ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ގާސިމް އިބްރާހީމްގެ ކުންފުނި ވިލާ ފައުންޑޭޝަނުން އދ. މާމިނގިލީގައި ޕޮލިސް ސްޓޭޝަނެއް އެޅުމަށް ކޮމިޝަނާ އޮފް ޕޮލިސް އަލީ ޝުޖާއުގެ ހުއްދައަށް އެދިވަޑައިގެންފިއެވެ. އެ ހުއްދައަށް އެދިވަޑައިގެން ސީޕީއަށް އެޑްރެސްކުރައްވައި އިއްޔެ ވަނީ ސިޓީއެއް ފޮނުއްވާފައެވެ. އެ ސިޓީގައި ގާސިމް ވިދާޅުވީ، މާމިގިއްޔަކީ އެ ރަށް އޮތް ރީޖަންގެ ހަތަރު އަތޮޅުގެ އާބާދީއަށް ބަލާއިރު އެންމެ ބޮޑު ރަށް ކަމަށާއި ބިމުގެ ގޮތުން ވެސް އެންމެ ބޮޑު އެއް ރަށް ކަމަށެވެ. އަދި، މާމިގިއްޔަކީ އިންޓަނޭޝަނަލް އެއާޕޯޓެއް ވެސް އޮތް ރަށަކަށްވުމާ އެކު ރަށުގެ ވަށައިގެން ގިނަ ރިސޯޓުތަކެއް އޮތުމުން އެކި ޚިދުމަތް ހޯދުމަށް ގިނަ ބަޔަކު ޒިޔާރާތްކުރަމުންދާ ރަށެއް ކަމަށް ގާސިމް ވިދާޅުވިއެވެ. ވަޒީފާއާއި އެކިއެކި މަސައްކަތްތެރީން ހިމެނޭހެން މާމިގިލީގައި ދިރިއުޅޭ އާބާދީއަކީ ބޮޑު އާބާދީއެއްކަން ގާސިމް ވަނީ ފާހަގަކުރައްވައިފައެވެ. ފުލުސް ކޮމިޝަނަރު އަލީ ޝުޖާއު "ސަން"އަށް ދެއްވި އެކްސްކްލޫސިވް އިންޓަވިއު -- ފޮޓޯ: މުޙައްމަދު ޝާތިއު އަބްދުﷲ ގާސިމް ވިދާޅުވީ، ފުލުހުންގެ ތަފާސްހިސާބުތަކުން ދައްކާ ގޮތުގައި އދ. އަތޮޅުގެ ކްރައިމް ރޭޓް އެންމެ ގިނަ ރަށަކަށް މާމިގިލި ވެފައިވާތީ، ފުލުހުންގެ ޚިދުމަތް ދިނުމަށް ރީޖަން ފެންވަރުގެ ސްޓޭޝަނެއް މާމިނގިލީގައި ހުންނަންޖެހޭ ކަމަށް އެކި ފަހަރުމަތިން ވާހަކަދެކެވިފައިވާ ކަމަށެވެ. އެގޮތުން، ފާއިތުވީ ފަސް އަހަރުތެރޭ ފުލުހުންގެ މަރުކަޒެއް މާމިގިލީގައި އެޅުމަށް ބަޖެޓުގައި ވެސް ހިމަނާފައިވާނެ ކަމަށް ގާސިމް ވިދާޅުވިއެވެ. ނަމަވެސް، މިއަދާ ހަމައަށް ވެސް އެ މަސައްކަތް ފެށިފައިނުވާތީ މާމިނގިލީގައި ފުލުހުންގެ ޚިދުމަތް ދިނުމަށް އުޅެމުންދާ ދަތި ހާލަތު އެ މަނިކުފާނަށް ވަޒަންކުރެވޭ ކަމަށް ގާސިމް ވިދާޅުވިއެވެ. އެހެންކަމުން ސީޕީ ހުއްދަ ދެއްވައިފިނަމަ މާމިގިލީގައި އެޅުމަށް ހަމަޖެހިފައިވާ ފުލުހުންގެ މަރުކަޒު ވިލާ ފައުންޑޭޝަންގެ ސްޕޮންސަޝިޕްގެ ދަށުން އިމާރާތްކުރުމަށް ނިންމާފައިވާ ކަމަށް ގާސިމް ވިދާޅުވިއެވެ. އަދި، އިމާރާތްކުރުމަށް ބޭނުންވާ ކުރެހުމާއި، އިމާރާތް ހެދުމަށް ސްޕޮންސްޝިޕް ގަބޫލުކުރިކަމުގެ ލިޔުން ލިބޭނެ ގޮތް ހަމަޖައްސަވައިދެއްވުމަށް ވަނީ އެދިވަޑައިގެންފައެވެ.