20 ވަނަ ޤަރުނުގައި ޖުމްހޫރިއްޔަތެއް ގެނައުމަށް ދިވެހިން ދެކުނު ހުވަފެން ހަޤީގަތަކަށްވާތަން ފެންނަން ފަށާފައިމިވަނީ މިއަދުކަމަށް ދިވެހި ބަހާއި ސަޤާފަތާއި ތަރިކައާ ބެހޭ ވޒީރު އާދަމް ނަޞީރު އިބްރާހިމް ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ޖުމްހޫރީ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަފުޅުދައްކަވަމުންނެވެ.
ދިވެހިބަހާއި ސަޤާފަތާއި ތަރިކައާ ބެހޭ ވޒީރު އާދަމް ނަޞީރު އިބްރާހިމް ވިދާޅުވީ ޖުމްހޫރިއްޔަތެއް ރައްޔިތުން ބަލައިގަތުމުގެ މާނައަކީ ދިވެހި ޤައުމާއި ދިވެހި ރައްޔިތުންނާ ބެހޭ ގޮތުންނާއި ޤައުމުގެ ތަރައްޤީގެ ކަންކަން ނިންމުމުގައި ދިވެހި ރައްޔިތުންގެ ހިއްސާއާއި ބައިވެރިވުން އޮތުންކަމަށެވެ. މިއީ ދިވެހި ރައްޔިތުން 20 ވަނަ ޤަރުނުގައި ބޭނުންވާގޮތްކަން ވަޒީރު ފާހަގަކުރެއްވިއެވެ.
ރާއްޖޭގެ ވެރިކަމުގެ ނިޒާމާއަށް އެކި ނަންނަމުގައި ބަދަލުތައް އައިނަމަވެސް ނަމަށްވުރެ ކުރާ ކަންތައްތައް މުހިއްމުވާކަމަށާއި 20 ވަނަ ޤަރުނުގެ ރައްޔިތުން ދެކެމުން އައި ހުވަފެން މިއަދު ހަޤީގަތަކަށްވާތަން ފެންނަމުންދާކަމަށެވެ. އޭގެ ސަބަބުތަކެއްގެ ގޮތުގައި ވަޒީރު ފާހަގަކުރެއްވީ މައިގަނޑު 3 ކަމެކެވެ.
އެގޮތުން މިއަދު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ހިތްޕުޅުގައި ދިވެހި ޤައުމާއި ދިވެހިންނާ މެދު އޮތް ވަރަށް ސާފުކޮށް ހުށައެޅުއްވުމުން ވެރިކަމުގެ އަމާނާތް ރައްޔިތުން އިތުބާރާއެކު ރައީސްއަށް ހަވާލުކުރެއްވިކަން ފާހަގަކުރެއްވިއެވެ. އަދި ވެރިކަން ހަވާލުކުރެއްވުމުގެ ކުރިންވެސް އެމަނިކުފާނު ގެންދެވީ ރައްޔިތުންގެ ފަޅީގައި އެމަނިކުފާނު އަބަދުވެސް ހުންނަވާނެކަމަށާއި ވެރިކަން ކުރައްވަން ބޭނުންވަނީ ޤައުމުގެ ހުރިހާ ފަށަލަތަކެއް ޝާމިލްވާ ގޮތަށްކަން ފާހަގަކުރެއްވިއެވެ.
"ވެރިކަމުގައި ހުންނަވާ ބޭފުޅެއް، ހިންގަވަން ތިއްބަވާ ބޭފުޅުން ރައްޔިތުންނަށް އިޚުލާސްތެރިކަން ރައްޔިތުންނަށް މަންފާ ލިބުމުގައި އެންމެ ބޮޑުދައުރެއް އަދާކުރަނީ. މިއަދަށް ބަލާއިރު 20 ވަނަ ޤަރުނުގެ ދިވެހި ރައްޔިތުން ދުއް ހުވަފެން ޙަޤީގަތަކަށް ވާތަން އަޅުގަނޑުމެންނަށް މި ފެންނަނީ މިއަދު ކަމަށް ދަންނަވާކަށް އަޅުގަނޑު ފަހެއް ނުޖެހޭ." ދިވެހިބަހާއި ސަޤާފަތާއި ތަރިކައާ ބެހޭ ވޒީރު އާދަމް ނަޞީރު އިބްރާހިމްވިދާޅުވިއެވެ.
ވަޒީރު ވިދާޅުވީ ރައީސް އޭރު ވިދާޅުވި ވަޢުދުފުޅުތައް ފުއްދެވުމުގެ މަސައްކަތްތައް ކުރައްވަމުން ގެންދަވާކަމަށެވެ. އެގޮތުން ކުރިއަށް އޮތް 20 އަހަރުދުވަހުގެ ޤައުމީ ތަރައްޤީ އާ ގުޅޭ ޕްލޭން ތައްޔާރުކުރުމުގެ މަސައްކަތް ފަށާފައިވާކަން ފާހަގަކުރެއްވިއެވެ. މި ޕްލޭން ފުރިހަމަވެގެން އަންނައިރު ހުރިހާ ރައްޔިތުންގެ ޚިޔާލުތައް އެ ޕްލޭންގައި އޮތުމަކީ ރައީސް ބެނުންވާގޮތްކަން ތަކުރާރުކޮށް ވިދާޅުވަމުން ގެންދަވާކަންވެސް ވަޒިރު ފާހަގަކުރެއްވިއެވެ. އަދި އެކަމަށް ފުރުޞަތުތައް ހުޅުވާލައްވާފައިވާކަމަށާއި ދިވެހި ރާއްޖެ ކުރިއަށް އޮތްތ ތަނުގައި ހިންގާނީ ހުރިހާ ދިވެހިން ދަންނަ މިސްރަބަކަށް ދިޔުމަށްކަމަށެވެ.