ރަޖިސްޓްރޭޝަންގެ މުއްދަތު، އިލެކްޝަންސް ކޮމިޝަނުން، ދެން އިތުރު ނުކުރާނެ ކަމަށް ހަބީބު ވިދާޅުވިއެވެ.
އެހެންކަމުން ވޯޓުދިނުމުގެ ޙައްގު ލިބިފައިވާ ކޮންމެ ފަރާތަކުންވެސް، 1414 އަށް ގުލައިގެން ނުވަތަ މެސެޖް ކޮށްގެން، އެ މީހަކު މިހާރު ރަޖިސްޓަރީ ވެފައިވާ ތަން ޗެކް ކުރުމަށް އޭނާ ވަނީ ނަސޭހަތްތެރިވެފައެވެ.
އަދި ‏މިހާރު ރަޖިސްޓްރީކޮށްފައިވާ ތަނުގައި، ވޯޓުފޮއްޓެއް ނުބެހެއްޓޭ ހާލަތުގައި، އެފަދަ ފަރާތްތަކަށް ދެވަނަ ފުރުސަތެއް، ލިބިގެން ދާނެ ކަމަށްވެސް ހަބީބް ވިދާޅުވިއެވެ.