ގައުމީ ފެތުންތެރިޔާ، އައިޝަތު އުލްޔާ ޝާއިގު، ރާއްޖޭގެ އަންހެނުންގެ ޝޯޓް ކޯސް، 50 މީޓަރު ފްރީ ސްޓައިލް ގައުމީ ރެކޯޑް އަނެއްކާ ވެސް އާ ކޮށްފި އެވެ.
އުލްޔާ، އަންހެނުންގެ ޝޯރޓްކޯސް 50 މީޓަރު ފްރީސްޓައިލް އިވެންޓުގެ ޤައުމީ ރެކޯޑް، އާކުރީ، އޮސްޓްރޭލިއާ ގައި ކުރިއަށްދިޔަ 2025 ހެންކޮކް ޕްރޮސްޕެކްޓިން ވެސްޓާން އޮސްޓްރޭލިއާ ޝޯޓްކޯސް ޗެމްޕިއަންޝިޕްގައި ވާދަކޮށެވެ.
އެ ގޮތުން، އުލްޔާ މިރެކޯޑް އާކޮށްފައިވަނީ 00:28.41 އިން ރޭސް ފުރިހަމަ ކޮށްގެންނެވެ.
މި އިވެންޓުގެ ޤައުމީ ރެކޯރޑް އެންމެ ފަހުން އޮތީ އަމްނާ ތަޒްކިޔާ މިރުޞާދު އެވެ. އެއީ، މިދިޔަ އޮކްޓޫބަރު މަހު، ތައިލެންޑުގައި ކުރިއަށްދިޔަ އޭޝިއަން އޯޕަން ސްކޫލްސް އިންވިޓޭޝަނަލް (އޭއޯއެސްއައި) ޝޯޓްކޯސް (25މީޓަރު) އޭޖް ގްރޫޕް ސްވިމިން ޗެމްޕިއަންޝިޕްގައި، 00.28.55 އިން އިވެންޓު ނިންމައިގެން ތަޒްކިޔާ ހެދި ރެކޯޑެކެެވެ.
އޭގެ ކުރިން، މި ރެކޯޑް އޮތީ އުލްޔާ އަތުގަ އެވެ. އެ ފަހަރު އުލްޔާ ވަނީ އެއް މަސް ތެރޭ ދެ ފަހަރަށް، މި އިވެންޓްގެ ގައުމީ ރެކޯޑް އާ ކޮށްފަ އެވެ. ޖުލައި މަހު، އޮސްޓްރޭލިއާ ގައި ކުރިއަށްދިޔަ ދި ޔުނިވާސިޓީ އޮފް ވެސްޓާން އޮސްޓްރޭލިއާ (ޔޫޑަބްލިއުއޭ) ވެސްޓް ކޯސްޓް ކްލަބް ނައިޓް ނަންބަރު 7 މީޓްގެ ޝޯޓް ކޯސް، 50 މީޓަރު އިވެންޓްގައި ރެކޯޑް ހެދުމުގެ މަހެއްހާ ދުވަސްކުރިން، ޖޫން މަހު، އޮސްޓްރޭލިއާގައި ކުރިއަށްދިޔަ ބްރޭކާސް ބިގް ސްޕްލޭޝް ޖޫން 2024 މީޓްގެ އެ އިވެންޓްގައި ވެސް އުލްޔާ ރެކޯޑް އާ ކުރި އެވެ.
މިދިޔަ އަހަރަކީ އުލްޔާގެ ކެރިއަރުގައި ހާއްސަ އަހަރެކެވެ. ޕެރިސް އޮލިމްޕިކްސްގައި ރާއްޖެ ތަމްސީލް ކުރުމުގެ ފުރުސަތު ހޯދި އަންހެން ފެތުންތެރިއަކީ އުލްޔާ އެވެ.