ޓެކްނޮލޮޖީ ދުނިޔޭގެ އެންމެ ބޮޑު ވާދަވެރިކަމުގައި ބޮޑު ބަދަލެއް އައިސް، އެޕަލް އިން އެންވީޑިއާ ފަހަތަށް ޖައްސާލުމަށްފަހު ދުނިޔޭގެ އެންމެ އަގުބޮޑު ކުންފުނީގެ މަޤާމު އަލުން ހޯދައިފިއެވެ. އާޓިފިޝަލް އިންޓެލިޖެންސް އާ މެދު އިންވެސްޓަރުން ދެކޭ ގޮތް އަލުން ބަޔާންވެގެންދިޔަ މި ބަދަލާއެކު، ހުކުރު ދުވަހު ވަނީ ޓެކް ބޮޑެތި ކުންފުނިތަކުގެ ތަރުތީބު އަލުން ރޭންކް ކުރެވިގެން ގޮސްފައެވެ. މި ބަދަލާއެކު އެޕަލް އިން ވަނީ އެންވީޑިއާގެ 272 ޓްރޭޑިން ދުވަހުގެ ރެކޯޑް ވެސް ކަނޑުވާލާފައެވެ. އެންވީޑިއާ އަކީ މި މަޤާމުގައި އެންމެ ގިނަ ދުވަހު ހުރި އެމެރިކާގެ އެންމެ ބޮޑު ކުންފުނި ކަމުގައި ދެމިއޮތް ކުންފުންޏެވެ. ހުކުރު ދުވަހު މާކެޓް ބަންދުވިއިރު އެޕަލްގެ މާކެޓް ކެޕިޓަލައިޒޭޝަން ހުރީ 4.88 ޓްރިލިއަން އާއި 4.95 ޓްރިލިއަން ޑޮލަރާ ދެމެދުގެ މިންވަރެއްގައެވެ. އަދި އެންވީޑިއާގެ ހިއްސާގެ އަގު 3.5 އިންސައްތައަށް ދަށްވުމަށްފަހު، އެ ކުންފުނީގެ މާކެޓް ކެޕިޓަލައިޒޭޝަން ހުރީ 4.76 ޓްރިލިއަން އާއި 4.86 ޓްރިލިއަން ޑޮލަރާ ދެމެދުގައެވެ. މި ދުވަހު އެޕަލްގެ ހިއްސާގެ އަގު ވަނީ މުއާމަލާތްކުރި އެންމެ މަތީ އަގަށް އަރާފައެވެ. އިންޓްރަޑޭ ވިޔަފާރީގައި ހިއްސާއެއްގެ އަގު 339.50 ޑޮލަރަށް އަރައި، އާ ރެކޯޑެއް ގާއިމުކޮށްފައިވާއިރު، އެޕަލް އިން މިހާރު ދަނީ 5 ޓްރިލިއަން ޑޮލަރުގެ މާކެޓް ވެލިއުއެއް ހޯދުމާ ވަރަށް ކައިރިވަމުންނެވެ. އެ މިންވަރަށް ދިއުމަށްޓަކައި އެޕަލްގެ ހިއްސާގެ އަގު 340.43 ޑޮލަރަށް އަރަންޖެހެއެވެ. މީގެ ކުރިން، ދުނިޔޭގައި ފުރަތަމަ 5 ޓްރިލިއަން ޑޮލަރުގެ މާކެޓް ވެލިއުއެއް ހޯދި ކުންފުނީގެ ރެކޯޑް ހޯދާފައިވަނީ މިދިޔަ އޮކްޓޫބަރު މަހު އެންވީޑިއާ އިންނެވެ. https://sun.mv/224527 މި ބަދަލުގެ އަޑީގައި އޮތީ އާޓިފިޝަލް އިންޓެލިޖެންސް ދާއިރާއަށް ކުރާ އުންމީދުތަކާއި އިންވެސްޓަރުންގެ ވިސްނުން ބަދަލުވުމެވެ. އިންވެސްޓަރުން މިހާރު ދަނީ ގާތްގަނޑަކަށް އަހަރެއްހާ ދުވަސްވަންދެން އާޓިފިޝަލް އިންޓެލިޖެންސް ކުރިއެރުމުގެ އެންމެ ކުރީގައި އޮތް އެންވީޑިއާގެ އިތުރުން، އެހެން ދާއިރާތަކުގެ ކުންފުނިތަކަށް ވެސް ސަމާލުކަން ދެމުންނެވެ. ކުރިން އެޕަލް ދެކެވުނީ އާޓިފިޝަލް އިންޓެލިޖެންސް ރޭހުގައި ފަހަތުން ދާ ކުންފުންޏެއްގެ ގޮތުގައި ނަމަވެސް، މިހާރު އެނަލިސްޓުންގެ ޚިޔާލު ވަނީ ބަދަލުވާން ފަށާފައެވެ. އެޕަލް އަކީ ބޮޑެތި ކެޕިޓަލް އެކްސްޕެންޑިޗާ ހޭދަތަކަށް މާ ބޮޑަށް ހުށަހެޅިފައި ނުވާ، އަދި ހިދުމަތްތަކާއި، އީކޯސިސްޓަމް، އަދި ހާޑްވެއާ އަޕްގްރޭޑްތައް މެދުވެރިކޮށް އާޓިފިޝަލް އިންޓެލިޖެންސް އިން ފައިދާ ނަގަން މާ ރަނގަޅަށް ތައްޔާރުވެފައިވާ ކުންފުންޏެއްގެ ގޮތުގައި މިހާރު ވަނީ ބެލެވިފައެވެ.