މިއަހަރުގެ ރަމަޟާން މަހުގެ ފުރަތަމަ 15 ގެ ޢުމްރާ ދަތުރު ދިއަ މީހަކު ބުނީ ފުރަތަމަ 15 ގައިވެސް މީހުން ގިނަވެ ފިތި ބާރުވުމުގެ ސަބަބުން ޠަވާފްކޮށްފައި ނަމާދުކޮށްލާނެ ތަންކޮޅެއް ނުލިބިގެން ހުރި ދެފިޔަވަޅުމަތީގައި ހުރެ ނަމާދުފުރިހަމަކުރަންޖެހުނު ކަމަށެވެ. "ސަޖްދަ ޖަހަން ކީއްކީއްކުރަން ރުކޫޢަށްވެސް ގުދުވެ ނުލެވޭ ފަހަރު ދިއަ" 
"މީހުންގަނޑު ފިތި ބާރުވެ ތޮއްޖެހިފައި، ކޮޅަކަށް ގުޑާލަންވެސް އުނދަގޫވެފައި ތިބޭތަން ފެނުމުން ހިތަށް އިޙްޞާޞް ކުރެވުނީ ޤިޔާމަތް ދުވަސް! މާތް ﷲ ގެ ރުހިވޮޑިގަތުން ނުލިބޭ އަޅުން ފިތިބާރުވެގެން ތިބެންޖެހޭނެ ޙާލު. ނޯށުކުރިއަށް ފެންގަނޑު ބޮޑުވެފައިވާނެއިރު އުޅެންޖެހޭނެ ޙާލު! ހަމަތެދެއް މިބުނަނީ ބިރުންވެސް ހަލާކުނުވީ ހަމަކިރިޔާ!" 
ކަންކަން ފެނުމުން އެކި މީހުންނަށް ކުރެވޭނީ އެކި އިޙްޞާޞްތަކެވެ. ހިތަށް ވަންނާނީ އެކި ކަންކަމެވެ. މިމީހާއަށް މިގޮތަށް ކަންކަން އިޙްޞާޞްކުރެވުނުއިރު އެކަމުން ޢިބްރަތް ޙާޞިލުނުކުރެވޭ ބައަކުވެސް އުޅޭނެއެވެ. އެއީވެސް ހަމަ ދިމާވާނެ ކަމެކެވެ. 
މިހެން ބުނަންޖެހެނީ ޢުމްރާވުމުގެ މަޤްޞަދު ކިތަންމެ މަތިވެރި ނަމަވެސް އެހެންމީހުންވެސް ދާތީ ގޮސްލާމީހުންވެސް އުޅެއެވެ. އެފަދަ މީހުންނަށް ކުރެވޭނެ އިޙްޞާޞް ތަފާތުވާނެއެވެ. އެހެން ގޮތަކަށް ބުނާނަމަ މާބޮޑު އިޙްޞާޞެއް ނުކުރެވޭނެއެވެ. މިބުނާފަދަ ބައަކު ތިބޭކަން އެނގެނީ ޢުމްރާވުމުގެ މަތިވެރި އަޅުކަން އަދާކޮށްފައި އެނބުރި އައުމަށްފަހު ޢުމުރްރާ ވެވިއްޖެކަން ޢަމަލުތަކުން ނުދެއްކޭ، ޢަމަލުތައް އިޞްލާޙްނުކުރެވޭ ބައަކު ތިބޭތީއެވެ. 
ޔާ ﷲ! ޢުމްރާވާ އެންމެންނަށްވެސް ހެޔޮ ރަޙްމަތް ލައްވަވާށި! ޤުމްރާވުމަށްފަހު ހެޔޮ ޢަމަލުކުރުމުގައި ޘާބިތުވެ ތިބުމުގެ ތައުފީޤް ދެއްވަވާށި! އެންމެންގެވެސް ފާފަތައް ފުއްސަވައިދެއްވަވައި ހެޔޮ ރަޙްމަތް މިންވަރުކުރައްވަވާށި! އާމީން 
ޔާ ﷲ! ޢުމްރާ ވުމަށް ނިޔަތްގަނެ އެކަމަށް މަސައްކަތްކުރަމުން އަންނަ އެންމެންނަށް ޢުމްރާވުމުގެ ތައުފީޤް ދެއްވަވާނދޭވެ! އާމީން