މިއަދު ހަވީރު 5:30 ހާއިރު ކަރަންޓު ކެނޑުނު ގޮތަށް އަދިވެސް ހިޔާ ޓަވަރުތަކަށް ކަރަންޓު ނުލިބޭ ކަމަށް ވީނިއުސްއަށް މައުލޫމާތު ލިބިއްޖެއެވެ.
މާލޭ ސަރަހައްދުގައި ކަަރަންޓުގެ ޚިދުމަތްދޭ މައި ކުންފުނި، ސްޓޭޓް އިލެކްޓްރިކް ކޮމްޕެނީ (ސްޓެލްކޯ)އިން ބުނީ ހިޔާގެ ބައެއް ޓަވަރުތަކުން ކަރަންޓުގެ ހިދުމަތް މެދުކެނޑެން މެދުވެރިވީ ހިޔާގެ ފުރަތަމަ ޓަވަރުގެ ސަބްސްޓޭޝަންގެ ސުވިޗްގިއަރގެ ބަސްބާ ޝޯޓުވުމާއި ގުޅިގެން ކަމަށެވެ.
އެސަބްސްޓޭޝަންގެ ސުވިޗްގިއަރގެ ބަދަލު ކުރުމުގެ މަސައްކަތް ކުރިއަށްދާ ކަމަށް ސްޓެލްކޯއިން ބުނެއެވެ. މިމަސައްކަތަށް އަދި ގަޑިއިރު ހޭދަވާނެ ކަމަށް ލަފާ ކުރެވޭ ކަމަށާއި ދިމާވާނެ ދަތިތަކަށް މާފަށް އެދޭ ކަމަށް ސްޓެލްކޯއިންވަނީ ބުނެފައެވެ.
ކަރަންޓު ކެނޑުނީ ބަންގިގޮވަން ކުޑަތަން ވަނިކޮށެވެ. އެހެންވެ، ހިޔާގައި ދިރިއުޅޭ މީހުން މިއަދު ރޯދަ ވީއްލާފައި ވަނީ ކަނު އަނދިރީގައެވެ. އަދިވެސް އެމީހުން ތިބީ ކަނު އަނދިރީގައެވެ.