ހިޖުރީ މަހެއް ފަށަން އާ މަހުގެ ހަނދު ހަމަލޮލަށް ފެނުން ލާޒިމެއް ނޫން: މައުމޫން

ހިޖުރީ މަހެއް ފެށުމަށް އާ މަހުގެ ހަނދު ހަމަލޮލަށް ފެނުން ލާޒިމު ނޫން ކަމަށް ކުރީގެ ރައީސް މައުމޫނު އަބްދުލްގައްޔޫމް ރޭ ވިދާޅުވެއްޖެ އެވެ.
ވީ ކިހިނެއް؟ - ހަނދާ ގުޅޭ ގޮތުން މައުމޫނު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ އިރުއޮއްސުމަށް ފަހު ކިތަންމެ ކުޑަ ހިނދުކޮޅަކަށް ނަމަވެސް ހަނދު ނޯއްސި ހުރިކަން ހިސާބުން ސާބިތުވާ ނަމަ އާ މަހެއް ފެށުނީ ކަމަށެވެ.
ތަފްސީލް - މި އަހަރުގެ ޝައްވާލު މަހުގެ ހަނދާ ގުޅޭ ގޮތުން މައުމޫނު މީގެ ކުރިން ވެސް ވަނީ ވާހަކަ ދައްކަވައިފަ އެވެ. އެގޮތުން، މާދަމާ އަކީ ޝައްވާލު މަހުގެ 1 ކަމަށް ވަރަށް ބޮޑަށް ބެލެވޭ ކަމަށް އެ މަނިކުފާނު ވިދާޅުވެފައިވެ އެވެ.
އެކަމާ ގުޅޭ ގޮތުން ލިޔުއްވި ލިޔުއްވުމެއްގައި އެ މަނިކުފާނު ވިދާޅުވި ގޮތުގައި، ސައުދީ އަރަބިއްޔާ، މިސްރު، ތުރުކީ އަދި މޮރޮކޯ ފަދަ އިސްލާމީ ގައުމުތަކަށް މިއަދު އިރުއޮއްސުމަށް ފަހު، ހަނދު ނުއޮއްސި 8 މިނެޓާއި 20 މިނެޓާ ދެމެދުގެ މިންވަރަކަށް ހުންނާނެ ކަމަށް ފަލަކީ ހިސާބުން ދައްކަ އެވެ. އެހެންވެ، މިއަދަކީ ރޯދަ މަހުގެ ފަހު ދުވަހަށްވެ، މާދަމާ އަކީ ފިތުރު އީދު ދުވަސް ކަމަށް ވަރަށް ބޮޑަށް ޔަގީން ކުރެވޭ ކަމަށް އެ މަނިކުފާނު ލިޔުއްވާފައިވެ އެވެ.
ގުޅުން ހުރި - މާދަމާ ފިތުރު އީދަށް ވެދާނެ ކަމަށް ވަރަށް ވަރަށް ބޮޑަށް ގަބޫލު ކުރެވޭ ކަމަށް ކުރީގެ ރައީސް ވިދާޅުވިއިރު، ރާއްޖޭގެ ގައުމީ ޔުނިވާސިޓީގެ ކުރީގެ ޗާންސެލަރު ޑރ. ހަސަން ހަމީދު ލަފާކުރައްވަނީ މާދަމާ އީދަށް ނުވާނެ ކަމަށެވެ. ފަލަކީ ހިސާބުތަކަށް ބަލާއިރު އޭނާއަށް ބެލެވެނީ އީދު ވާނީ ހޯމަ ދުވަހަށް ކަމަށެވެ.
ހަމީދު ވިދާޅުވީ އީދުގެ ހަނދު ފެންނަ ދުވަސް ބެލުމަށް އެންމެ ފުރަތަމަ ކުރަންޖެހޭނެ ކަމަކީ އެ ހަނދު އުފަންވާ ވަގުތު ބެލުން ކަމަށެވެ.
އޭނާ ވިދާޅުވީ:
މި މަހުގެ 29 ވަނަ ދުވަހުގެ އާ ހަނދު އުފަންވަނީ މާލެ ގަޑިން ހަވީރު 3:57ގައި ގާތްގަޑަކަށް ހަވީރު 4 ޖަހާއިރު 
އެ ދުވަހު ހަނދު އޮއްސޭނީ އަދި އިރުއޮއްސެނީ ވެސް 6:14ގައި 
ހަނދު އޮއްސޭ ގަޑި އާއި އިރުއޮއްސޭ ގަޑި ދިމާވާ ހާލަތުގައި އިރުގެ ދަޅަޔާ ހެދި ހަނދެއް ނުފެންނާނެ 
ނުފެންނާނެ އަނެއް ސަބަބަކީ ހަނދު އުފަންވުމާއި އޮއްސުމާއި ދެމެދު ވަނީ ދެ ގަޑި 17 މިނެޓު
ރާއްޖޭގައި ހަނދު ފެނުމަށް އުފަންވުމާއި އޮއްސުމާ ދެމެދު 17 ގަޑިއިރު ވާން ޖެހޭނެ 
ނުފެންނާނޭ އަނެއް ދަލީލަކީ އޮއްސޭއިރު ހަނދުގެ އަލިކަން ހުންނާނެ ވަރަކީ %0.0 ކަމަށްވާތީ
މުޅި އޭޝިއާގެ ބައްރަށް 29 މާޗްގައި ހަނދެއް ނުފެންނާނެ؛ ފެނުމުގެ ފުރުސަތު އޮތީ ހަމައެކަނި އެމެރިކާގެ ހުޅަނގު ބިތަށް
ހަނދު އުފަންވުމާއި އޮއްސުމާ ދެމެދު ވާނީ ގާތްގަޑަކަށް 4 ގަޑިއިރު 
މިހާ ޅަ ހަނދެއް، މައްކާގެ އުޑުމަތި ކިތަންމެ ސާފު ވިއަސް ނުފެންނާނެ
އެނގުން މުހިއްމު - ކަލަންޑަރުގައިވާ ގޮތުން ފިތުރު އީދު ވާނީ ހޯމަ ދުވަހަށެވެ. 
ހަނދު ސާބިތު އިސްލާމިކް މިނިސްޓްރީން ބާއްވާ ބައްދަލުވުން މިރޭ އޮންނާނެ އެވެ. އެ ބައްދަލުވުމުގައި ރާއްޖެއަށް ފިތުރު އީދު ވާނެ ދުވަސް ރަސްމީކޮށް ކަނޑައަޅައި އިއުލާންކުރާނެ އެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ